TAKSU LAK 14 - ASII LAKDAP Bible (BSI)

¹ Taksu nyung raq ajamkun tiijongtlo, Shatmaq maiqjiq nyung raq ajamkun ka, ajaq miili siiq baiqtlo.

² Juwa tingting maq sitlaq, kriiti raq Tatiwe shreng tlo. Juwa ajok aliiq sitlaq, kriiti raq Tatiwe shreng mak.

³ Angok angiti ashkong asi, kriikha na abom pahea; shatmaq taksu maiqse bom raq, apaiq khum tiiwongkuqtlo.

⁴ Wak the chang minsaüpang ahü raüla, tsamtiip ka shaqmii miraq; shatmaq minsaü pang asi raüla, tsamtiip na tsam ama miraq.

⁵ Maiqkam seachang saqse riika, riikhaqli saqse mikuq; shatmaq maiqkam seachang riimakti riika, arot saqse mikuq.

⁶ Kumrong kumraqti ka, ümtiikiimin maiqshaq ma jalot mak. Shatmaq maiqshaqti riika jaqloseli, phanrap saptsin hotlo.

⁷ Maiqjiqti rai naq riikongkiq, Tsangshiq raq ümniima tlangke chang, jam min ahü.

⁸ Taksu maiqse ka jaro khonglaq? Jamkhano ngukla apaiq ka phanrap asap. Maiqjiqti ka jaro ngitla? Jamkhano ngukla apaiq ka, asap atsinwe nguta tiima tlaq kata.

⁹ Maiqjiqti raq ngarai tang ka, hiqtili ikhli shipoqtlo. Shatmaq maiqshaqti riika, mra tiidii wan rittlo.

¹⁰ Ümchochi ka ümniirii, ümtsan mong na akhap akhiq kiimin, ümniirii. Maiq ahinti raq riisha hodam mak.

¹¹ Ashutwe jam ka thenkai jai min, mittingwe jam ka atsing angangli misi.

¹² Ümniiraq riikhaqli lam phan tiikang angu ka, atsai riihum chang moja miraq.

¹³ Naihü hihe riika chapatsi mopaüli, anaitrang tsaqri chapa ka dongsaqli miraq.

¹⁴ Ashut kloti riika ashut thiitham milap; Kiimaq maiqphaqti riika, apaiq raq ahea shamtaq kra miitu poksi milap.

¹⁵ Maiqjiqti miika phanrap ahea siisaq, shatmaq khonglaqti riika, lam ka samhea liiraüta khumtlo.

¹⁶ Taksu maiqse ka honkamshat maq sitlo, shatmaq maiqjiq ngamphiqti ka, taülaükhiq mophiim phiim shamkitlo.

¹⁷ Khiqsaq mokhiqkaiti riika, ajiq alam sapmak klo tlo. Shatmaq taksu maiqse riika, kaishak maq anin riitlo.

¹⁸ Lairap sapmakti raq ashut klotlo. Raüta maiqmii thiikho na deawatlo. Shatmaq khonglaq maiqse riika, phanrap saptsin wantlo.

¹⁹ Ashut kiimungti ka ranaiqshishi, kechu maiqse jichong na mibum wa. Raüta khrum jaü jaü mihoq wa.

²⁰ Miitsan maiqse jurmin romak, jamthaq jamkiqti riimin romak. Shatmaq chiithe maiqse miika, kongti pahea.

²¹ Khoqriiq shishiiq si lungwii tlaü jiila, miitsan maiqse kra khrum laq, Maiq ma saisi ka ngarai.

²² Nanok ma ahea jaqsham kuq haü la, shreng manto milaphaü. Kiimaq maiq raq ümniima mitlam. Shatmaq abi kiimung tlaü jiila, kriika ashut klo tlaü.

²³ Minshiiq shiichaqti ka, wok phetaktak misi. Shatmaq jaq tiihot raüta, angalam maq tsantsuti ka, miitsanli mitum phaq.

²⁴ Taksu maiqse ka tsiiqlap nyamkapti, angok angiti ka jangi wan wan li miraq.

²⁵ Tingting saqse keti riika miisaq tiichhiitlo, arot saqse keti riika maiq shaphaq baiqtlo.

²⁶ Tatiwe ma haisong tsantsii thüti jamkun ka, Tatiwe raq khup wong kuqshat.

²⁷ Tatiwe ma haisong tsantsii thüka rilung khamdü; tsailam thiikho na dea mak miraq.

²⁸ Awokhong na siti mungmaiqse apa si raütiq, hokhamwe khushü ka ajong miraq. Sengi ahü nguraü ka akhushü min ahü.

²⁹ Juwa mokhiq khiq mak, kriiti ka taksu maiqse. Shatmaq juwa khiqsaq khiq tlaq, kriiti ka maiqjiqwe.

³⁰ Tiima tsantsii khangriri maq siti, khum asai ka nyeajokjok hea. Makshu rashe siti ka, ariitsai na anam ikha.

³¹ Miitsan maiqse haihiiti ka, tsangshiq Phansangtiwe shummiitlo. Shatmaq miitsan maiqse, khrumti ka tsangshiq, Shiikeawe shomnoqtlo.

³² Abi ati kiimungti ka maiqmii jaqsham, ashut thiikhobok na dea watlo. Shatmaq mitting maiqse ka, apaiq tingting jaqsham riili, tiikhup wongkuqtlo.

³³ Taksu maiqse tsantsii ka, nyan phaqchi tu. Shatmaq angok angiti riika, nyan phaqchi sapmak.

³⁴ Kechu jaqsham raq, maiqmung tiijongtlo. Shatmaq ngarai riika, mungkhushü jamtlo.

³⁵ Hokhambi ka mungpeng atsinti, welabi ma chochitlo. Shatmaq jaqsham tsinmakti ma, apaiq motiihotlo.