JOSHUA 8 - ASII LAKDAP Bible (BSI)

Joshua Raq Ai Chela Longwa Miitu Rechap Süto

¹ Kiijiishe Tatiwe raq Joshua ma chongto, “Naqhaikiq she. Kiimaq ümtsaiji akhiisii min naq trankiq. Srea nolabi ka wiita ümniirai shea laüta, Ai chela na walaq. Liilaq, ngi raq Ai chela hokhamwe ka asenginok rai achela ka kiimaq amung ka wiita ümjaq khon mong na kuqbaiq kang she.

² Ümniiraq Jeriko chela nai kiiwa hokhamwe ka jamkho riilaü kiikhiisii Ai chela nai ahokhamwe kiimin mirhaü. Shatmaq kiiwa hup asam thun nai atra jam nyamse thun ka, sepat lopi ma namshiq maiqmii raq tsuqphaq wan mimai. Chela jai nünü kiimaq bom hai lanta khe rong laq.”

³ Krai mren, Joshua raq asengi phenlabi tlotli shea raüta, Ai chela ka khatwa miitu rechap sürii wanto. Apaiq raq asengi sreabi phong wa kuilang kuilabi thun hingroqtsam tsea raüta rawa niili tiiwa baiqto.

⁴ Tsangshiq ma akha aming kuqto: “Chela konü siim kiimaq tiipaü lanta khe wan li rong laq. Shatmaq chela maq luhea niika riimak. Lanta chela kra khat ma tiijeshat maq kheli rong laq.

⁵ Ngi raq ngi rai wadamti sreabi kra shea lata, chela mong nünü kiina miwakai. Riita AI chelati raq naishiq kla joho raüla, naishiq ka apha lak na jurai kai kiikha, jai na jang rang laita miju trangkai.

⁶ Naishiq raq tsangshiq ka naishiq jai joho chela maq luhea na saüli misheahokai. Tsangshiq raq naishiq ka kongkhu lak na kiikha, tsangshiq hai ma jurai tiikai nguta mitiima.

⁷ Kiijiishetiq, namshiq ka bom mong kiiwa dong rang lantiishe, chela ka long ronglaq. Lanta chela ka jii ronglaq. Tatiwe namshiq Shiikeawe raq chela ka namshiq ma mikuq.

⁸ Namshiq raq chela ka longwan lot jai, Tatiwe raq aming kuqtaq kra phanphan, chela ka wa maq chaq rong laq. Ara ngi raq namshiq ma aming kuqtiikang.”

⁹ Krai mren, Joshua raq tsangshiq ka tiiwa baiqto. Kiimaq tsangshiq ka wawan raüta, tsangshiq bom hai chang ba kiina tiipaü wanto. Raüta kiimaq khewan lito. Kra bomhai wan chang ba ka Ai chela maq shenyap nünü siim na, Ai nai Bethel chela heawea na riito. Raüta Joshua ka kra rawa piitiip na japto.

¹⁰ Anap ranaiq miishe, Joshua ka ranapchu miili tiidoto. Raüta sreabi thun ka atho na adam triitamto. Raüta apaiq rai Israilnok welabi thun raq phenlabi ka shea raüta Ai chela khat wa wawanto.

¹¹ Raütiishe, phenlabi ka apaiq rai shea raüta, chela na wachang kilü ajongkaü tiithi nünü kiina wawanto. Raüta hiqkhu nü tiithi na tsangshiq piitiip ka teito. Raüta tsangshiq nai Ai chela heawea niika jüwii raq traishat riito.

¹² Apaiq raq sreabi hingbiingi tin kra shea wan raüta, Ai chela maq shenyap nünü siim kiijaq bom hai raüta, Ai chela nai Bethel chela heawea na tiipaü thüto.

¹³ Rekhatti phenlabi apako piitiip ka Ai chela maq hiqkhu nünü na tiihongto. Kiimaq phenlabi wiijam ka Ai chela maq shenyap nünü siim na tiihongto. Kiimaq Joshua apaiq ka kra rawa hiqthung tan kiijaq japto.

¹⁴ Riita ümtiikiiwa, Ai chela hokhamwe raq Joshua phenlabi phong ka chhitaq, apaiq raq tlothit li she, rechap wanto. Raüta apaiq raq asengi sreabi ka shea raüta, Jordan rai jüwii tan kiina, Israilnok khat kai, kongkhu lak na riikhat raitaq hiq ba kiina johoto. Shatmaq apaiq ka jai nü miishe mikhat wan ngutiika sapmak riito.

¹⁵ Re raq joho tlaq krai mren, Joshua nai asengi sreabi riimin, ngohea dea tsangshiq ka rekhat tangmak raüta pintrang tlo nguta mitiima laq nguta, tsangshiq ka hiqsii thung binjü nünü kiina jutrangto.

¹⁶ Chela wa maiqwere thun kunli ka adam maq Israilnok ka joho raa nguta aming kuqto. Krai mren tsangshiq raq Joshua jai johotlaq krai mren, tsangshiq ka chela maq alu na saühoho she niqhoto.

¹⁷ Ai chela wa maiqwere thun ka wiita, Israilnok jai joho kihoto. Kiimaq chela tiiwong kheti ka jumin ahüshe. Chela kilü thun ka wiita atiidi siisaq riito.

Ai Chela Ka Khat Raüta Jiiwanto

¹⁸ Kiijiishe Tatiwe raq Joshua ma chongto, “Ümjaq na piq sham tlaü kiimaq Ai chela nünü kiina nei laq; ngi raq Ai chela ka ümniima kuqtiikang.” Krai mren, Joshua riimin, apiq ka Ai chela nü na neisaq riito.

¹⁹ Kiimaq apaiq raq ajaq ka ra nü na dotaq krai mren, phenlabi atiipaü araq kiiwa dongchhaq dongrang she riito. Raüta chela mong kiina phong rang nyap wanto. Raüta chela ka long raüta jiiwanto. Raüta tsangshiq raq tlothit li wa maq chaqto.

²⁰ Kiijiishe, Ai chelati raq tsangshiq jai nü na liikiita, wakhuk mong wan ka raham hiqham she chhito. Tsangshiq juchang lam ka ahüshe. Jamkhano ngukla, tsangshiq raq jorat hotaq Israilnok hiqsii thung binjü nü na jutrang tlaq kra, jai na jang rang raütiishe, tsangshiq ka khat wanto.

²¹ Riita Joshua nai asengi raq, akongtibi raq, Ai chela ka khathoto she, kiimaq wa maq chaqbaiqto she nguta chhi raüta, tsangshiq ka jai na tro rang raüta, Ai chelati kra jiip wanto.

²² Kiijiishe, chela khatti Israilnok kriimin, lamhong kiina satho raüta re ka khat wan damto. Krai mren, Ai chelati raq tsangshiq ka trotam maq, Israilnok raq akom baiq wan wishe chhito. Krai mren, tsangshiq ka thumthum jiipbaiqto. Maiq ka weshi min julap mak riito. Kiimaq jumin atra tiichong mak riito.

²³ Shatmaq Ai chela hokhamwe kra lamlamli atra tiichongto. Raüta apaiq ka lap raüta Joshua phana sheahoto.

²⁴ Israilnok raq tsang jaqtinok ka hiqsii ram binjü kiiwa, tsangshiq johoti thun ka wiita tiimiqchup jiipbaiqto. Raüta tsangshiq ka Ai chela na jang wanto. Raüta maiqse angu wiita tiimiqchup jiipbaiqto.

^25-26 Joshua raq apiq ka Ai chela nü na neishat li riito. Kiiwa maiq angu thun ka thumthum mitsat baiq shaq wiiwii, ra na doshat li riito. Ai chelati maiq ümchuwa sitlaq ka wiita jiipbaiqto. Maiq ka waiqwe jechak wiita romshaq hingroqshi ri hingnai tsatbaiqto.

²⁷ Kiimaq Tatiwe raq Joshua ma chongtaq kra phanphan, Israilnok raq Ai chela wa sepat lopi hupsam nai jam nyamse thun ümchuwa laptaq kra tsangshiq maiqmii miitu thühoto.

²⁸ Joshua raq Ai chela ka wa maq bunlak chaqbaiqto. Raüta hiqmiq changkhü ma tiija baiqto. Krai mren, ümchaü niitaq Ai chela ka kiikhiili sitlo.

²⁹ Apaiq raq Ai chela hokhamwe ka pechong na tiishak paqbaiqto. Raüta amaa ka raji na tiisaüli tiipaq shatli riito. Raji, rashe nyap akhing na, Joshua raq amaa ka diibaiq miitu aming kuqto. Raüta chela na nyap wan chang kilamchong phai na tiidobaiqto. Raüta tsangshiq raq long pahea maq rongbaiqto. Kra longrong ka ümchaü niitaq sishatli.

Joshua Raq Mosheq Thungtri Israilnok Ma Phatkuqto

³⁰ Kra raütiishe, Joshua raq Ebal Pum na Tatiwe, Israilnok Shiikeawe ma hongluke miitu, berong-wacha ashi haito.

³¹ Apaiq raq kra berong-wacha ka Tatiwe jaqshise, Mosheq raq Israilnok ma, jamkha haichang ngutiiwa aming kuqtaq, kra phanphan tiihaito. Mosheq raq akuq Thungtri na akha chongtlo: “berong-wacha ka ja ajin maq soqhü longkaü maq haichang.” Kra berong-wacha na tsangshiq raq Tatiwe ma wa na chaq chang honglu thun nai rintii honglu thun min kuqto.

³² Kiijaq Joshua raq, Israilnok maklii na, Mosheq raq akuqthü Thungtri ka longkaü thaq na thok waiqthüto.

³³ Israilnok ka tsangshiq sheati tuwebi, siihiipbi, kiimaq phowebi, kiimaq tsangshiq rai siti pongmungti, thun ka Tongshong Tek siimhapri na len nai na chapto. Tsangshiq ka kra piti lewinok ramwebi ka tsangshiq khaki nü na tiihong raüta chapto. Nokwe khoko kong riika, Gerijim Pum ka tsangshiq jai nü na tiinyi raüta chapto. Kiimaq khoko kongshiti riika, Ebal Pum ka tsangshiq jai nü na tiinyi raüta chapto. Arka, Tatiwe jaqshise Mosheq raq, tsangshiq ma, achu shiiman lap akhing na, akha klo chang nguta aming kuqthütaq kra phan phan klotlo.

³⁴ Kiijiishe, Joshua raq Thungtri raütu thun ka wiita mungmaiqse ma tiihong raüta phatkuqto. Kra phat kuqtaq ka Thungtri lakdam na waiqtaq kra phanphan, ramram raütu nai manson raütu thun wiita nong nong phat kuqto.

³⁵ Joshua raq Mosheq raq awaiq Thungtri aming thun ka poshi min tiikhea mak maq, wiita Israilnoktu thung tlaq kiima phatkuqto. Kra mungmaiqse thungtaq phong niika jechakre, kiimaq nosere, kiimaq Israilnok phong na pongmung maiqse sidamtlaq thun kriimin asi riito.