JOSHUA 18 - ASII LAKDAP Bible (BSI)

Maiqphan Phan Miishi Rii Hiqshong Chumkuqto

¹ Israilnok raq Kanan mung ka kunlishe khatto. Raüta hiqshong thun ka jiiwanto. Raüta tsangshiq ka wiimungtam kunli Shilo chela na thungto. Raüta Tatiwe sichang tombutiip ka haito.

² Kra akhing na tsangshiq rii hiqshong mipheakuq shaqti Israilnok maiqphan ka phan miishi dea asi shaq riito.

³ Kriikha na Joshua raq Israilnok mungmaiqse ma, “Riita namshiq riitiq, namti namwi Tati Shiikeawe raq namshiq ma akuq hiqshong rahai ka, ümtinchoshetiq wa mijii wan han? Jaram wa khesiq holan?

⁴ Namshiq maiqphan ümchuwa sitlan kiiwa, phantek wa maiq wetsam tsam chhaq tsea pha. Lata tsangshiq ka bin ajü thun kra hotwa mitiiwa kang. Kra hotwa tlaq bin ajü thun ka tsangshiq maiqmiimii phan rii hiqshong miraq. Raüta tsangshiq ana ngi phana hali jangkai nong raa.

⁵ Tsangshiq raq hotwa tlaq bin ajü thun kriika tsangshiq liipan na man miishi na chumke chang. Juda phan raq riiwe kla shemai nü wang na misi. Kiimaq Joseph saüse phan ka shekhu nü wang na misi.

⁶ Riita ara hiqtrai wang miishi na raitlan ka, lak na waiq lanta ngi phana lamho ronglaq. Kra riihan la ngi raq lang liilata namshiq miitu Tatiwe nashiq Shiikeawe ma miwaikang.

⁷ Kiitiina, Lewi phan riika, namshiq rai hiqshong ka lap mak miraq. Jamkhano ngukla tsangshiq rii tachong hiqshong ka, tsangshiq raq Tatiwe ramwe jaq sham tlaq kriili she. Kiimahali Gad phan, Reuben phan, kiimaq shedong nü na siti Manase phan miitu hiqshong ka, Jordan rai maq shedong nü wang binjü wa achumke kun she. Tsangshiq ma Tatiwe jaqshise Mosheq raq chumkuqto she.”

⁸ Joshua raq tsangshiq ma bom ka akha chongke jai, kra maiqwetiim ka bin ajü hot wa she wawanto, “Namshiq ka warong laq. Lanta kra bin ajü thun ka samheawiq hotwa rongkiq. Lanta ana ngi phana jangki rongkiq. Kra riihanla, ngi raq Shilo maq langlii lata namshiq miitu, Tatiwe ma miwaiha.”

⁹ Krai mren, maiqwetiim ka binhot wa wanto. Raüta bin ajü thun ka konchi koncha shrira liiwato. Raüta tsangshiq raq hiq hot wataq thun kra, man miishi na chum raüta, hiq rai thun kra aheawiq maq lak na waiqhoto. Manshi rii wang mong na maiqhiq chela sitlaq thun kra samheawiq weaho raüta mangwa raüpot waiqhoto. Raüta tsangshiq ka Joshua phana Shilo piitiip na jangki nongto.

¹⁰ Raüta Joshua raq, tsangshiq miitu langlii raüta Tatiwe ma waito. Raüta Israilnok maiqphan abung tiichongtlaq kriiti ma, tsangshiq rii hiqshong thun ka chumkuqto.

Benjamin Phan Ma Achumkuq Hiqrai

¹¹ Benjamin phan maiqta thun rii hiqshong ka apha shaq shaq chumkuqto. Tsangshiqnok phan rii hiqshong achumkuq kriika Juda phan rii hiqshong nai Joseph saüse phan rii hiqshong heawea na riito.

¹² Tsangshiqnok rii shekhu nünü trai Jordan rai khü maq rai pha wanto. Raüta Jeriko chela maq shekhu nünü kiina kinjam jam binjü kriimaq raiwanto. Raüta shenyap nünü wang kiiniishe ku akin hiq binjü wang binjü miishe raiwanto. Raüta, Bethawen chela tho na kumtsaiphii wang binjü kiiniishe rai wanto.

¹³ Kiimiishe hiqrai ka Luj chela maq shemai nünü siim lamhong hong nü kiina raiwanto. Luj chela ka (Bethel chela ngutiimin ngutlo). Kriimaq lamhong nü na kiho ruq raüta, pum na Lamkiq nüti Beth Horon chela maq hiqmai nü na Ataroth Addar chela kiiniishe raihoto.

¹⁴ Kriimiishe hiqrai ka shenyap nü pum siim armaq hiqmai nünü pum siim kinhong kiiniishe raihoto. Raüta Kiriath Baal chela (riimakla Kiriath Jearim) kiiniishe raihoto. Kra chela ka Juda phan rii hiq rai mong niishe chatlo. Arka Benjaminnok hiqshong shenyap nü hiqrai.

¹⁵ Kiimaq hiqmai nü wang hiqrai ka, Kiriath Jearim chela tho na kinlase kitlaq kriimaq raiho raüta, Nephtoa jurai setiim tsiimnyiim binjü maq raihoto.

¹⁶ Kriimiishe hiqrai ka Pumji nünü kiiniishe sathoto. Raüta Rephaim rai wii mong na Hinnom hiqwii kra phaho chang ba kriijiishe tiisaü hoto. Kriimiishe hali ka Hinnom wii kra phanphan she shemai nünü kiina raiho raüta, Jebusaiqnok kinse maq hiqmai nü na kinlase kriijaq raihoto. Raüta kriimiika Enrogel khamrai se kiinii she raihoto.

¹⁷ Kriimiishe hiqrai ka shekhu nünü na Enshemesh chela kiiniishe raiwanto. Raüta Geliloth chela nü kiiniishe raiwanto. Geliloth chela ka Addulam Kinchit maq khariire na. Kriimiishe hiqrai ka kra kinhong kra sat wan raüta Bohan Longkaü (Bohan ka Reuben se) ngutlaq kiiniishe rai wanto.

¹⁸ Kiimiishe hiqrai ka kinse kriimaq shekhu nü niishe Jordan rai wii tan kra jaqtsi nünü bok na liithüthü raüta raiwanto. Raüta kiimiika tan thung kiiniishe raihoto.

¹⁹ Raüta Beth Hogla chela kinse kriimaq shekhu nünü kiina raiwanto. Raüta Jordan rai supkai chang Amaa Khamjong Chum khupo shekhu nünü ba kriina tiisupto. Arka shemai nü binjü hiqrai.

²⁰ Kiimahali shedong nü hiqrai kriika Jordan rai khü phanphan raito. Ahata Benjamin phan rii tachong hiqshong achumkuq hiqrai longshong.

²¹ Benjamin phan rii tachong hiqshong achumkuq wang binjü na chela thun lomtlaq ka: Jeriko, Beth Hogla, Emek Kejij,

²² Beth Araba, Jemaraim, Bethel,

²³ Awwim, Para, Ophra,

²⁴ Chepharammoni, Ophni, kiimaq Geba chela riito: chela roqshiri anai kra tro binjü wa chela aransetiim romshaq.

²⁵ Kiimahali arthaq chela armin riito: Gibeon, Rama, Beeroth,

²⁶ Mijpa, Chephira, Moja,

²⁷ Rekem, Irpeel, Tarala,

²⁸ Jela, Haeleph, Jebus, (riimakla Jerusalem), Gibea, kiimaq Kiriath Jearim chela thun riito: Chela roqshi ri blai kiimaq kra thun tro binjü na chela ransetiim thun romshaq. Benjamin phan weraü ma achumkuq tachong hiqshong ka rathun ara riito.