JOSHUA 17 - ASII LAKDAP Bible (BSI)

Manase Phan Ma Achumkuq Shenyap Nü Hiqrai

¹ Langraq thaütaq kra phanphan Joshua raq Manase phan ma Jordan rai maq shenyap nü wang binjü kriiwa hiq ka tarü thaq na ajong pinthum chumkuq wanto. Manase ka Joseph se chhikhuwe. Manase se chhikhuwe mang ka Machir. Machir se mang ka Gilead. Machir ka rekhat na nolajong pinthum riito. Joshua raq Machir rii tachong hupsam hiqshong ka kongkhuji miiphü Gilead wang nai Bashan wang binjü kra chumkuq wanto. Ara binjü arka Jordan rai maq shedong nü wang binjü.

² Riita ija, arjaq chongwan tlaq arai mren, Joshua raq Manase saüsetiim wiijamti rii tachong hupsam hiqshong ka Israilnok ahintitiim rai Jordan rai maq shenyap nü wang kiiwa chumkuq wanto. Manase saüsetiim phong wa maiqwe sere ka arthun ara riito: Abiejar, Helok, Ashriel, Shekhem, Hephar, kiimaq Shemida riito. Arthun arka Manase phan kiiwa kaüwa weraü mang ahata. Riita arjaq chong wantiikai, aweraütek miitu tachong hupsam hiqshong ka Jordan rai maq shenyap nü wang wa siisaq chumkuq wanto.

³ Jelophechad ka Hephar se, Hephar ka Gilead se, Gilead ka Machir se, Machir ka Manase se; Jelophechad se ka maiqwe ahü. Jechaksetiim siisaqli. Kra jechaksetiim mang ka: Mahla, Nowaq, Hogla, Milka kiimaq Tirja.

⁴ Kriikha na tsangshiq ka ramwe Eleajar nai Joshua phana kiimaq Israilnok welabi phana wato. Raüta, “Tatiwe raq Mosheq ma, armung hiq wa, hiqshong ka naita naiwii maiqwere ma chumkuqtlaq kiiwa, naishiq miimin chumke chang nguta aming kuqto.” Kiimaq Tatiwe raq aming kuqtaq krai mren, tsangta tsangwii maiqwere sitlaq krai tsangshiq rii min hiqshong ka chumkuqto.

⁵ Kra ningkhan tiina, Manase saüsetiim ma, Jordan rai maq shenyap nü wang binjü wa, Gilead wang nai Bashan wang tiitsuq ma, hiq ka manroqshi hali chumkuqto.

⁶ Jamkhano ngukla tsangshiq ka maiqwesere rii min kiimaq jechaksere rii min hiq ka chumkuqto. Gilead wang ka Manase phan weraü ahinti thun ma chumkuqto.

⁷ Manase phan rii hiqshong achumkuq hiqrai ka Ashar phan ma achumkuq hiqrai kra phanphan maq riita Mikhmethan chela kriimaq rai wan raüta, Shekhem chela maq shedong nü nü kiina rai wanto. Kriimiishe hali shemai nü na raiho raüta Entapuanok hiq kra binjü tiihamtlii rai wanto.

⁸ Tappua chela tro na hiq ka Manase phan rii. Shatmaq hiqtrai na Tappua chela kriika Ephraim saüse phan hiqshong.

⁹ Kriimaq hiq rai ka ahong nü na Kana rai nü niishe raihoto. Riita Kana rai maq shemai nünü binjü na chela thun sitlaq kriika Manase phan rii hiq rai mong na chato. Shatmaq kra chela thun ka Ephraim phan rii she riito. Riita Manase phan rii hiq arka Kana rai khü maq shekhu nü binjü wang kriimaq rai wan raüta, Mediterenian Jüjong kii kiiniishe rai wanto.

¹⁰ Riita Ephraim phan rii hiq kriika shemai nünü wang na. Kiimaq Manase phan rii hiqshong ka shekhu nü nü kiina chato. Kiimaq Mediterenian Jüjong ka tsangshiq noknai ri ma shenyap nü wang trai riito. Kiimaq Ashar phan rii achumkuq hiqrai ka shekhu nü nai shenyap nü na chato. Kiimaq Isakar phan rii achumkuq hiq shong ka shekhu nü nai shedong nü na riito.

¹¹ Isakar phan rii achumkuq hiqrai mong wa nai Ashar phan rii achumkuq hiqrai wang mong kiiwa, Manase phan raq lapwantaq chela thun mang ka arthun ara riito. Beth Shan chela, nai Ibleam chela kiimaq kra chela wiinai tro binjü na sitlaq chela thun kriimin tromsaq na tlom wanto. Kiimaq hali Dor chela (Khamjong chumkii niiti kiimin), Endor chela, Taana chela, Megiddo chela kiimaq kra chela thun tro binjü wa chela aransetiim thun kra tlom wanto.

¹² Shatmaq tiina, Manase phan raq kra chela thun na siti Kanannok ka jobaiq lot mak dea riito. Kriikha na Kanannok ka ümchaü niitaq kiijaq siruqli.

¹³ Kra jaimaq Israilnok ka phung achaq jonglu wantaq akhing niimin, tsangshiq raq Kanannok ka wiita tiisiirai jobaiq lot mak riito. Shatmaq tsangshiq raq Kanannok ka di miishe tiija raüta, tsangshiq jaq tiisham jamsha wanto.

Ephraim Nai Shenyap Wangti Manase Raq Hiq Abiri Jaüto

¹⁴ Joseph saüse phan ka Joshua ma chongto, “Ümniiraq naishiq ma hiqshong ka bashili jam nguto chumkuq laü? Naishiq ka maiq pahea. Jamkhano ngukla Tatiwe raq naishiq ka tere rü atang pahea tiipu kuq wanto.”

¹⁵ Kiijiishe Joshua raq treto, “Riita namshiq ka maiq pahea jiika, ku akin binjü Ephraim phan ma achumkuq ka aranse siim man jiika, Perijaiqnok nai Rephaimnok hiqshong binjü kiina walanta, rum ka shiimsiq warong kiq.”

¹⁶ Tsangshiq raq treto, “Ara ku akin binjü arka aranse. Naishiq ka siimmai. Shatmaq Kanannok hiq thung tan na siti jaq niika jin maq atiiq kumrang leng thun asi. Beth Shan chela, kiimaq kra tro binjü na chela aransetiim thun kiimaq Jejreel rai tan binjü na siti jaq niika asi chhaq siisaq.”

¹⁷ Kiijiishe Joshua raq Ephraim phan ma nai Shenyap nü na siti Manase phan ma, akhiishe chongkuqto, “Tengto. Namshiqnok phannai ri ka maiq pahea dea sitlan. Kiimaq namshiq ka srea nolabi siisaq. Namshiq rii hiqshong ka manshili ka riimak, abi min milap han.

¹⁸ Ku akin wang ka namshiq rii miraq. Kra wang ka bintang rum li jiimin, namshiq raq rum ka shiim lanta, siimko maq riita siimko na saüli tiisii shiim ronglaq. Kiimaq Kanannok sitlaq riiwe kla, tsangshiq jaq na jin maq atiiq kumrang leng asi li jiimin, kiimaq tsangshiq ka ahong alanok li jiimin, namshiq raq mijobaiq lot han.”