Hosea 8 - ASII LAKDAP Bible (BSI)

Tatiwe Raq Israilnok Ka Phra Sumla Noq Kha Tiishuttlo

¹ Tatiwe raq chongtlo, “Lerong tsürong laq. Re dong wanto! Liihawe raq wu phiimtlaq ikha, Re raq isenginok phiimtlo! Tsangshiq raq itongshong jaqkhaq raü chumbaiqto. Tsangshiq raq tongshong tri jinto.

² Israilnok raq, ‘Shiikeawe lei, naishiq raq ümniika asaphai!’ nguta hoqtrang tlo.

³ Israilnok raq ahea lamphan ka shishe baiqto; Chiqse rewe raq tsangshiq ka mikhat wan.

⁴ “Tsangshiq raq hokhambi shong wanto. Shatmaq ngi rai riiwai mak. Tsangshiq ra welabi shong wanto. Shatmaq ngi ma chongmak. Tsangshiq raq kampho nai chaq ngam maq, phra sumla thun tiiq lowanto. Kriika tsangshiq then wan lamtan riito.

⁵ O, Samarianok lei, namshiq raq noq tlan, minsaü pongwe sumla kra, ngi raq pinthum saisi tiikang. Itsankhiqhea tsangshiq ma, wa anyai ikha nyaitlo. Kra ümtincho wa mithaq baiq?

⁶ Arka Israilnok tiiqwe raq atiiq wan. Arka Shiikeawe riimak! Samaria chela na noq tlaq minsaü sumla, bunlak buncha she mitiibun wan.

⁷ Tsangshiq raq alai ka rahai na wan wanto. Krai mren, rathaiq rahai tsi she mijut wan! Piiwong rü ka atsi ango ahü, ajaq lamlam li chaptlo. Tsingo wan raüli jiimin, Pongmungti riili michiiq phaq wan.

⁸ Israilnok ka pongmungti raq jop raüta jok wanto. Abun arki hamtak ikha, athü min ahüshe.

⁹ Tsangshiq raq Asiria tijong howanto, alii arki kumtoq kaü ikha, ashpuq wan maimak. Kiimaq maiqmung ahinti ma, retang kuq ronglaq nguta kampho kuqto.

¹⁰ Shatmaq ümchaü ngi raq tsangshiq ka adam niishe mitriichomha. Lata sintsang ma mitsatha. Asiria hokham ajongwe ka isintsang kii. Tsangshiq ka tsaija chhunja michamchao wan.

¹¹ “Israilnok raq tsangshiq ngarai tiisii miitu, phra sumla apapa shong wanto. Raüta noq wanto. Kriika tsangshiq ngarai tiipa wan li riito.

¹² Ngi raq tsangshiq trantsii wan bomchong, tri raütu pahea khakuq wankang. Shatmaq tsangshiq raq hiqtili ikhli shipoq wanto.

¹³ Tsangshiq raq ngi ka shomnoq wantlo. Raüta honglu ngamrea phaq wantlo. Shatmaq ngi tsangshiq Tatiwe ka, tsangshiq ma tsankhiq. Ümchaü sanha tsangshiq ngarai thop ka, tsangshiq makki niishe michekuqha. Lata tsangshiq ka sintsang miishe mitsatha. Lata Ejip mung niishe mijobaiq nongha!

¹⁴ Israilnok raq tsangshiq sichang jam ka, hokham jamkaütiim ikha hai wanto. Shatmaq tsangshiq Phansangtiwe ka laqbaiqto. Juda mung raq chela thun tei wanto. Chiqse rewe tiiwong ma, chela tro tam maq kiitelong rukto. Shatmaq ngi raq wa maq michaq baiqha. Tsangshiq hokham jam thun wiita, tsangshiq chela thun butja,” nguta Tatiwe raq ngutlo.