Hosea 5 - ASII LAKDAP Bible (BSI)

Shiikeawe Raq Israil Nai Juda Mung Kha Mipho

¹ “O, ramwebi lei, tairong laq! Israilnok lei tiitsang tairong laq! O, hokhambi lei nitiitsii lanta tai ronglaq. Jamkhano ngukla namshiq khapho akhing saüho tlo she. Namshiq ka Mijpa chela na hiqbikho ma jakilan. Kiimaq Tabor chela na namshiq khup miitu chiiq achan thü wishe.

² Kiimaq namshiq tiithap chang thiikho, Shittim chela na tiije theje she. Shatmaq ngi raq tsangshiq wiita mitsatbaiq wan ha.

³ Ngi raq Israilnok ka juwa asapha. Tsangshiq rilung ka imakki wa tiipaükilot mak. Tsangshiq ka mephe-nyung ma jawanto. Israilnok ka ashe she. Tsangshiq raq ngi shomnoq wan thek mak she,”

⁴ Tsangshiq raq abi ngarai pahea klowanto. Kriiraq tsangshiq ka Shiikeawe phana tiiwa mak shangbaiqto. Tsangshiq raq sumla phra shomnoq tlaq kra, tsangshiq khachang kharü ma jakito, tsangshiq raq Tatiwe ka sapmak laqbaiqto.

⁵ Israilnok shiikong tsii ka tsangshiq shrati saqse, Tsangshiq ngarai thiikho niili dea wanto. Juda mungti kiimin tsangshiq rai khoshi na dea wanto,

⁶ Tsangshiq skusekong nai jamnyamsekong kra tsuqho raüta, Tatiwe ma shomnoqkai nguta kitlo, shatmaq Tatiwe raq, tsangshiq honglu ka tao mak she miraq, apaiq raq tsangshiq ka miimbaiqto.

⁷ Tsangshiq raq Tatiwe kai shishe wanto. Tsangsetiim ka siqphinsekong howanto, tsangsetiim ka Tatiwe rü riimak she. Arkha na tsangshiq nai tsangmung ka Tatiwe raq ashthen she mirbaiq.

Israil Mungti Nai Juda Mung Jaqhea Na Re Midong

⁸ Gibea chela na rechap wan hünong buk ronglaq! Rama chela na redong lerong ka tsü ronglaq. Bethawen chela maq redong chiiriim tlo ronglaq. Benjamin wangti lei re na watlo ronglaq!

⁹ Shiikeawe raq namshiq ma mo tiiho ranaiq akhing ka saüwanto she. Israil mungti tiisiirai she mishthen baiq. Israil mungti lei, arka ngohea shaqshaq mija wan dongdii!

¹⁰ Tatiwe raq ngutlo, “Juda mung welabi khuthaq na itsankhiq hea, Tsangshiq raq Israil mung long wato. Raüta Israil mung hiq nyea wanto. Kriikha na tsangshiq ma itsankhiq hea, mo tiiho jüchhang wa ikha mitiisaüha.

¹¹ Israilnok maiq jaq na pinthum chamchaotlo. Tsanghiq tsangra thun rewe riishe nyeawanto. Jamkhano ngukla tsangshiq raq ngi ka miimthü raüta, athii ahü maiqtijong howanto,

¹² Arkha na ngi raq Israil mung, mishthenha. Liilaq Juda mungti kiimin mishthenha.

¹³ “Israil mung raq tsangshiq ngarai thatsi chhito. Kiimaq Juda mung riimin tsangshiq ngarai homa chhito. Raüta Israil raq Asiria hokham tijong howato. Shatmaq Asiria hokham raq, tsangshiq ngarai tsi ka tiihea lot mak riito.

¹⁴ Jamkhano ngukla, ngi ka hangsi ma jalata, Israil mung ka mikaqha, hangsisetiim ma jalata Juda mung mikaqha, tsangngam ka bunlak buncha mipan phaqha. Inübok wa tsangshiq tiichhii wanti jumin ahü.”

¹⁵ “Ngi raq isenginok mimiimbaiqha, lata tsang ngarai miitu riitsi tsaitsiiq mitiichamchaoha, jursap, chamchaotsi ma tsangtsii lo chhijiiq riila, raüta ngi lo rit wan jiiq riila.”