DUNGWVNC 2 - ASII LAKDAP Bible (BSI)

Mosheq Wüchhi

¹ Ara akhing na maiq weshi Lewi phanwe raq tsangshiqnok phan wa tsang nyung ka lamto.

² Kiimaq tsangnyung raq apaiq ma ase maiqwe se ashi humkuqto. Anyung raq no ka shamheawiq se chhiraüta jipi lütsam na saüli apaü riito.

³ Shatmaq apaiq raq no ka alu paülot mak she riito. Kra ningkhan apaiq raq hongkii ashi tingjang kii maq awai kra kaichangtai maq loto. Raüta kham raq chhemak chang kloto. Raüta apaiq raq no ka kra hongkii mong na tiiweto. Raüta jüraikii na sangphii aluwiq ba na tiiweto.

⁴ Raüta nono ma anyi nyung ka kriimaq phan shi alu lin na chap raüta no ka jamkho jajiiq nguta shrira liito.

⁵ Hokhamwe se jechakse ka kiijaq aju hekai kito. Kra liipan na ajaqshi nyungsetiim ka kra jürai kii na akhumsea riito. Tiidongchhaq miili apaiq raq kra hongkii ka sangphii rü aluwiq ba kiijaq tiiwe raü chhito. Kiimaq apaiq raq adi nyung jechakse ashi ka tiiki raüta kra hongkii ka tlam kito.

⁶ Kra hokhamse jun rii nyung raq alin riito. Kiimaq no nose tiibum raü kra chhito. Kra nono ka aho rai riito. Kiimaq nono ma atsanbi tsito. “Arka Hibrunok setiim phong wa ashi ahata,” nguta nguto.

⁷ Kiijiishe nono ma anyi raq kriinyung ma, “Ngi raq nono ara boq pum ma Hibrunok nyung ashi rit wa phajo?” nguta waito.

⁸ “Ahea ritwakiq,” nguta apaiq raq treto. Krai mren kra jechakse ka wa raüta nono se ma anyung kra shea wato.

⁹ Kiijiishe hokham junriise raq jechak nyung kiima nguto, “Ara nonose ara boq wan laq. Laüta ngi miitu tiijong boqkuq laq. Ngi raq ümniima jaq maq mikuq kang.” Krai mren apaiq raq noshii ka boq wanto. Raüta tiichhan chhito.

¹⁰ Kra jai miishe nonose ka jong wan raüta, alashe na, kriinyung raq no ka hokham nyung se ma kuq kito kiimaq apaiq raq no ka ase ma dunghiqto. Kriinyung raq nguto, “Ngi raq apaiq ka khamchum mong wa dowan kang. Kriikha maq apaiq ka Mosheq nguta mang tiikang.”

Mosheq Ka Midian Mung Na Juto

¹¹ Ümtiikiiwa Mosheq ka maiqla she riitaq, apaiq ka maiqmiinok ahiq Hibrunok rai riihumkai kihoto. Tsangshiq nok ka ningkun maq shiitep raüta jaqsham henghea tiishamtlaq kra apaiq raq chhito. Kiimaq apaiq raq Ejipnok maiq weshi raq Hibruwe, Mosheq apaiq kra nok phan maiq weshi tseabaiq kra chhito.

¹² Mosheq raq apaiq tro na tro tri liito. Kiimaq apaiq chhiti ka jumin ahü chhi raüta apaiq raq Ejip mungtiwe ka tsatto. Raüta amaa ka kumtsaiphii na lapbaiqto.

¹³ Kriimaq napjai ranaiq she hali apaiq ka jangkinongto. Kiimaq Hibru wenai ka tatso riibuk sea chhito. Apaiq raq juwa ashut we kriima, “Ümniiraq maiqmii Hibrunok phan ka jam nguto tsat tlaü?” nguta tiiwinto.

¹⁴ Kriiwe raq treto, “Naishiq thaq na ümniika tuwe ma nai phowe ma juro shongta? Ümniiraq Ejip mungtiwe tsatbaiq laü kiikha ngi armin tsea baiq shea dantlaü?” Kiijiishe Mosheq ka ahai riito. Kiimaq apaiq nai apaiq she tiingoto, “Ngi raq jamlai wa klo kang kra maiq riishe sapto.”

^15-16 Ümtiikiiwa hokhamwe raq mra pintaq tho ka laptaq, apaiq raq Mosheq ka atiitsea baiq tanto. Shatmaq Mosheq ka juto. Raüta Midian mung na sikai kihoto. Ranaiqshi Mosheq ka khappong tho na anga raü riito. Kiijaq Midian Mung na siti ramwe Jethro setiim jechaksere nyung miishi ka khappong wa kham khu raüta awe sku kong nai chhechhi kong ma tiinyang miitu long pinkhü thun kra kham maq tiimakai saükito.

¹⁷ Shatmaq sku rümti maiqwere wiijamti raq Jethrosetiim ka ajo riibaiqto. Kiijiishe Mosheq ka kiraüta tsangshiq ka tiiwongkuqto. Raüta apaiq raq tsangshiq nyamse kong ma kham ka tiinyangto.

¹⁸ Ümtiikiiwa tsangshiq ka awe pha niishe jang wantaq, apaiq raq tsangshiq ma waito, “Namshiq ka ümchaü ranaiq jam nguto jaqlose li jang wan lan?”

¹⁹ “Ejip mungti maiq weshi raq naishiq ka sku rümti kong jaq wa tiiwong kuqto, Kiimaq apaiq raq kham kiimin khu raüta nashiq nyamse kong ma tiinyangto,” nguta tsangshiq raq treto.

²⁰ “Apaiq ka ümbano?” nguta apaiq raq asetiim ma waito. “Namshiq raq apaiq ka kiijiili jamto baiqthü lan? Kironglaq. Lanta apaiq ka ana nashiq rai dung misiq walaq heaki rongkiq.”

²¹ Krai mren Mosheq ka kiijaq sidam miitu kiq rito. Kiimaq Jethro raq apaiq ma ase Jippora ka tiiwato.

²² Kriinyung raq apaiq ma ase ashi humkuqto. Kiimaq Mosheq raq apaiq nai apaiq akha tiingoto, “Ngi ka armung na wanshawe. Kra ningkhan apaiq ka Gershom,” nguta mimangha nguta nguto.

²³ Rawii luhea sijai she Ejip mung hokhamwe ka tsaito. Shatmaq Israilnok ka maiq dikong maiq jaqkhon mong na kai chamchao kharü mong na ahan anyi li sitlo. Kiimaq khrum jaü kai aho asii sito. Tsangshiq hoqsii trang ka Shiikeawe niki na saüto.

²⁴ Apaiq raq tsangshiq hansiitrang tra kra taito. Kiimaq apaiq raq Abraham rai, Isak rai, kiimaq Jakob rai tongshong wantaq kra tsan na tiitsangto.

²⁵ Apaiq raq Israilnok maiqdikong ma jaraüta chamchaotlaq kra chhito. Kiimaq tsangshiq miitu atsan tsito.