DUNGWVNC 13 - ASII LAKDAP Bible (BSI)

Chhikhu Setiim Tatiwe Ma Kiinongke

¹ Tatiwe raq Mosheq ma nguto,

² “Chhikhu setiim maiqwe sere tlotli ka Ngi ma kiinong kuqlaq. Jamkhano ngukla Israilnok sere chhikhu setiim loweatek kra kiimaq nyamse chhikhu nyungtlaq loweatek thun kriika Ngi rii.”

Pi Maq Shohü Winsii Phaq Poi

³ Mosheq raq mungmaiqse ma nguto, “Ümchaü ranaiq ara tsan na tiitsang ronglaq. Namshiq ka Ejip mung wa laü wan lan ranaiq kra. Namshiq ka maiq dikong ma jalanta silan mung kra. Ara ümchaü ranaiq akhing na Tatiwe raq apaiq ningkun jonghea wokhong maq namshiq ka tsuq wanto. Ümchaü ranaiq akhing na Pi maq shoje winsii phaq maimak.

⁴ Namshiq raq Ejip mung ka ümchaü ranaiq Abib jipi lüwa jiha ranaiq shi angu na laü wantlan.

⁵ Tatiwe raq namtitiim ma sinkham khoq ramkii maq kha raüta, Kanannok hiq, Hitaiqnok hiq, Amoraiqnok hiq, Hiwaiqnok hiq, kiimaq Jebusaiqnok hiq kra namshiq ma mikuqha nguta kiqkham kuqto. Ümtiikiiwa apaiq raq namshiq ka kra hiqpo hiqwin mung kiina shea wan raüla, namshiq raq ara poi arka rawiitek rawii phawan jipi lü na klo lanta lang wan ratlo.

⁶ Ra miishi na saüli namshiq raq winsii ka pi maq shohü maq phaqsea ratlo. Kiimaq ra miishi ranaiq angu na Tatiwe shreng poi klo ratlo.

⁷ Ra miishi na saüli namshiq raq winsii ka pi maq shoje ka nü na thü maimak. Nam mung na pida ngutiika apun min thü raamak. Riimakla pi maq shoje winsii ka apun min thü maimak.

⁸ Ümtiikiiwa poi ka phahotlan, kiitiikaq namsetiim ma chongkuq ronglaq, arka namshiq raq Ejip mung wa laü wan lan akhing na Tatiwe raq jamkho jaq shamkuqtaq kra miitu klo tiikai nguta chongkuq ronglaq.”

⁹ Ara poi lang wan tlan arka namshiq ma tsan na tiitsang wan miitu jaq na jaqkhaq raü apaq ikha riimakla nam khakam na phanshi ra atiipakuq ikha miraq. Ara poi klotlan ara lümaq namshiq ma Tatiwe Thungtri raütu kra riishrii maq phat wan nong miitu kiimaq atsaü maq sidi raüta phat wan miitu akhing lam wan ashi miraq. Jamkhano ngukla Tatiwe raq apaiq ningkun jonghea maq namshiq ka Ejip mung wa tsuq wanto.

¹⁰ Ara poi ka rawiitek riikhaqli rahiq jipi akhingtek na lang wan lili ronglaq.

Chhikhuse

¹¹ “Tatiwe raq namshiq ma nai namtitiim ma Kanan mung ka mikuqha nguta sinkham kuqtaq kra mung na namshiq ka mitsuq wan. Ümtiikiiwa kra mung ka namshiq ma kuqtlaq,

¹² namshiq raq nyamse chhikhu pongse nyungtlaq kra Tatiwe ma kiinongke ratlo. Nam nyamse chhikhu nyungtlaq loweatek kriika Tatiwe rii.

¹³ Shatmaq namshiq raq apaiq jaq wa kumtoq apong se chhikhu nyungtlaq loweatek kriika skuse ashi honglu na takuq lanta apaiq jaq wa atiijang riwan nong raatlo. Kiimaq kumtoqse ka apaiq jaq wa arithü nong romaü jiila, adangkong ka tiingoq buklaq. Kiimaq ümniiraq ümse maiqwese chhikhuwe rawii chhitlaq loweatek ka apaiq jaq wa atiijang ri wan raa dongdii.

¹⁴ Rawiichii pat na ümse maiqwese raq ara poi lang tiikai arka jamlai liichum wiinya nguta wai raüla, ümniiraq apaiq ma akha bom ka mitre haü, ‘Tatiwe raq apaiq ningkun jonghea wokhong maq, nashiq ka Ejip mung na maiq dikong sikai kriiwa ana tsuq wanto.

¹⁵ Ejip mung hokhamwe tsantsii ka wanshak shak riito. Kiimaq nashiqnok ka tlaü wan mak ningtangto. Kiijiishe Tatiwe raq Ejip mung wa chhikhuse humtlaq loweatek kra maiqwe se lo kiimaq nyamse lo thun kra wiita tsat baiqto. Kra ningkhan nashiq raq nyamse chhikhuse nyungtlaq loweatek kra Tatiwe ma honglu na takuq tiikai. Shatmaq nasetiim chhikhusetiim ka apaiq jaq wa ari laita tiijang wan nong tiikai.

¹⁶ Ara poi klo tiikai arka nashiq ma tsan na tiitsang wan miitu, najaq dang na jaqkhaq raü atiipakuq ikha. Riimakla nashiq khakam na apaq ikha sitlo. Ara lümaq nashiq raq tsan na tiitsang wan tiikai Tatiwe raq apaiq ningkun jonghea maq nashiq ka Ejip mung wa tsuq wanto nguta takwan tiikai.’”

Phum Kham Kaü Nai Walütu Kham Kaü

¹⁷ Ümtiikiiwa Ejip mung hokhamwe raq Israilnok ka tiiwa baiqtaq, Shiikeawe raq tsangshiq ka Philistain mung khamjong chumkii lam maq shea wan mak riito. Kra lam ka aje pinthum shatmaq. Shiikeawe raq akha tiimato, “Ngi raq Israilnok raq tsangshiq tsantsii klai kai ka lungwii mang. Raüta Ejip mung na tiijang kainong ka romang. Arka tsangshiq raq re rai riikhat wan chang kra chhi raüta mitiima.”

¹⁸ Kra rii na, apaiq raq tsangshiq ka konchi koncha lam luwiq kumtsaiphii rumnyangkhi Khamshii Khamjong chum lam nü maq shea wanto. Israilnok ka re rai riikhat miitu khekham wiihup wiisam wawanto.

¹⁹ Mosheq raq Joseph maa ka lamto. Raüta apaiq rai howan damto. Arka Joseph raq Israilnok ma sin tiikham raüta chongtaq kra phan phan kloto. Joseph raq akha nguto, “Ümtiikiiwa Shiikeawe raq namshiq ka tiichhii wanjiiq, namshiq raq imaa ka arba wa namshiq rai adam pi wan ratlo.”

²⁰ Israilnok raq lamjap wantaq Sukkoth hiq kiiwa tiido wanto. Raütiishe kumtsaiphii wang na saü wan ni ni na Etham hiq kiijiishe tsangshiq lamjap piitiip ka teito.

²¹ Ranaiq bala niika Tatiwe ka phum kham kaü ma ja raüta tsangshiq khaki na lamshea wawantlo. Raüta tsangshiq ma lam ka tiichhi kuq raüta, shea wantlo, kiimaq rawa niika walütu khamchong ma ja raüta, tsangshiq ma sinkhu na wawan tlo raüta tsangshiq ma wa tiinii kuq wan raüta shea wantlo. Krai mren tsangshiq ka ranaiq rawa wawan ruqli laü wanto.

²² Phum kham ka wranaiq she ranaiq bala maiq kong kra khaki ki na watlo. Kiimaq rawa bala niika waniitu kham kra tsangshiq khaki na watlo.