DUNGWVNC 11 - ASII LAKDAP Bible (BSI)

Mosheq Raq Chhikhuse Thun Mitsai Nguta Tiitaito

¹ Kiijiishe Tatiwe raq Mosheq ma nguto, “Ngi raq Ejip mung hokhamwe nai asenginok ma imo jangshi li she mitiihoha. Kriijai miitiq apaiq raq namshiq ka mitiiwa. Tengteng, apaiq raq namshiq wiitarü ka arwa ajo mirbaiq.

² Riita ümchaü min Israilnok tarü ma tsangshiq jamthoti chiiti jaq wa chaq nai kampho laktum, miirii thun kra jaü ronglaq nguta chongkuqlaq.”

³ Tatiwe raq Ejip mungti ma Israilnok ka shreng miitu lam atan kewi she. Kriika riikhaqli dea, ajong alabi nai mungmaiqse raq Mosheq ka ajong pinthumwe nguta ngutlo.

⁴ Kiijiishe Mosheq raq hokhamwe ma nguto, “Tatiwe raq ngutlo, ‘Rawa wathung wakham na Ngi ka Ejip mung hamli na mikhumkiha.

⁵ Kiimaq Ejip mung wa chhikhuwe rawü chhiphati ka wiita mijiim, hokhamwe se rawiichii hokham ma jachang kriimaq phaho raüta atijongwe jam na adi nyung tsamthaü longkaü kra troti nyungse miitaq wiita mitsai. Kiimaq minsaü kong wa chhikhuse thun kiimin wiita mitsai.

⁶ Ejip mung tlotli na tiihong raüta maaho maanyi wa trangli she miraq. Atinkhan chamchao ka man niimin ahü riito. Kiimaq jai miimin ahü miraq.

⁷ Shatmaq Israilnok miika jammin ahü, ralang kuku min somak miraq. Kiimaq tsangshiq nyamse kong miimin jamlai atsak agut min ahü miraq. Kiijiishetiq namshiq raq Ngi, Tatiwe raq Ejipnok nai Israilnok liipan na pong na atiitsang lata tseatsiiq tiikang nguta misap han.’”

⁸ Raüta Mosheq raq bom ka akhiishe tiisupto, “Ümsengi ajong alabi thun ka ijichong na waraüta hiq na bum raüta ngi minoq wa. Kiimaq tsangshiq raq ngi nangnga inok ita phan tlotli ka tsuq wantlo laq nguta mitiipaiq nea wa. Kra jai miishetiq ngi ka miwa wanha.” Kiijiishe Mosheq ka akhiq khiqshii miishe hokhamwe khaki wa wanto.

⁹ Tatiwe raq Mosheq ma nguto, “Hokhamwe raq ümbom ka taimak tlea ruqli miraq. Kriika Ngi raq Ejip mung na ijaq sham awang chang ka apapa shamnong miituli miraq.”

¹⁰ Mosheq nai Aron raq arthun awang chang jaqsham ka hokhamwe makki na kloto. Shatmaq Tatiwe raq apaiq tsantsii ka wan shak shak tiitsin baiqto. Kiimaq apaiq raq Israilnok ka apaiq mungtan wa ahin na tlaü wan mak dea ningtangto.