Mattheu 1 - Sesotho 1909/1961 (SO)

Leloko la Jesu Kreste.

¹ Buka ya leloko la Jesu Kreste, mora Davida, mora Abrahama.

² Abrahama a tswala Isaaka; Isaaka a tswala Jakobo; Jakobo a tswala Juda le banababo;

³ Juda a tswala Farese le Sara, ka Thamare; Farese a tswala Esrome; Esrome a tswala Arame;

⁴ Arame a tswala Aminadabe; Aminadabe a tswala Naasone; Nasone a tswala Salmone;

⁵ Salmone a tswala Boase, ka Rahaba; Boase a tswala Obede, ka Ruthe; Obede a tswala Jese;

⁶ Jese a tswala morena Davida.

⁷ Morena Davida a tswala Salome, ka mosadi wa Uria; Salomone a tswala Roboame; Roboame a tswala Abia; Abia a tswala Asa;

⁸ Asa a tswala Josafate; Josafate a tswala Jorame; Jorame a tswala Osiase;

⁹ Osiase a tswala Jothame; Jothame a tswala Akase; Akase a tswala Esekiase;

¹⁰ Esekiase a tswala Manasse; Manasse a tswala Amone; Amone a tswala Josiase;

¹¹ Josiase a tswala Jekonia le banababo, mohla Bajuda ba iswang kgolehong Babilona.

¹² Jekonia a tswala Salathiele, ha setjhaba se se se isitswe Babilona; Salathiele a tswala Sorobabele;

¹³ Sorobabele a tswala Abiude; Abiude a tswala Eliakime; Eliakime a tswala Asore;

¹⁴ Asore a tswala Sadoke; Sadoke a tswala Akime; Akime a tswala Eliude;

¹⁵ Eliude a tswala Eleasare; Eleasare a tswala Matthane; Matthane a tswala Jakobo;

¹⁶ Jakobo a tswala Josefa, monna wa Maria eo Jesu, ya bitswang Kreste, a tswetsweng ke yena.

¹⁷ Mme jwale, ho qala ka Abrahama, ho isa ho Davida, meloko yohle ke meloko e leshome le metso e mene; ho tloha ho Davida ho isa kgolehong ya Babilona, ke meloko e leshome le metso e mene; mme hape, ho tloha kgolehong ya Babilona ho isa ho Jesu Kreste, ke meloko e leshome le metso e mene.

Tswalo ya Jesu Kreste.

¹⁸ Ho tswalwa ha Jesu Kreste ho tlile ka mokgwa ona: Maria, mmae, ha a lebeleditswe ke Josefa, a tshoha a emodisitswe ke matla a Moya o Halalelang, ba eso ho kopane.

¹⁹ Josefa, monna wa hae, kahobane e le motho ya lokileng, mme a sa rate ho mo hobosa, a hopola ho mo lahla ka sephiring.

²⁰ Empa, eitse ha a sa hopotse teng, lengeloi la Morena la mo hlahela ka toro, la re: Josefa, mora Davida, o se ke wa tshaba ho inkela Maria, mosadi wa hao, hobane se emotsweng ke yena, ke sa Moya o Halalelang.

²¹ O tla tswala mora, mme o tla mo rea lebitso la Jesu; hobane ke yena ya tla pholosa setjhaba sa hae dibeng tsa sona.

²² Hoo hohle ho hlahile, hore ho etsahale ho boletsweng ke Morena, ka moporofeta ya itseng:

²³ Bonang, morwetsana o tla emola, a tswale mora, mme lebitso la hae o tla bitswa Emmanuele, ke ho re, ha ho fetolwa, Modimo o na le rona.

²⁴ Yare Josefa ha a tsoha borokong, a etsa kamoo lengeloi la Morena le mo laetseng kateng; a inkela mosadi wa hae;

²⁵ mme ha a ka a mo tseba, a eso ho belehe mora hae wa letsibolo; mme a mo rea lebitso la Jesu.