Jozue 23 - Bibl Koad 21: Ar Bibl e Brezhoneg evit ar Vretoned

Pennad 23 Alioù Jozue da bennoù Israel

¹ Pell amzer goude m'en doa roet an AOTROU diskuizh da Israel eus e holl enebourien a oa en-dro dezhañ, Jozue a oa kozh hag oadet bras,

² ha Jozue a c'halvas holl Israel, e henaourien, e bennoù, e varnerien, e ofiserien, hag e lavaras: Me a zo deuet da vezañ kozh hag oadet bras.

³ Gwelet hoc'h eus kement en deus graet an AOTROU ho Toue d'an holl vroadoù-mañ dirazoc'h, rak an AOTROU ho Toue eo an hini en deus stourmet evidoc'h.

⁴ Gwelit, lodennet em eus deoc'h evel hêrezh, hervez ho meuriadoù, an holl vroadoù a zo chomet adalek ar Jordan, hag an holl vroadoù am eus distrujet betek ar Mor Bras war-zu ar c'huzh-heol.

⁵ An AOTROU ho Toue o diboulzo a-zirazoc'h hag o c'haso kuit dirazoc'h, hag e perc'hennot o bro, evel m'en deus lavaret an AOTROU ho Toue deoc'h.

⁶ Dalc'hit start eta, o virout kement a zo skrivet e levr lezenn Moizez hag oc'h ober dioutañ, ne zistroiot nag a-zehou nag a-gleiz,

⁷ n'en em veskot ket d'ar vroadoù-se a zo chomet en ho touez, ne reot ket meneg eus anvioù o doueoù, ne lakaiot den da douiñ drezo, ne servijot ket anezho, ne stouot ket dirazo.

⁸ En em stagañ a reot ouzh an AOTROU ho Toue, evel ma hoc'h eus graet betek hiziv.

⁹ An AOTROU en deus kaset kuit dirazoc'h broadoù bras ha kreñv, ha den n'en deus dalc'het dirazoc'h betek hiziv.

¹⁰ Unan ac'hanoc'h a redo war-lerc'h mil, rak an AOTROU ho Toue eo an hini a stourm evidoc'h, evel m'en deus lavaret deoc'h.

¹¹ Taolit evezh gant pled ouzh hoc'h eneoù, da garout an AOTROU ho Toue.

¹² Ma en em zistroit ha ma en em stagit ouzh an nemorant eus ar vroadoù-se a zo chomet en ho touez, ma en em unanit dre zimezioù dezho, ma en em veskit ganto hag int ganeoc'h,

¹³ anavezit penaos ne gendalc'ho ket an AOTROU ho Toue da gas kuit ar vroadoù-se dirazoc'h, met bez' e vint evidoc'h ur roued hag ur pech, ur skourjez ouzh ho kostezioù, drein en ho taoulagad, betek ma'z eot da get a-ziwar c'horre ar vro vat-mañ en deus roet deoc'h an AOTROU ho Toue.

¹⁴ Ha setu, mont a ran hiziv dre hent an holl douar. Gouzout a rit eus hoc'h holl galon hag eus hoc'h holl ene, penaos n'eo ket kouezhet ur gomz hepken eus an holl gomzoù mat en deus lavaret evidoc'h an AOTROU ho Toue. Kement tra eo peurc'hraet evidoc'h, n'eo ket kouezhet ur gomz hepken.

¹⁵ Hag evel ma'z eo c'hoarvezet ganeoc'h an holl gomzoù mat en deus lavaret an AOTROU ho Toue, evel-se e lakaio da zont warnoc'h an AOTROU an holl gomzoù fall, betek ma'z eot da get a-ziwar c'horre ar vro vat-mañ en deus roet deoc'h an AOTROU ho Toue.

¹⁶ Mar torrit emglev an AOTROU ho Toue, an hini en deus gourc'hemennet deoc'h, ma kit da servijañ doueoù all ha da stouiñ dirazo, fulor an AOTROU en em dano a-enep deoc'h, hag e varvot buan diwar ar vro vat en deus roet deoc'h.