Adlezenn 33 - Bibl Koad 21: Ar Bibl e Brezhoneg evit ar Vretoned

Pennad 33 Bennozhioù Moizez

¹ Moizez, den Doue, a vennigas mibien Israel dre ar vennozh da heul, kent mervel.

² Lavarout a reas: An AOTROU a zo deuet eus ar Sinai, hag a zo savet a-us dezho e Seir. Lugernet en deus eus menez Paran, deuet eo gant dekviliadoù santel, eus e zehou e teuas evito ul lezenn entanet.

³ Ya, karout a ra ar pobloù, e holl sent a zo ez torn. En em zalc'het int ouzh da dreid, resevet o deus da gomzoù.

⁴ Moizez en deus kemennet deomp al lezenn, hêrezh bodadenn Jakob.

⁵ Bez' eo bet roue e Jeshurun, pa en em zastume pennoù ar bobl, gant meuriadoù Israel.

⁶ Ra vevo Ruben ha ra ne varvo ket, ra vo e dud niverus!

⁷ Ha diwar-benn Juda e lavaras: Selaou, AOTROU, mouezh Juda, degas anezhañ war-zu e bobl. Ra vo galloudus e zaouarn, sikour anezhañ a-enep e enebourien!

⁸ Ha diwar-benn Levi e lavaras: Da Dummim ha da Urim a vo gant an den feal, an hini ac'h eus temptet e Masa, enebet outañ e doureier Meriba,

⁹ hag en deus lavaret eus e dad hag eus e vab: Ne'm eus ket o gwelet; n'en deus ket anavezet e vreudeur, ha n'en deus ket anavezet e vibien. Miret o deus da c'herioù, ha dalc'het da emglev.

¹⁰ Kelenn a raint da varnedigezhioù da Jakob, ha da lezenn da Israel. Lakaat a raint ar c'hwezh-vat dindan da zivfron, hag al loskaberzh war da aoter.

¹¹ O AOTROU, bennig e nerzh, ha degemer labour e zaouarn! Torr lounezhi ar re a sav a-enep dezhañ, ha ra ne adsavo ken ar re a gasa anezhañ.

¹² Ha diwar-benn Benjamin e lavaras: An hini a zo karet-mat gant an AOTROU, a chomo e surentez en e gichen. E c'holoio bemdez, hag en em zalc'ho etre e zivskoaz.

¹³ Ha diwar-benn Jozef e lavaras: E vro a zo benniget gant an AOTROU, gant traoù prizius an neñv, gant ar glizh, gant ar poulloù en traoñ,

¹⁴ gant frouezh prizius an heol, gant an traoù prizius roet pep loariad,

¹⁵ gant traoù mat ar menezioù kozh, gant traoù prizius ar c'hrec'hioù a zo atav amañ,

¹⁶ gant traoù prizius an douar hag e leunder. Madelezh an hini en em ziskouezas er vodenn, ra vo war benn Jozef, ha war glopenn ar re santelaet a-douez e vreudeur.

¹⁷ Bez' en deus kaerded ar c'hentañ-ganet eus e goleoù, e gerniel a zo kerniel ur bual; ganto e vroudo ar pobloù a-gevret, betek pennoù an douar, bez' ez int dekviliadoù Efraim, bez' ez int miliadoù Manase.

¹⁸ Ha diwar-benn Zabulon e lavaras: Laouena Zabulon e-pad da ermaeziadennoù, ha te ivez Isakar ez teltennoù!

¹⁹ Int a galvo ar pobloù d'ar menez, eno e kinnigint aberzhoù a reizhder, dre ma sunint fonnusted ar mor ha teñzorioù kuzhet en traezh.

²⁰ Ha diwar-benn Gad e lavaras: Ra vo benniget an hini a laka Gad er frankiz, diskuizh a ra evel ul leon, hag e freuz ar vrec'h gant ar c'hlopenn.

²¹ Dibabet en deus ar gwellañ evitañ, rak eno e oa kuzhet lodenn al lezenner. Deuet eo gant pennoù ar bobl, graet en deus reizhder an AOTROU, hag e varnedigezhioù e-keñver Israel.

²² Ha diwar-benn Dan e lavaras: Dan a zo ul leon yaouank, lammat a ra eus Basan.

²³ Ha diwar-benn Neftali e lavaras: Neftali, leuniet a vadelezh ha karget a vennozhioù an AOTROU, a berc'henn ar c'huzh-heol hag ar c'hreisteiz.

²⁴ Ha diwar-benn Aser e lavaras: Ra vo benniget Aser gant ar vibien! Ra vo plijus d'e vreudeur, ha ra walc'ho e droad en eoul!

²⁵ Da brennoù a vo a houarn hag a arem, ha da nerzh a bado keit ha da zeizioù.

²⁶ N'eus hini hag a vefe heñvel ouzh Doue Jeshurun, a zeu da'z sikour douget war an neñvoù, ha war e goabrennoù en e veurdez.

²⁷ Ur repu eo an Doue a zo a bep amzer, dindan e zivrec'h peurbadus. Kaset en deus kuit a-zirazout an enebour, hag en deus lavaret: Distruj!

²⁸ Israel a chomo e-unan e surentez, eienenn Jakob, a vo war un douar a winizh hag a win, hag e neñvoù a zivero ar c'hlizhenn.

²⁹ Eürus out, Israel! Piv eo ar bobl a zo heñvel ouzhit, pobl saveteet gant an AOTROU, skoed da sikour, ha kleze da veurded? Da enebourien a vo doñvaet, ha te a vac'ho gant da dreid o lec'hioù uhel.