Adlezenn 31 - Bibl Koad 21: Ar Bibl e Brezhoneg evit ar Vretoned

Pennad 31 Galv Jozue. Al Lezenn lennet. Disentidigezh Israel da zont

¹ Moizez a yeas hag a lavaras ar c'homzoù-mañ da holl Israel:

² Lavarout a reas dezho: Oadet on hiziv a gant ugent vloaz, ne c'hellin ken mont na dont, hag an AOTROU en deus lavaret din: Ne dremeni ket ar Jordan-se.

³ An AOTROU da Zoue a dremeno dirazout hag a zistrujo ar pobloù-se a-zirazout, hag e perc'henni anezho. Jozue a dremeno dirazout, evel m'en deus lavaret an AOTROU.

⁴ An AOTROU a raio dezho evel m'en deus graet da Sihon ha da Og, rouaned an Amoreaned, ha d'o bro, en deus distrujet.

⁵ An AOTROU a lakaio anezho en ho taouarn, hag e reot dezho hervez ar gourc'hemenn am eus roet deoc'h.

⁶ En em galonekait ha bezit kreñv! N'ho pet ket aon ha na vezit ket spontet abalamour dezho, rak an AOTROU da Zoue a gerzho ganit, ne zilaosko ket ac'hanout, ne zilezo ket ac'hanout.

⁷ Moizez a c'halvas Jozue hag a lavaras dezhañ dirak holl Israel: En em galoneka ha bez kreñv! Rak te a yelo gant ar bobl-mañ er vro en deus touet an AOTROU reiñ d'ho tadoù, te a lakaio anezho da berc'hennañ o hêrezh.

⁸ An AOTROU a gerzho dirazout hag a vo ganit, ne zilaosko ket ac'hanout, ne zilezo ket ac'hanout. Na'z pez ket aon ha bez dispont!

⁹ Moizez a skrivas al lezenn-mañ, a roas d'an aberzhourien mibien Levi, ar re a zouge arc'h emglev an AOTROU, ha da holl henaourien Israel.

¹⁰ Moizez a roas urzhioù dezho o lavarout: E diwezh bep seizh vloaz, e-pad lidoù ar bloavezh-ehan, da ouel al logelloù,

¹¹ pa zeuio holl Israel d'en em gavout dirak an AOTROU da Zoue el lec'h en devo dibabet, e lenni al lezenn-mañ dirak holl Israel, hag e klevint.

¹² Dastum ar bobl, gwazed, gwragez, bugale, hag an diavaeziad a vo e-barzh da zorojoù, evit ma klevint ha ma teskint doujañ an AOTROU ho Toue, ha ma virint holl gomzoù al lezenn-mañ ha ma raint diouto.

¹³ Hag o mibien, ar re n'o deus ket bet anaoudegezh, a glevo hag a zesko doujañ an AOTROU ho Toue, e-pad an holl zeizioù ma vevot er vro emaoc'h o vont da berc'hennañ en tu all d'ar Jordan.

¹⁴ An AOTROU a lavaras da Voizez: Setu m'eo tost an deiz ma varvi. Galv Jozue, en em gavit e teltenn an engalv, hag e roin dezhañ va urzhioù. Moizez ha Jozue a yeas d'en em gavout e teltenn an engalv.

¹⁵ An AOTROU a zeuas war wel en ur golonenn a goabrenn hag ar golonenn a goabrenn en em zalc'has ouzh digor an deltenn.

¹⁶ An AOTROU a lavaras da Voizez: Setu, emaout o vont da gousket gant da dadoù. Ar bobl-mañ a savo hag en em roio d'ar gasterezh gant doueoù estren ar vro e-lec'h ma'z eont e-barzh, hag e tilezint ac'hanon hag e torrint va emglev am eus graet ganto.

¹⁷ D'an deiz-se va c'hounnar en em dano a-enep dezho. Me o zilezo hag e kuzhin va dremm. Lonket e vint, hag e c'houzañvint poanioù niverus hag enkrezioù, hag e lavarint en deiz-se: Ha n'eo ket dre ma n'emañ ken hon Doue en hor c'hreiz e c'houzañvomp ar poanioù-mañ?

¹⁸ Hag e kuzhin va dremm an deiz-se, en abeg d'an holl zroug o devo graet o treiñ etrezek doueoù all.

¹⁹ Bremañ, skrivit ar c'hantik-mañ. Kelennit anezhañ da vibien Israel, lakait anezhañ en o genoù, evit ma servijo din ar c'hantik-mañ da dest a-enep mibien Israel.

²⁰ Dre ma renin anezho er vro am eus touet d'o zadoù, ur vro a zever gant laezh ha mel, hag e tebrint hag o devo o gwalc'h hag e vint lart. Neuze en em zistroint war-zu doueoù all, hag e servijint anezho, hag e tisprizint ac'hanon, hag e torrint va emglev.

²¹ Neuze e c'houzañvint poanioù niverus hag enkrezioù, hag e komzo ar c'hantik-mañ evel test en o enep, dre ma ne vo ket ankounac'haet gant genoù o lignez. Rak anavezout a ran o mennozhioù, o deus diskuliet dija hiziv, a-raok ma em eus o derenet d'ar vro am eus touet.

²² En deiz-se e skrivas Moizez ar c'hantik-mañ, hag en kelennas da vibien Israel.

²³ Hag e roas urzhioù da Jozue mab Nun o lavarout: En em galoneka ha bez kreñv! Rak te a zereno mibien Israel d'ar vro am eus touet dezho, ha me a vo ganit.

²⁴ P'en doe echu Moizez da skrivañ komzoù al lezenn-mañ war ul levr, betek an diwezh,

²⁵ e roas ar gourc'hemenn-mañ d'al Levited a zouge arc'h emglev an AOTROU o lavarout:

²⁶ Kemerit levr al lezenn-mañ, lakait anezhañ e-kichen arc'h emglev an AOTROU ho Toue, hag e vo eno evel test a-enep dit,

²⁷ rak anavezout a ran da zisentidigezh ha da c'houzoug reut. Setu, e-pad ma'z on c'hoazh hiziv bev ganeoc'h, ez oc'h disentus ouzh an AOTROU, pegement mui ne viot ket goude va marv!

²⁸ Dastumit davedon holl henaourien ho meuriadoù hag hoc'h ofiserien, hag e lavarin ouzh o divskouarn ar c'homzoù-mañ, hag e kemerin an neñvoù hag an douar da dest en o enep.

²⁹ Rak gouzout a ran penaos, goude va marv, en em vreinot hag e tistroiot diouzh an hent am eus gourc'hemennet deoc'h; hag e c'houzañvot poanioù en deizioù da zont, pa ho po graet ar pezh a zo fall dirak daoulagad an AOTROU, o fuloriñ anezhañ dre oberennoù ho taouarn.

³⁰ Moizez a lavaras ouzh divskouarn holl vodadenn Israel komzoù ar c'hantik-mañ, betek an diwezh: