Adlezenn 27 - Bibl Koad 21: Ar Bibl e Brezhoneg evit ar Vretoned

Pennad 27 Menez Gerizim ha Menez Ebal

¹ Moizez hag henaourien Israel a roas urzhioù d'ar bobl o lavarout: Mirit an holl c'hourc'hemennoù a roan deoc'h hiziv.

² D'an deiz ma tremenot ar Jordan, evit mont d'ar vro a ro deoc'h an AOTROU ho Toue, e savi mein bras hag e lifri anezho gant raz.

³ Skrivañ a ri warno holl gomzoù al lezenn-mañ pa dremeni evit mont d'ar vro a ro dit an AOTROU da Zoue, ur vro a zever gant laezh ha mel, evel m'en deus lavaret dit an AOTROU, Doue da dadoù.

⁴ Pa ho po tremenet ar Jordan, e savot ar vein-se a c'hourc'hemennan deoc'h hiziv war Venez Ebal, hag e lifri anezho gant raz.

⁵ Hag e savi eno un aoter d'an AOTROU da Zoue, un aoter vein, ha ne stoko ket an houarn outo.

⁶ Sevel a ri aoter an AOTROU da Zoue gant mein diaoz, hag e kinnigi warni loskaberzhoù d'an AOTROU da Zoue.

⁷ Kinnig a ri aberzhoù a drugarekadennoù, hag e tebri eno, hag e laouenai dirak an AOTROU da Zoue.

⁸ Skrivañ a ri war ar vein holl gomzoù al lezenn-mañ, o verkañ anezho mat.

⁹ Moizez hag an aberzhourien, al Levited, a gomzas ouzh holl Israel o lavarout: Tav ha selaou, Israel! Deuet out hiziv da vezañ pobl an AOTROU da Zoue.

¹⁰ Sentiñ a ri ouzh mouezh an AOTROU da Zoue, hag e ri diouzh e c'hourc'hemennoù hag e reolennoù a gelennan dit hiziv.

¹¹ En deiz-se, Moizez a roas urzhioù d'ar bobl o lavarout:

¹² Pa ho po tremenet ar Jordan, en em zalc'ho Simeon, Levi, Juda, Isakar, Jozef ha Benjamin war Venez Gerizim evit bennigañ ar bobl,

¹³ hag en em zalc'ho Ruben, Gad, Aser, Zabulon, Dan ha Neftali war Venez Ebal evit milligañ.

¹⁴ Al Levited a gomzo hag a lavaro a vouezh uhel da holl dud Israel:

¹⁵ Milliget ra vo an den a ra ur skeudenn gizellet pe teuzet, a zo un euzhusted d'an AOTROU, labour daouarn ur micherour a laka anezhi en ul lec'h kuzh! Hag an holl bobl a responto o lavarout: Amen!

¹⁶ Milliget ra vo an hini a zispriz e dad hag e vamm! Hag an holl bobl a lavaro: Amen!

¹⁷ Milliget ra vo an hini a zilec'h bonn e nesañ! Hag an holl bobl a lavaro: Amen!

¹⁸ Milliget ra vo an hini a ra d'an dall en em goll en hent! Hag an holl bobl a lavaro: Amen!

¹⁹ Milliget ra vo an hini a gemm barnedigezh un diavaeziad, un emzivad, un intañvez! Hag an holl bobl a lavaro: Amen!

²⁰ Milliget ra vo an hini a gousk gant gwreg e dad, dre ma tizolo pallenn e dad! Hag an holl bobl a lavaro: Amen!

²¹ Milliget ra vo an hini a gousk gant ul loen bennak! Hag an holl bobl a lavaro: Amen!

²² Milliget ra vo an hini a gousk gant e c'hoar, merc'h e dad pe merc'h e vamm! Hag an holl bobl a lavaro: Amen!

²³ Milliget ra vo an hini a gousk gant e vamm-gaer! Hag an holl bobl a lavaro: Amen!

²⁴ Milliget ra vo an hini a sko gant e nesañ e kuzh! Hag an holl bobl a lavaro: Amen!

²⁵ Milliget ra vo an hini a zegemer un donezon evit skuilhañ gwad un ene didamall! Hag an holl bobl a lavaro: Amen!

²⁶ Milliget ra vo an hini na beurc'hraio ket komzoù al lezenn-mañ ha na raio ket diouto! Hag an holl bobl a lavaro: Amen!