Adlezenn 18 - Bibl Koad 21: Ar Bibl e Brezhoneg evit ar Vretoned

Pennad 18 Gwirioù an aberzhourien hag al Levited. Traoù euzhus. Ar profed.

¹ An aberzhourien, al Levited, hag holl veuriad Levi, n'o devo na lodenn na hêrezh gant Israel; debriñ a raint eus ar profoù graet dre an tan d'an AOTROU hag eus e hêrezh.

² N'o devo ket hêrezh e-touez o breudeur, an AOTROU eo o hêrezh, evel m'en deus lavaret dezho.

³ Setu amañ gwirioù an aberzhourien digant ar bobl, digant ar re a ginnig un aberzh, pe kole pe oan, roet e vo d'an aberzhour ar skoaz, an div javed, ar c'hof,

⁴ roet e vo dezhañ ivez frouezh kentañ da winizh, da win ha da eoul, ha touz kentañ da zeñved,

⁵ rak an AOTROU da Zoue en deus dibabet anezhañ a-douez da holl veuriadoù evit en em zerc'hel da servijañ en anv an AOTROU, eñ hag e vibien, da viken.

⁶ Pa'z aio ul Leviad eus unan eus da zorojoù, eus al lec'h ma vo o chom en Israel, ha ma teuio, hervez c'hoant e ene, el lec'h en devo dibabet an AOTROU,

⁷ ha m'en em zalc'ho da servijañ en anv an AOTROU da Zoue, evel e holl vreudeur Levited oc'h en em zerc'hel eno dirak an AOTROU,

⁸ e resevo evit boued ul lodenn heñvel ouzh hini ar re all, ouzhpenn ar pezh a c'hellfe bezañ gwerzhet eus madoù e dadoù.

⁹ Pa vi aet er vro a ro dit an AOTROU da Zoue, ne zeski ket ober traoù heñvel ouzh euzhusted ar pobloù-se.

¹⁰ N'en em gavo den ez touez a lakaio e vab pe e verc'h da dremen dre an tan, nag a raio divinerezh, nag hudsteredour, nag achantour, na sorserez,

¹¹ na strobineller, na goulennataer speredoù, na sorser, nag igromañser,

¹² rak piv bennak a ra an traoù-se a zo un euzhusted d'an AOTROU, hag abalamour d'an traoù euzhus-se o c'haso kuit an AOTROU da Zoue a-zirazout.

¹³ Peurvat e vi e-keñver an AOTROU da Zoue.

¹⁴ Rak ar broadoù-se, a gasi kuit, a selaou ouzh an hudsteredourien hag ouzh an divinourien; met dit-te, n'out ket aotreet gant an AOTROU da Zoue.

¹⁵ An AOTROU da Zoue a savo dit eus da greiz, a-douez da vreudeur, ur profed eveldon, hag e selaouot anezhañ,

¹⁶ hervez kement az poa goulennet digant an AOTROU da Zoue en Horeb da zeiz ar vodadeg, pa lavarjout: Ra ne glevin ken mouezh an AOTROU va Doue ha ra ne welin ken an tan bras-se, gant aon na varvin.

¹⁷ An AOTROU a lavaras: Komzet mat o deus.

¹⁸ Me a savo dezho ur profed eveldout a-douez o breudeur, hag e lakain va c'homzoù en e c'henoù, hag e lavaro dezho kement a gemennin dezhañ.

¹⁹ Hag e c'hoarvezo penaos piv bennak na selaouo ket va c'homzoù a lavaro em anv, me a c'houlenno kont digantañ.

²⁰ Met ar profed a vo rok a-walc'h da lavarout em anv un dra bennak n'am befe ket gourc'hemennet dezhañ lavarout, pe a gomzfe en anv doueoù all, ar profed-se a varvo.

²¹ Mar lavarez ez kalon: Penaos ec'h anavezimp ar gomz ha n'eo ket bet lavaret gant an AOTROU?

²² Pa gomzo ur profed en anv an AOTROU, ha na vo ket ar pezh an devo lavaret, na c'hoarvezo ket, kement-se a vo ur gomz n'en devo ket lavaret an AOTROU. Ar profed en devo komzet gant rogoni; na'z po ket aon outañ.