Adlezenn 14 - Bibl Koad 21: Ar Bibl e Brezhoneg evit ar Vretoned

Pennad 14 Loened glan ha dic'hlan. An deog

¹ Mibien an AOTROU ho Toue emaoc'h-c'hwi. N'en em reot flañch ebet ha n'en em douzot ket etre ho taoulagad evit unan marv.

² Rak ur bobl santel ez out evit an AOTROU da Zoue. An AOTROU da Zoue en deus da zibabet evit ma vi dezhañ ur bobl ispisial, a-douez an holl bobloù a zo war-c'horre an douar.

³ Ne zebri netra euzhus.

⁴ Setu amañ al loened a zebrot: an ejen, an dañvad, ar c'havr,

⁵ ar c'harv, ar c'hazelenn, an demm, ar c'hragvouc'h, an heizez, ar bual, ar yourc'h.

⁶ Kement loen a zo faoutet e garn, forc'hek e droad, hag a zaskir e-touez an anevaled, a zebrot.

⁷ Koulskoude, a-douez ar re a zaskir pe a-douez ar re a zo faoutet o c'harn pe a-douez ar re a zo forchek o zroad, ne zebrot ket ar c'hañval, ar c'had hag ar c'honikl, rak daskiriat a reont met n'eo ket faouted o c'harn, dic'hlan e vint evidoc'h,

⁸ hag ar moc'h rak faoutet eo e garm met ne zaskir ket, dic'hlan e vo evidoc'h. Ne zebrot ket eus o c'hig ha ne stokot ket ouzh o c'horfoù marv.

⁹ Setu amañ ar re a zebrot a-douez ar pezh a zo en doureier. Kement en deus angelloù ha skant a zebrot.

¹⁰ Koulskoude, ar re n'o deus na angelloù na skant ne zebrot ket, dic'hlan e vint evidoc'h.

¹¹ Kement labous glan a zebrot.

¹² Setu amañ ar re na zebrot ket: an erer, ar grifon, an erer-spluj,

¹³ ar gup, ar barged, ar bultur hag e rumm,

¹⁴ ar vran hag hec'h holl rummoù,

¹⁵ ar struskañval, an toud, ar skrav, ar sparfell hag he rumm,

¹⁶ an hoper-noz, ar gaouenn, an alarc'h,

¹⁷ ar pilikant, ar morvaout, ar vorvran,

¹⁸ ar c'hwibon, ar gerc'heiz hag he rumm, an houperig hag al logodenn-dall.

¹⁹ Pep loen a ruz hag a nij a vo un euzhusted evidoc'h, ne zebrot ket diouto.

²⁰ Kement labous glan a zebrot.

²¹ Ne zebrot ket ul loen marvet anezhañ e-unan; e reiñ a ri d'an diavaeziad a vo e-barzh da zorojoù hag eñ en debro, pe en gwerzhi d'un diavaeziad, rak ur bobl santel ez out evit an AOTROU da Zoue. Ne boazhi ket ar menn-gavr e laezh e vamm.

²² Ne vanki ket da reiñ an deog eus an holl frouezh taolet diwar da had, eus ar pezh a denni eus da bark, bep bloaz.

²³ Hag e tebri dirak an AOTROU da Zoue, el lec'h en devo dibabet evit lakaat e anv da chom ennañ, deog da winizh, da win ha da eoul, ha re gentañ-ganet da loened bras ha da loened bihan, evit ma teski doujañ atav an AOTROU da Zoue.

²⁴ Mard eo re hir evidout an hent, p'en devo da venniget an AOTROU da Zoue, en doare na c'helli ket dougen kement-se, dre ma vo re bell al lec'h dibabet gant an AOTROU da Zoue evit lakaat e anv da chom ennañ,

²⁵ neuze, e troki anezho en arc'hant hag e serri an arc'hant ez torn. Mont a ri d'al lec'h en devo dibabet an AOTROU da Zoue,

²⁶ hag e roi an arc'hant en trok eus kement a c'hoantaio da ene, loened bras pe bihan, gwin, evajoù kreñv, hervez c'hoantoù da ene e tebri dirak an AOTROU da Zoue, hag e laouenai, te ha da diegezh.

²⁷ Ne zilezi ket al Leviad a vo e-barzh da zorojoù, rak n'en deus na lodenn na hêrezh ganit.

²⁸ A-benn tri bloaz, e tenni holl zeog da leve eus ar bloavezh-se hag e lakai anezhañ e-barzh da zorojoù.

²⁹ Dont a raio al Leviad, n'en deus na lodenn na hêrezh ganit, an diavaeziad, an emzivad hag an intañvez a vo e-barzh da zorojoù, hag e tebrint hag o devo o gwalc'h, evit ma vennigo ac'hanout an AOTROU da Zoue e kement labour a ri gant da zaouarn.