2 Samuel 17 - Bibl Koad 21: Ar Bibl e Brezhoneg evit ar Vretoned

Pennad 17

¹ Goude-se e lavaras Akitofel da Absalom: Dibab a rin bremañ daouzek mil den, hag e savin, hag e redin war-lerc'h David en noz-mañ.

² Hag en em daolin warnañ e-pad ma'z eo skuizh ha ma'z eo dinerzhet e zaouarn, hag e spouronin anezhañ, e doare ma tec'ho an holl bobl a zo gantañ. Hag e skoin war ar roue hepken.

³ Hag e lakain an holl bobl da zistreiñ ouzhit: an den a glaskez a dalvez kement ha distro an holl ouzhit, hag evel-se an holl bobl a vo e peoc'h.

⁴ Ar c'huzul-se a oa kavet mat gant Absalom ha gant holl henaourien Israel.

⁵ Met Absalom a lavaras: Ra vo galvet ivez Hushai an Arkiad, ma klevimp ar pezh a lavaro, eñ ivez.

⁶ Hushai a zeuas da gavout Absalom, hag Absalom a gomzas outañ o lavarout: Roet en deus Akitofel un hevelep kuzul. Ha graet e vo ar pezh en deus lavaret pe nann? Komz-te.

⁷ Hushai a lavaras da Absalom: Ar c'huzul en deus roet Akitofel ar wech-mañ n'eo ket mat.

⁸ Hag Hushai a lavaras: Anavezout a rez da dad hag e dud, tud kadarn ez int, o c'halon a zo c'hwerv, evel un arzhez a vefe kemeret he reoù vihan diganti er parkeier. Ha da dad a zo un den a vrezel na dremeno ket an noz gant ar bobl.

⁹ Setu emañ bremañ kuzhet en ur poull bennak pe en ul lec'h all. Mar c’hoarvezfe e vefemp pilet ganto er penn kentañ, kement hini henn klevo a lavaro: Ar bobl aet war-lerc'h Absalom a zo bet pilet.

¹⁰ Hag an hini kadarnañ, p'en defe ur galon evel kalon ul leon, a deuzo, rak holl Israel a oar ez eo da dad un den kreñv, hag ez eo tud kadarn ar re a zo gantañ.

¹¹ Aliañ a ran neuze ma vefe dastumet holl Israel en-dro dit, adalek Dan betek Beer-Sheba, ken niverus hag an traezh a zo war vord ar mor, ha ma'z afes-te da-unan d'an emgann.

¹² Ni a erruo warnañ el lec'h bennak ma vo, hag en em daolimp warnañ evel ma kouezh ar glizh war an douar. Hag eus an holl dud a zo gantañ, ne vano hini ebet.

¹³ Mar en em denn en ur gêr bennak, holl Israel a zougo kerdin etrezek ar gêr-se, hag he stlejimp betek ar froud, e doare ma ne vo ket kavet zoken ur maen bihan anezhi.

¹⁴ Absalom hag holl dud Israel a lavaras: Kuzul Hushai an Arkiad a zo gwelloc'h eget kuzul Akitofel. Rak an AOTROU en doa divizet lakaat da gouezhañ kuzul Akitofel, hag a oa mat, evit ma teuio an droug war Absalom.

¹⁵ Neuze Hushai a lavaras d'an aberzhourien Zadok hag Abiatar: Akitofel en deus roet ar c'huzul-mañ-kuzul da Absalom ha da henaourien Israel, me am eus roet ar c'huzul-mañ-kuzul.

¹⁶ Bremañ eta kasit buan ha roit da c'houzout da Zavid, ha lavarit dezhañ: Na chom ket da noz e plaenennoù ar gouelec'h, met kae muioc'h a-raok, gant aon na vefe lonket ar roue hag an holl bobl a zo gantañ.

¹⁷ Jonatan hag Akimaaz en em zalc'he en En-Rogel, hag ur vatezh a zeuas da lavarout dezho mont da gomz ouzh ar roue David. Rak eno ne c'hellent ket en em ziskouez en ur vont e kêr.

¹⁸ Met ur paotr a welas anezho hag a lavaras da Absalom. Hag ez ejont o-daou buan, hag e teujont da Vakurim, da di un den en doa ur puñs en e borzh, hag e tiskennjont e-barzh.

¹⁹ Ar wreg a gemeras ur c'holoenn, a astennas war c'horre ar puñs, hag e skuilhas greun pilet eno, e doare ma ne ouied netra.

²⁰ Servijerien Absalom a zeuas da gavout ar wreg-mañ en ti hag a lavaras dezhi: Pelec'h emañ Akimaaz ha Jonatan? Ar vaouez a respontas: Tremenet o deus ar wazh-dour. O vezañ o c'hlasket hep o c'havout, e tistrojont da Jeruzalem.

²¹ Goude ma voent aet kuit, Akimaaz ha Jonatan a bignas eus ar puñs hag a yeas kuit, hag e rojont da c'houzout d'ar roue David o lavarout: Savit hag hastit tremen an dour, rak Akitofel en deus roet ar c'huzul-mañ-kuzul en hoc'h enep.

²² Neuze David hag an holl bobl a oa gantañ a savas hag a dremenas ar Jordan. Ha da c'houloù-deiz ne vane hini ebet ha n'en doa ket tremenet ar Jordan.

²³ Akitofel, o welout ne oa ket graet ar pezh en doa aliet, a zibras e azenn, a savas hag a yeas d'e di en e gêr. Goude m'en doe lakaet urzh en e di, en em grougas hag e varvas. Hag e voe sebeliet e bez e dad.

²⁴ David en em gavas e Mahanaim, hag Absalom a dremenas ar Jordan, eñ hag holl dud Israel gantañ.

²⁵ Absalom a lakaas Amasa da benn an arme e-lec'h Joab. Amasa a oa mab d'un den anvet Jitra an Israelad, a oa aet da gavout Abigail merc'h Nakash, c'hoar Zeruja, mamm Joab.

²⁶ Hag Israel hag Absalom a gampas e bro Galaad.

²⁷ Pa voe erruet David e Mahanaim, Shobi mab Nakash eus Rabba eus mibien Ammon, Makir mab Amiel eus Lodebar, ha Barzilhai ar Galaadad eus Rogelim,

²⁸ a zegasas gweleoù, kibelloù, listri douar, gwinizh, heiz, bleud, greun rostet, fav, piz-rous, boued all rostet,

²⁹ mel, amann, deñved, fourmaj saout, da Zavid ha d'ar bobl a oa gantañ, evit debriñ. Rak lavarout a raent: An dud-mañ o deus naon, skuizh ez int ha sec'hed o deus er gouelec'h-se.