1 Samuel 13 - Bibl Koad 21: Ar Bibl e Brezhoneg evit ar Vretoned

Pennad 13

¹ Saül en doa renet ur bloaz. Ha p'en doe renet daou vloaz war Israel,

² Saül a zibabas tri mil den a-douez Israel. Bez' e oa daou vil gantañ e Mikmash ha war venez Betel, ha mil gant Jonatan e Gibea-Benjamin. Hag e kasas nemorant ar bobl, pep hini d'e deltenn.

³ Jonatan a gannas gwarded ar Filistined a oa e Geba, hag ar Filistined a glevas kement-se. Saül a reas seniñ ar shofar dre an holl vro en ur lavarout: Ra selaouo an Hebreed!

⁴ Evel-se holl Israel a glevas lavarout: Saül en deus kannet gwarded ar Filistined, ha zoken Israel a zo deuet kasaus evit ar Filistined. Ar bobl en em vodas e-kichen Saül e Gilgal.

⁵ Hag ar Filistined en em zastumas evit ober brezel da Israel, gant tregont mil karr ha c'hwec'h mil marc'heger, hag ur bobl niverus evel an traezh a zo war vord ar mor. Pignat a rejont hag e kampjont e Mikmash, ouzh sav-heol Bet-Aven.

⁶ Tud Israel a welas e oant en ur blegenn fall, rak ar bobl a oa spouronet. Ar bobl en em guzhas er c'hevioù, er bodennoù, e-touez ar reier, el lec'hioù kreñv hag er puñsoù.

⁷ Hebreed 'zo hag a dremenas ar Jordan evit mont da vro Gad ha Galaad. Koulskoude Saül a oa c'hoazh e Gilgal, hag an holl bobl a yae war e lerc'h a oa o krenañ.

⁸ Hag e c'hortozas seizh deiz, hervez an amzer merket gant Samuel. Met Samuel ne zeue ket da C'hilgal, hag ar bobl a bellae dioutañ.

⁹ Saül a lavaras: Degasit din ul loskaberzh hag aberzhoù a drugarekadennoù. Hag e kinnigas al loskaberzh.

¹⁰ Adalek m'en doe echuet da ginnig al loskaberzh, setu ec'h erruas Samuel. Saül a yeas war-arbenn dezhañ evit e saludiñ.

¹¹ Samuel a lavaras: Petra ac'h eus graet? Saül a respontas: Pa em eus gwelet e pellae ar bobl diouzhin, ha ne zeues ket d'an deiz merket, hag e oa en em zastumet ar Filistined e Mikmash,

¹² em eus lavaret: Ar Filistined a ziskenno bremañ a-enep din e Gilgal, ha ne'm eus ket pedet an AOTROU . Ha goude bezañ en em zalc'het, em eus kinniget al loskaberzh.

¹³ Neuze Samuel a lavaras da Saül: Graet ec'h eus follentez, ne'c'h eus ket miret ar gourc'hemenn en deus roet dit an AOTROU da Zoue. Rak an AOTROU en dije bremañ startaet da ren war Israel da viken.

¹⁴ Met bremañ da ren ne vo ket padus. An AOTROU en deus klasket dezhañ un den hervez e galon, hag an AOTROU en deus e c'halvet da vezañ rener war e bobl, dre ma ne'c'h eus ket miret ar pezh en doa an AOTROU gourc'hemennet dit.

¹⁵ Ha Samuel a savas hag a bignas eus Gilgal da C'hibea-Benjamin. Saül a niveras ar bobl en em gave gantañ, hag a oa war-dro c'hwec'h kant den.

¹⁶ Saül, e vab Jonatan, hag ar bobl en em gave ganto, en em zalc'he e Gibea-Benjamin, hag a Filistined a oa o kampiñ e Mikmash.

¹⁷ Hag e teuas tri bagad er-maez eus kamp ar Filistined evit ober distruj. Ur bagad a yeas dre hent Ofra, war-zu Shual.

¹⁸ Ur bagad all a yeas dre hent Bet-Horon, hag an trede bagad a yeas dre hent an harz a zo dirak traonienn Zeboim, war-zu ar gouelec'h.

¹⁹ Ne oa gov ebet en holl vro Israel, rak ar Filistined o doa lavaret: Ret eo herzel ouzh an Hebreed d'ober klezeier pe goafioù.

²⁰ Holl Israel a ziskenne da gavout ar Filistined, pep hini evit lemmañ e soc'h, e bigell, e vouc'hal pe e bal,

²¹ ha pa oa togn ar bal, ar bigell, an tridant, pe ar vouc'hal, ha zoken evit dresañ ar broudoù.

²² Hag e c'hoarvezas, da zevezh an emgann, ma ne voe kavet na kleze na goaf e daouarn an holl bobl a oa gant Saül ha Jonatan. Kavet e voe hepken gant Saül ha Jonatan.

²³ Ha gwarded eus ar Filistined a zeuas er-maez betek ode Mikmash.