JOSHUA 18 - BUKUIT NE TILIIL Sireet ne Dutero Kanon

Kepchechin pororyosyek alak emet

¹ Ki iyumgei tuiyet tugul ne po piigap Israel eng' Shiloh ak koteech eng' olooto emait ne kituiyechin. Ki iterteerat anyun emonooto eng' tainnywa.

² Ki ng'et eng' piigap Israel pororyosyek tisabu che kitom kopchei porotennywa.

³ Ara anyun ki leenji `Joshua piigap Israel, “Ogaigei kot kotyanit si onam emet ne ki koonok Kamuktaindet ne Toroor, Kamuktaindetap kwanisyekwok?

⁴ Olewenjigei piik somok eng' pororyet age tugul, si ayookto icheek kong'eetyo kobendat eng' emet asi kosiir ole teptoi porotennywa yeityo kobwa ole ami.

⁵ Ngo pchei koek kebeberwek tisap, ko katebee Judah kiwotennyi eng' murot tai ak ko katebee Joseph kiwotennywa eng' murot kaataam.

⁶ Osir emonooto koek kebeberwek tisap yeityo oibwa siranooto, si aserchinewok parbareek eng' taitap Kamuktaindet ne Toroor, Kamuktaindennyo.

⁷ Amu ma tinyei Lawiik kebeberta eng' kwenung'wong', amu tiseinatetap Kamuktaindet ne Toroor ko porotennywa, ak kigosich Gad ak Reuben ak kebebertap pororyetap Manasseh porotennywa, eng' Jordan pitoniin po kong'asiis, ne ki igoochi `Musa otwogindetap Kamuktaindet ne Toroor.”

⁸ Ara anyun king'eetyo piik ak koba; ak ki iyomis `Joshua piik che kigaba kosiir oleteptoi emet koleenji, “Oba obun emet ak osir oleteptoi yeityo obwa kogeny ole ami, si aserchinewok parbareek eng' yu eng' taitap Kamuktaindet ne Toroor eng' Shiloh.”

⁹ Ki pa anyun pichooto kobun emet ak kosirchi bukuit kobee nganasook koek kebeberwek tisap yeityo kobwa ole mi Joshua eng' nganaseet eng' Shiloh.

¹⁰ Ak ki iser `Joshua parbareek agobo icheek eng' Shiloh eng' taitap Kamuktaindet ne Toroor; Ak kipchechi `Joshua emet piigap Israel ko uu pcheutikwak eng' olooto.

Kooretap Benjamin

¹¹ Ki piit kuraitap pororyetap lagogap Benjamin ko uu ortinwekwak. Ak ki wo kiwotetap parbaryannywa, kwenutap lagogap Judah ak lagogap Joseph.

¹² King'eete kiwotennywa ne po komostap kaataam Jordan ak kitogosta kiwotennywa kobun tabandap Jeriko eng' murot kaataam ak kotogosta kobun emetap tuloonook kotokyigei cherongo. Kimong'ji kiwotennywa surkwen ne po Beth-aben.

¹³ Ki wo kiwoteet eng' olooto agoi Luz, agoi tabandap Luz (nooto ko Bethel), kotokyingei murot tai yeityo kochoortagei kiwoteet kot koit Ataroth-addar, kobun tulweet ne mi komostap tai ne po Beth-horon ne mi ole rektoot.

¹⁴ Yeityo keetil kiwoteet keyiem komostap cherongo ole tokyingei murot tai kong'etee tulweet ne mi taitap Beth-horon ne tokyingei murot tai komong'ji kiwotennyi Kiriath-baal (nooto ko Kiriath-Jearim) nganaseetap lagogap Judah: niito ko ki komostap cherongo.

¹⁵ King'eete murot tai tabandap Kiriath-Jearim, ak kwo kiwoteet kotokyigei cherongo komong'ji kondap peegap Neptoa.

¹⁶ Yeityo kochoortagei kiwoteet agoi tabandap tulweet ne mi taitap atebweetap weeriitap Hinom, ne mi atebweetap Repaik ne tokyingei murot kaataam. Ki choortagei kwo atebweetap Hinom, kot koit tabandap Jebusindet ne tokyingei murot tai ak kochoortagei kwo En-rogelo.

¹⁷ Yeityo kiwech kobun murot kaataam, komong'ji En-semes, kwo Gelilot, ne tokyindos ak ole kitogostoe kebendi Adumim ak kochoortagei agoi koitap Boan weeriitap Reuben,

¹⁸ ak kosiirto kobun tabanda ne tokyingei Arabah murot kaataam ak kochoortagei kot koit Arabah.

¹⁹ Yeityo kwo kiwoteet kobun tabandap Beth-hogla kotokyigei murot kaataam ak komong'ji ole kiluktoegei peek murot kaataam ne po Araraita ne po Munyuk eng' murot tai ye pooch Jordan: niito ko ki kiwootet ne po murot tai.

²⁰ Ki Jordan kiwotennyi eng' komostap kong'asiis. Niito ko ki poroteetap lagogap Benjamin ko uu kiwotosyekyik che ki imut komoswek tugul ko uu ortinwekwak.

²¹ Nganasoogap pororyetap lagogap Benjamin ko uu ortinwekwak ko ki Jeriko, Beth-hogla, ak Emek-kesis;

²² Beth-araba, Semaraim ak Bethel;

²³ Abim, Para ak Ophrah;

²⁴ Keparamoni, Opni ak Geba; nganasook taman ak aeng' kobooto kokwotinwekwak.

²⁵ Gibeon, Ramah ak Beerot,

²⁶ Mispe, Kepira ak Motsa,

²⁷ Rekem, Irpeel ak Tarala;

²⁸ Shelah, Elep ak Jebusindet (nooto ko Jerusalem), Gibeat ak Kiryat. Nganasook taman ak ang'wan kobooto kokwotinwekwak. Niito ko poroteetap lagogap Benjamin ko uu ortinwekwak.