JOEL 2 - BUKUIT NE TILIIL Sireet ne Dutero Kanon

Ng'oiyondit ne nyoonei

¹ Oguut iryageet eng' Zion, ak owaach eng' tulweennyu ne tiliil! Ingobotanso piik tugul che menyei emet, amu nyoonei peetuutap Kamuktaindet ne Toroor, ee kagoriik,

² peetuutap mesundeito ak tuindo, peetuutap poolik ak mesundeito ne nyigiis. Ko uu ye machei koorir emet eng' tuloonook; kabwa lugeet ne oo ak ko kiim, ne ki tomo kobiitu ne uu nooto, ama kobiitu ne uu icheek kogeny, eng' kenyiisyegap ibinwek che chaang'.

³ Amisyei maat eng' tainnywa; ak lalei liplibenetap maat eng' let. Eng' tainnywa ko uu emet mbareetap Eden, ak kagoek surkwen kityo ole po let; ak ma piitu ne kachilile icheek.

⁴ Uu itoondanywa itoondap paraisisyek, ak korwaei ko uu piik che ketei paraisisyek.

⁵ Uu rwaennywa kirgirenetap kariisyegap lugeet rwaei eng' tuloonook parak, uu cheetap liplibenetap maat ne peelei mobeek, uu piik che kiimeen che tetegei eng' pooryeet.

⁶ Pichiityin pororyosyek eng' tainnywa, walaksei togoochigap piik tugul amu kaiyweisyet.

⁷ Ruaei ko uu che nyigoonen; laanyei irimeet ko uu piigap lugeet; wendi age tugul ooreennyi kotokyingei tai, pendi kibagenge.

⁸ Ama toortai `age age; wendi age tugul eng' ooreennyi: siarei kariik, ama mastoi.

⁹ Torombenjin nganaseet; rwaei eng' irimeet; laanyei kobendi kooriik oriit; chutei tirisyok ko uu chooriik.

¹⁰ Potani emet eng' tainnywa; potandos kipsengwet: imenitu asiista ak arawet, ama kooluu kecheik.

¹¹ Ak kotwek Kamuktaindet ne Toroor eng' taitap lugeennyi; amu oo kabuureitanyi; amu kiim ineendet ne yaei ng'olyoondennyi kosulda; amu oo peetuutap Kamuktaindet ne Toroor ak komuisei miising'; ng'oo ne imuuchi komuita?

Keguurchin piik siguunet ak karugutetapkei

¹² Ago mwaei Kamuktaindet ne Toroor kole oweekyage agot nguno eng' mugulelwekwok tugul, eng' karugutetapkei, ak eng' riirek, ak eng' kateeiyet:

¹³ ak ogereer mugulelwekwok, amogereer ngoroikwok, ak oweekyigei Kamuktaindet ne Toroor Kamuktaindeng'wong': amu tinyei myeeindo ineendet ak ko nyiitaat rireenet, ma sip konereechi, ak tinyei rireenet ne oo, ak kowalei kabwaatutikyik eng' yaityet.

¹⁴ Ng'oo ne ingen ngo tos ma week ak kowal kabwaatutikyik, ak kobagaakta kaberuret eng' ole kabunei, amu kagoochinetap peek che ng'ootiin ak kagoochinet ne kieei ne kigoochin Kamuktaindet ne Toroor Kamuktaindeng'wong'?

¹⁵ Oguut iryageet eng' Zion, otabaan karugutetapkei, oguur tuiyet ne po kaming'inetapkei:

¹⁶ oyum piik, oanyiny tuiyet, oyum poisyek, oyum lagok, kobooto che chuchuni: ingomong' sandet eng' koonnyi ne po oriit, ak ingomong' agine murereet eng' koonnyi.

¹⁷ Ingoriiryo tisiik, kiboitinigap Kamuktaindet ne Toroor, eng' kwenutap keterut ak kaptisisyet, ak ingomwa kole, ee Kamuktaindet ne Toroor, riiree piiguk, amegoochi poroteng'ung' kechot, kot koboi pororyosyek icheek: amu nee anyun si komwa pororyosyek kole, mi ano Kamuktaindennywa?

Weegu kogeny Kamuktaindet ne Toroor poroteet koityi emet

¹⁸ Ki am ng'etkong' anyun Kamuktaindet ne Toroor amu emennyi, ak ki riiree piikyik.

¹⁹ Ak ki wolji `Kamuktaindet ne Toroor piikyik koleenji, ogeero, ayookwok peek ak divaik ak mwanik, ak obiyong'se eng' chooto: amayaok kogeny oegu che kichotei eng' pororyosyek:

²⁰ ago aistoi kolooit eng' okweek lugeet ne punu murot kaataam, ak aoone kwo emet ne ong'ateet ak ko surkwen, pendi che indoi kotokyingei nyanjetap Mediterenian ne mi kong'asiis, kobendi che letu nyanjet ne mi cherongo; ak kobul, ak kong'u ne samis, amu kogoyai tuguuk che eecheen.

²¹ Ee emoni, ameiywei, igaskei ak ibaibaitu, amu kogoyai Kamuktaindet ne Toroor tuguuk che eecheen.

²² Amoiyweisye, okweek tyong'igap timiin, amu ta kobitoos susweek eng' surkwen, amu yiei keetit logoekyik, yiei komyee mogoywet ak keetitap sabibuk.

²³ Ogaaskei anyun, okweek lagogap Zion, ak oboiboitu eng' Kamuktaindet ne Toroor Kamuktaindeng'wong': amu koonok ropta ne po tai ko uu ye nyolu, ak koonu ropta korobonjok, ropta ne po tai ak ne po let, ko uu eng' tai.

²⁴ Ak konyi peek rwanyusyek che kiboorsee, ak kong'irtagei divaik ak mwanik eng' ole itendenjin.

²⁵ Ak ageerwok che po kenyiisyek che ki am chereng'endet, ak tinapchet, masaek, ak munene, lugeennyu ne oo ne ki ayoogu konyo kwenung'wong'.

²⁶ Ak oam che chaang' ak obiyong'se, ak olasu kainetap Kamuktaindet ne Toroor Kamuktaindeng'wong', ne kiyaiywok tuguuk che kikwong'ee: ak ma kolilaandos piikyuk kogeny.

²⁷ Ak onai ole ami kwenutap Israel, ak onai ole aa Kamuktaindet ne Toroor Kamuktaindeng'wong', ama mi age: ak ma kolilaandos piikyuk kogeny.

Peetuut ne oo ne po Kamuktaindet ne Toroor

²⁸ Ak ye ibata chooto, ko tuun aroong'jini Kabuusennyu piik tugul; ak komaoten weeriikwok ak tiibiikwok, irwotyin poisyekwok karwotitaosyek, keerei murenikwok ng'ang'utik:

²⁹ ak aroong'jini kogeny Kabuusennyu otwogik che murenik ak tiibiik eng' peetuusyechooto.

³⁰ Ak abarte kwang'utik eng' kipsengwet ak eng' ng'wony, korotiik ak maat ak tolochigap iyeto.

³¹ Ak koimenit asiista, ak koigei korotiik arawet, kotom koit peetuut ne oo ne imuisei ne po Kamuktaindet ne Toroor.

³² Ak tuun kisaru age tugul ne kuurei kainetap Kamuktaindet ne Toroor: amu tuun miitei che chilildos eng' tulweetap Zion ak Jerusalem, ko uu ye ki komwa Kamuktaindet ne Toroor, ak tuun kuurei Kamuktaindet ne Toroor alak eng' icheek che ki ng'et.