Biblia Todo Logo
La Biblia Online
- Anuncios -


JOSHUA 9 - Hawa Naga Bible 2001


Gibeon Ghaq jix rueq Yoshua kuex Laulawc tueq

1 Yodan ruilx maq shalx nyuip kox wawc kuz htenc, kuz yaz htenc, ghaqkhux kox Lebanon kanx nuex httuiuc laz luz yaq Svmuktvrax Mediteranean kawx htenc guimz yaq Hitti, Amori, Kanaan, Perizi, Hiwi nuiyc Jebusi phvnx hokhvmx bix htenc kuex Israel miqsaz rueq taungx wvnc tueq thaungc tay wuez tueq.

2 Tsuinghez vdvmz nuex kvromc vtueq Yoshua nuiyc Israel miqsaz kuex khvt tvkoc rungx raz wuez tueq.

3 Yuq muinz Hiwi phvnx Gibeon miqsaz rueq Yerikho ghaq nuiyc Ai ghaq kuex Yoshua rueq yvmx khoc lac rvgay tvnx lvmz kuex tay vtueq,

4 piq kuex laulawc tvkoc kvmungx wuez tueq. Tsuinghez rueq lvmx svy vkez nuex nuiyc tvdamx kuk vruez svpiq tix vhtawc ngvmx khuix tsongbumx htenc kuex loze nuex tvdaungc wuez tueq.

5 Tsuinghez rueq khoz vkhvy vkez kuex svmx ruiux, yapaungc vjez vnaz kuex paungc tueq. Phuiuz vsvy kuex shanrek htuix htaungx vwaungc wuez kuex gurx laq tueq.

6 Kvruex yimaq tsuinghez kuex Gilgal nuex jerak tec vtueq httax yaq Yoshua nuiyc Israel miqsaz htenc kox nuex kaz vtueq, “Nuiyshiq kuex nuimhez rulc nomic rvyaungc luik wuiyq tvy tvkoc lvmx luz maq httuiuc kaz rix,” ngoz tueq jungx tueq.

7 Yuq muinz Israel miqsaz rueq, “Nuimhez nuiyc nuiyshiq kuex yvmx ningkhvnc nuex lac bomkhvmc rvtvy tix? Nuimhez kuex vnyek vyuq httaz jix rvtuit shvmx,” ngoz kuq tueq.

8 Tsuinghez rueq Yoshua muex ngoc, “Nuiyshiq kuex mkvjaz nvrc jix hez rvtix,” ngoz tueq jungx tueq. Yoshua rueq, “Nuimhez kuex ukhaq lac? Mmaq vkaz lac?” ngoz tueq wiz tueq.

9 Kvkaq tsuinghez rueq vkhoc phvnx jvnx kuq tueq: “Nuiyhez rueq Yehowa m-Tishox ngauz vngax thaungc kuex tay vtueq lvmx luz mungx maq kaz rix. Ejip mungx nuex vpiq rueq shuimx wvnc tueq htenc muinz,

10 Yodan ruilx maq shaldungc kox nuex httax yaq Amori hokhvmx wanueyc rvtueq, Ashtarot httax yaq Heshbon Hokhvmx Sihon nuiyc Bashan Hokhvmx Oga hez kuex yvmx khoc lac khvt gay wvnc tuinx lvmx muinz nuiyshiq rueq tay tiq.

11 Kvkhoc rvtueq nuiyshiq shunshvlc jix hez nuiyc nuiyshiq phvnx vmaq htenc rueq lvmx svy phuiuz vsvy htenc lvmz laq vtueq mnoz rulc rvhumc kay tvkoc nuiyhez kuex tvkaz phuex. Mnoz kox nuex nyuip vtueq nomic rvyaungc tvkoc nvr tvkaz phuex.

12 Nuiyshiq lvmx svy htenc kuex lawc shuiuz. Nuimshiq rulc rvhumc tvkoc yuimx maq kvtenc kaz wvnc tiq nuex lvmx svy htenc kuex kalx luimluimx hvlc lvmz laq tiq. Yuq muinz lawc shuiuz! Majuiuc kuex shanrek htuix htaungx talaz shex.

13 Svpiq tix htawc tiq nuex tsongbumx htenc kuex vnyalx rvtueq, yuq muinz lawc shuiuz! Lotlaz shex kvjuirc kaz wuez vtuex. Lvmx luz maq vkaz ningkhvnc nuex khoz vkhvy nuiyc yapaungc htenc muinz vkez shex,” ngoz tueq jungphvnx kuq tueq.

14 Israel miqsaz rueq Yehowa muex wisoz muq maq kvruex hez yauk wawc phuiuz vsvy kuex thoz taq tueq.

15 Yoshua rueq Gibeon miqsaz rulc nomic rvyaungc luik kuex wuiyq ruiux tvraungx taq tueq. Israel miqsaz walaungx bix rueq muinz nomic luik kuex mphaungx ngaungx kueq ngoz tueq bomkhvmc taq tueq.

16 Nomic rvyaungc luik wuiyq taq tueq yix maq raungnuiyq thuimx vngoz nuex kvruex hez kuex miqmac hep vnyek nuex httaz jix rvtueq lvmx Israel miqsaz htenc rueq tuiuz wuez tueq.

17 Kvkhoc rvtueq Israel miqsaz kuex kvmaq kaz wvnc vtueq raungnuiyq thuimx vngoz raungnuiyq kvruex miqphvnx httax yaq Gibeon, Kephira, Berot nuiyc Kiriat Jearim ghaqyungx htenc nuex httuiuc kaz tueq.

18 Yuq muinz Israel miqsaz htenc rueq tsuingshiq kuex thvt muq, yvmx khoc lac ngoz ruiux lec tsuingshiq walaungx rueq Yehowa Israel Tishox muingc jungx vtueq bomkhvmc tvy ningkhvnc nuex rvtueq. Kvkhoc rvtueq Israel miqsaz rueq walaungx bix kuex khawx lvlx wuez tueq,

19 yuq muinz tsuinghez rueq, “Naungshiq rueq Yehowa Israel Tishox muingc maq bomkhvmc tvy yoalx shex ningkhvnc nuex tsuingshiq kuex yaukshix thawx maq doc muinz htuinc mvy muq.

20 Naungshiq rueq taq tiq bomkhvmc httaz ningkhvnc nuex tsuingshiq muex thuiuzthuic tvraungx kuy juing rvtueq; naungshiq rueq bomkhvmc kuex phvnx miq ngoz ruiux kuex Tishox rueq murx tvgurc phuex.

21 Tsuingshiq muex thuiuzthuic tvraungx kuq shuinz, yuq muinz tsuingshiq muex naungshiq rueq yuix gurc janx htuimc yauk shuimc kuex tvshuimc shuinz,” ngoz tueq jungx tueq kvjaz kuex Israel mungx miqsaz htenc raz naungx tueq.

22 Yoshua rueq Gibeon miqsaz kuex piq kox nuex shvlc wvnc tvkoc nvr tueq, piq rueq tsuinghez muex, “Nuimhez kuex nuiyshiq hep vnyek nuex dvyx httax vtuinx rvyruiux lvmx luz maq vkaz ngoz tueq yvmx khoc lac laulawc jungx phuinx?

23 Kvkhoc nuimshiq rueq shuimc ningkhvnc nuex Tishox rueq nuimshiq muex murx tvgurc kuq kv-phuinx. Nuimshiq miqsaz htenc kuex mkaq muinz dax muex yaungx vtueq ngvy Tishox vpiq vsawc baung tvkoc janx htuimc yuix gurc yauk shuimc kuex shuimx shuinx,” ngoz tueq ngoz kuq tueq.

24 Tsuingshiq rueq, “Jiyungx waz lex, nuimshiq nyuip wvnc tuit nuex nuimshiq muex vruex mungtan wvtaungx kuq gay ruiux, kvruex mungtan nuex httax jix miqsaz htenc kuex thvy gay tvkoc Yehowa m-Tishox rueq vpiq nvrc waz Moshe muex nvr shec tueq kuex vsuing doc rvtueq lvmz nuiyshiq rueq tuiuz lvp tiq ningkhvnc nuex nuiyshiq rueq kvkhoc ruez itiq. Kvruex dvyx muinz rvmuq nuiyshiq rullungx tvkoc kvhiz sungx kawc yawc vtueq kvkhoc ruez vshix.

25 Majuiuc nuiyshiq kuex mluimc vkawc mungx nuex shex rvtix; mnoz rueq tvmaung vshuiux vlvmz kuex tv-phvnc nuiyshiq kuex ruez koq,” ngoz tueq tvralc tueq.

26 Kvkhoc rvtueq Yoshua rueq vkhoc ruez tueq: piq rueq tsuingshiq muex tvkhup wungx kuq vtueq tsuingshiq kuex Israel miqsaz muex tvthvt gay muq.

27 Yuq muinz kvkaq dvyx piq rueq tsuingshiq kuex dax muex tvyaungc ruiux, Israel miqsaz nuiyc Yehowa shomrawx yauk shuimc tvkoc nuex janx htuimc yuix gurc yauk shuimc kuex tvshuimx tueq. Majuiuc raungnuiyq nuex httuiuc laz nawk palx tvkoc Yehowa rueq vhttauk shec baung nuex vkhoc shuimx kaz wuez yaq.

Hawa Naga Bible © Bible Society of Myanmar, 2014.

Bible Society of Myanmar
Síguenos en:



Anuncios


¡Síguenos en WhatsApp! Síguenos