Bakaanelabu 9 - Jola-Kasa

Sóol li áyinen li Yéesu

¹ Bale no unnu, Sóol baloŋe li anaak ayinoo kákoyilen, li huŋes kúgoomaku.

² Nan áliiŋumuu, li alobool min asenool sileetal sammuu síjiwool li ayili anoken li siluufasu sata kal̥awaku.

³ Muñeˈe nan Sóol alakomuu ejowayi boot Damaas, ajow alehen ésukayi, mawuŋe múfulumulo haatiya emitayi li muyaan muhiitenool múwooñen.

⁴ Li alo teetaam. Li ajam hulim hanaake hoonool: — Sóol, Sóol, wáa újiye lí óomi li jálaatenom?

⁵ Sóol li agel̥l̥en aan: — Awu ommuu ayi, Amaaŋen? Hulimahu li hoonool: — Injé emmuu Yéesu an ommuu li jálaatenaju.

⁶ Bale uyito unoken li ésukayi. Fan kulobi wahawu wan óotimuu ukaan.

⁷ Muñeˈe kánayinaabuku kanaboomuu li Sóol li kuyito kulako to, kuyilaat kúlobul. Kujame hulimahu jak, bale kujukut an.

⁸ Sóol li ayitowumul teetaamayi, bale nan aluujulumuu alaañenut ajuk. Li kútukool li kaŋen kújowetum boot Damaas.

⁹ Li alako to kunak kúhaaji feh bajukut, batiñut li bahobut.

¹⁰ Muñeˈe li baj li ésukayi yata Damaas ágoom akee ata Yéesu an koone Ananiyaas. Amaaŋenawu li aanool li kahimmo: — Ananiyaas! Ananiyaas li átuul aan: — Oóyi, Amaaŋen.

¹¹ Amaaŋenawu li aanool: — Ujow muñeˈe boot li bútinabu ban koonemuu «bútin Kacol». Ulíiŋumuu, li ugel̥l̥en li eluufayi yata Sudaas, ánayine áfummulo li ésukayi yata Taalus, an koone Sóol. Ummu li kal̥aw.

¹² Ban, lajuujuk li kahimmo ánayine akee an koone Ananiyaas, ánokenulo áliiŋul li aŋa’ kuŋenool awalen li akila mantee li alaañen ajuk.

¹³ Ananiyaas li aan: — Amaaŋen, bukan kameeŋe kulobonlob mata ánayinaawu ummu. Kuhebonheb majakutamu feh man akaanumuu bukanabuku kooli kammuu Yeelusalem.

¹⁴ Ban kunahaanaku kata élambaayi kusenoosen sembe min abil boot baabe, abil ajok bukanabuku feh kál̥awumemuu li kajawaku kooli.

¹⁵ Bale Amaaŋenawu li aanool: — Ujow, mata lil̥ul̥l̥us ánayinaawu ummu, ban fan íjowum li okila min ikaan kajawaku kúmbaam kuhaasi li bukanabuku kákaanumutumuu lí ínje Ateemit balewom, li kúyiiyaku kooliil, li foof bukanabuku kata Isilayeel.

¹⁶ Injé humumom fan íhiisool sílaamasu feh san áatimuu álaam boot mata ínje.

¹⁷ Muñeˈe Ananiyaas li ajow aŋej li eluufayi, li aŋa’ kuŋenool awalen li Sóol ban li aanool: — Atuyom Sóol, Amaaŋenawu Yéesu áboñulom. Okila áfulimuu li bútinabu ban ubilummuu li bo. Láboñulomboñul mantee li ulaañen ujuk, ban Buyinum Banabaabu li bulako li awu ŋáa’.

¹⁸ Muñeˈe wah ukee wanokoole li uwel̥, li uyaan úlowumul li kúkilaku kata Sóol. Li alaañen ajuk. Li ayito ajow kúbatiisewool.

¹⁹ Fúlum tó, li atiñ min alaañen abaj sembe. Sóol li alako kunak li kúgoomaku kalakomuu Damaas.

Sóol li awaale li ésukayi yata Damaas

²⁰ Li ayaan anaak awaale li siluufasu sata kal̥awaku sata kusuwifaku aan Yéesu ammuu Añiilawu ata Ateemit.

²¹ Bukanabuku feh kajamoolumuu li kawaaleyaku li kusego ŋáa’, li kunaak kugel̥l̥enoo koon: — Kama kele inti ánayinaawu ummu anaake álaamenumuu, li ésukayi yata Yeelusalem, bukanabuku kanaake kúl̥awummuu li kajawaku kata Yéesu? Inti okila anongumuu min abil boot baabe, abil kajokiil ájowetum ajow asen kunahaanaku kata élambaayi?

²² Bale bawaaleyelabu bata Sóol li bunaak buhaŋ mabaj sembe. Kusuwifaku.

²³ Muñeˈe li baj kunak, Kusuwifaku li kujoj min kujamoo mata min kumuk Sóol.

²⁴ Bale Sóol li ajam wahawu wan kúsonoomuu boot min kukaanool. Li kunaak kufooy wámbiilawu wata ésukayi ehuka kuban etihunaka, mantee li kuyili kujokool kumuk.

²⁵ Muñeˈe li líiŋ li huk, kúgoomaku kata Sóol li kuŋalool kújutten li katekel kúyuulen kageb kaaku kata hukalabahu hata ésukayi, min kúwalenumool bó.

Sóol li ajow boot Yeelusalem

²⁶ Nan Sóol aŋejumuu Yeelusalem, li aŋes min anoken li hujojahu hata kúgoomaku, bale buko feh li kúkoliwool, mata kúyinenut koon mal̥egen ágoom laam.

²⁷ Bale Balunabaas li aŋalool ájowetum boot bata kufootalaku li bútinabu, li min Amaaŋenawu aloboolumuu eeno. Li akitteniil foof buu Sóol áwaalewummuu li kabanewool li kajawaku kata Yéesu, li ésukayi yata Damaas.

²⁸ Muñeˈe no unnu, Sóol li alako li kufootalaku. Li anaak anab li buko kuñaahoo híndo Yeelusalem, min anaak awaale li kabanewool li kajawaku kata Amaaŋenawu.

²⁹ Li alob foof li Kusuwifaku kalobemuu elobayi yata kata Gilees, ban li alako búwonnoo li buko. Bale li kuŋes jamukool.

³⁰ Nan káyinenumuu li Yéesu kujamumuu, li kuŋa’ Sóol kújowetum boot Sesaale, ban li kukaanool ájowum bó boot Taalus.

³¹ Muñeˈe bukanabuku feh káyinenumuu li Yéesu, li kubaj kásuumaay li etaamayi feh yata Súde, li yata Gálile, li yata Samali. Li kuhaŋ malit li káyinenaku, ban li kútuul Amaaŋenawu. Li kunaak kuhaŋ mameeŋ kuyinno bo li búkaanum bata Buyinum Banabaabu.

Fiyeel li afaken Ene

³² Muñeˈe Fiyeel anaake añahoomuu li halaabahu unhu, li ajow hunak hukee bata bukanabuku káyinenumuu kakinumuu Lida.

³³ Nan áliiŋumuu, li atook bo ánaayine akee an koone Ene, ahintowe li bukal̥ simit soono hutok li síhaaji, mata labobobobo.

³⁴ Fiyeel li aanool: — Ene, Yéesu Kilisita lafakeni! Uyito ubooñ awu humumi bukal̥abu booli! Ene li ayaan ayito.

³⁵ Muñeˈe bukanabuku feh kakinumuu li ésukayi yata Lida li kata etaamayi yata Saaloŋ, li kujukool li kúyinen li Amaaŋenawu.

Fiyeel li ayitenul Tabita li eketayi

³⁶ Muñeˈe li baj li ésukayi yaaneyimuu Jofe anaale an koone Tabita áyinene li Amaaŋenawu. (Tabita ko kanolaku li «Dolukaas» li elobayi yata kata Gilees, yo yommuu «Huyamb»). Bulokool feh kakaan majake, li kalamben kusukateenabuku.

³⁷ Muñeˈe no unnu, Tabita li ásomut, li aket. Li kufos ehuluŋayi yoola kuban, li kuŋa’ yo kukaan li káfit kalakowe haatiya eluufayi.

³⁸ Kúgoomaku kata Yéesu kalakomuu li ésukayi yata Jofe, li kujam kaanaku Fiyeel ummu li ésukayi yata Lida yáloyiyoolutumuu li Jofe. Li kuboñ kánayine kúl̥uba kujow kuyaakoolool koonool: — Ubonket ubil újowubenuloli, ban jakum ufiyo.

³⁹ Fiyeel li ayaan ánabul li buko. Nan áliiŋumuu, li kújowetumool boot li káfitaku kalakomuu haatiya eluufayi. Kanaalaabuku feh kahokumuu kúyiniil li kubil kuyito téeti Fiyeel mo kul̥okemaa. Li kúhiisool wañawu, li kújufowaku kan Dolukaas akikumuu akila li buloŋ.

⁴⁰ Fiyeel li akaan bukanabuku feh kúfulul, ban li ákuntuŋ min al̥aw. Nan al̥awumuu aban, li átiiwo ajooŋoo li ehuluŋayi ban li aan: — Tabita, uyito! Mal̥egen Tabita li aluujul. Nan ajukumuu Fiyeel, li ayito abah.

⁴¹ Fiyeel li átukool li kaŋen min alambenool ayito. Ban, li áhooñul bukanabuku káyinenumuu li Yéesu, li kanaalaabuku kahokumuu kúyiniil, min áŋalul Tabita áhiisiil maloŋe.

⁴² Li jamo li ésukayi feh yata Jofe. Bukan kameeŋe li kúyinen li Amaaŋenawu.

⁴³ Muñeˈe Fiyeel li alako kunak kafame li ésukayi yata Jofe bata Simoŋ, alokemuu ubaŋ.