Bakaanelabu 6 - Jola-Kasa

Bukan hutok li kúl̥uba li kul̥usi boot kalamben kufootalaku

¹ No unnu, kúgoomaku li kuhaŋ mameeŋ. Muñeˈe Kusuwifaku káyinenumuu li Yéesu ban li kunaak kulob kugilekaay, li súumaatiyiil li Kusuwifaku kaabuku káyinenumuu li Yéesu ban li kubuki li etaamayi yata Falesitiin. Kunaanaak koon Kusuwifaku kata Falesitiin kujokut kanaalaabuku kooliil kahokumuu kúyiniil, loon kujokumuu kooliil nan kugambulenemuu hunakoohunak hutiñahu.

² Muñeˈe kufootalaku li kuhooñ bajoj kúgoomaku feh min kooniil: — Colut min áloli jikat kawaaleyaku kata hulimahu hata Ateemit, min jijow kagambulen hutiñ.

³ Wahawu unwu újimuu, kútuyoli, jil̥us li bukuluul kánayine hutok li kúl̥uba. Fan kulako bukan kan ésukayi éwooluwe, bukan kan Buyinumabu Banabaabu bóomi li buko ŋáa’, ban li kújallo, min ukataaliil bulokabu umbu.

⁴ Bale áloli, fan jijooŋoo to li kal̥awaku li kawaaleyaku kata hulimahu hata Ateemit.

⁵ Kulimaku unku kan kufootalaku kulobumuu, li kúsuum ŋáa’ búsukabu feh balako tomuu li bajojabu. Muñeˈe li kul̥us Ecen, alakomuu an ata káyinen li an an Buyinumabu Banabaabu bulakowe li akila ŋáa’. Li kul̥us foof Fílib li Fulokool, Nikanool li Timoŋ, Falimenaas li Nikola áfulumulomuu li ésukayi yata Antiyok, ban li áyineneen no li bútinabu bata kusuwifaku tówum áyinen li Yéesu.

⁶ Nan kul̥usiilumuu kuban, li kuŋaliil kujow kúhiis kufootalaku, min kuŋa’ kuŋeniil kuwalen li buko, ban li kul̥aw boot li buko.

⁷ Hulimahu hata Ateemit li hunaak huhaŋ majamo huyinno bo. Kúgoomaku li kuhaŋ mameeŋ li ésukayi yata Yeelusalem. Kúlamba kameeŋe li kúyinen li Yéesu.

Hujokahu hata Ecen

⁸ Emmuu Ecen lababbaj káji káamak hákil Ateemit li sembe, li anaak akaan wah wájaahaleniye ŋáa’ li búhiisenum báamak hákil ésukayi.

⁹ Muñeˈe kukee li bukanabuku kanaake kuwoogumuu li eluufayi yata kal̥awaku. Li kulako búwonnoo li Ecen.

¹⁰ Bale kuyilaat kuheek Ecen li kulim, mata lanaanaak álobum li bújallowabu ban Buyinumabu Banabaabu busenoomuu.

¹¹ Muñeˈe li kucaam kánayine min kánayinaabuku koon: — Jijamoojam li agel Móyiis li Ateemit!

¹² Li kúkiŋul búsukabu, li kunahaanaku, li kaliikenemuu ésukayi eluwaayi ésukayi eluwaayi yata Móyiis, min kubil kujok Ecen kújowetum boot bata Hujojahu háamakahu hata Kusuwifaku.

¹³ Li kulaañen foof kúŋalul bukan, kanaake kúmal kuya li Ecen koon: — Anáyinaawu ummu akatut elob kulim kajakut aya li eluufayi yata Ateemit yanabaayi, li eluwaayi yata Móyiis!

¹⁴ Jijamoojam li aan, Yéesu ata Nasalet fan ahum eluufayi yata Ateemit, ban li átiiw bakaanelabu búbuti li ban Móyiis aliikenolaamuu.

¹⁵ Muñeˈe bukanabuku feh kalakomuu li Hujojahu háamakahu, li kuŋa’ kúkiliil feh kuya li Ecen. Li kujuk koon buulabu bata Ecen bunokoonokoo loon bata amalaka.