Rute 2 - Kaxinawá Bíblia (BR)

Boaz bai anushũ shekiwã meshtekĩ niri akaibu Rute mitukĩ binikiaki, na hãtxarã

¹ Noemi bene Elimeleque enabu betsa hawẽ kena Boazrã, bai inũ pei itxapa hayawẽ taeshũ dasibubũ hawẽ hãtxa nĩkakubainaibũ

² shaba betsatiã Rute Noemi yukakĩ yuikĩ: —Shekiwã cevada tsuãra hawẽ bai anushũ tsekaibu ewẽ nuikĩ ea nemabuma hatu itxũ kakũkaĩkĩ cevada meshkã tsekakĩ niri akĩ txaka waibu ẽ mitutanũ mĩ ea nitxĩtirumẽ?— aka Noemi kemakĩ yuikĩ: —Mĩ ẽ bake keskaki. Uĩra kashũ benatãwẽ— aka

³ Rute kai hawa unãmabia hawẽ benẽ epa Elimeleque enabu betsa Boaz bai anu hikishũ hawa yuiabuma meshtekubainaibu hatu itxũ kakũkaĩkĩ cevada meshkã niri ikai henekubainaibu tupikĩ Rute itxawakubainaya

⁴ habiatiãri Belém anua Boaz hui hawẽ bai anu hikitã hawẽ beya txibãkĩ tsekaibu hãtxa duapawẽ Deuskiri hatu hãtxa wakĩ: —Senhor Deusũ hau matu merabewanũwẽ— hatu wa habũri kemakĩ yuikĩ: —Senhor Deusũ duawakĩ hau mia pepawarianũwẽ— akabu

⁵ shekiwã cevada meshkã itxawai Rute hatu itxũ kai uĩtushikĩ hatũ hatu tsekamai dayaru shanẽ ibu Boazĩ yukakĩ: —Ha aĩbu txipashrã, tsuã bake hua ikimẽkaĩ?— aka

⁶ dayaru shanẽ ibũ kemakĩ yuikĩ: —Moabe anua Noemi txĩtũkiranaya ha Moabe nawa aĩbu txipash habe hushiã ikikiki.

⁷ “Tsekaibu itxũ cevada meshkã niri ikai tupikĩ itxawakubaĩpa?” ikĩ ea yukashuki. Penama tupikĩ taewa huĩrukũwãmas eskarabes na hatiã huĩrukũ pishtatã ana dayakirani ikikiki— aka

⁸ Rute anu kashũ Boazĩ yuikĩ: —Txipashã, ea nĩkawe. Shekiwã cevada meshkã tupikĩ itxawai huni betsã bai anu kayamashãwẽ. Shaba tibi ẽ dayaru aĩbuaibu dayaibu anua besti bibirã bibirãwẽ.

⁹ Hanushũ hanirashũ ẽ dayarubũ tsekaibu uĩkĩ hatu itxũ shekiwã cevada meshkã niri akĩ txaka waibu tupikĩ itxawakubaĩshãwẽ. Hau tsuã mia itxakawayamanũ ẽ dayaru hunibu ẽ ma yunushuki. Mĩ ũpash manuai ha shumuki ũpash beshũ akaibu hatubetã ariakubaĩwẽ— aka

¹⁰ nĩkai Rute dãti iki maiki beti itã yuikĩ: —Ẽ minabumabiakẽ haskai ewẽ nuikĩ mĩ ea merabewakatsi ikai?— aka

¹¹ Boazĩ kemakĩ yuikĩ: —Mĩ bene mawaimakẽ mĩ yaya mĩ duahairawakubainaya ẽ nĩkashina ẽ unaiĩ. Nũ nawa betsa mĩ nuku unãriama nukube hiwenũ ika mĩ mai pakea inũ mĩ ibubu mĩ henebirãshina ẽ unãriaii.

¹² Hau Deusũ mia manakunũwẽ. Enabu mĩ duawakubiranimawẽ taeshũ Israelĩ enabu mekenika Senhor Deusũ hãtxa mĩ txibãkatsi ikairã, hau mia pepawakubaĩriashanũwẽ— aka

¹³ Rutẽ kemakĩ yuikĩ: —Mĩ ea haska hãtxa wakĩ mĩ ea benimawaii, haska mĩ ea hãtxa pewairã, ẽ mĩ dayarumabiakenã— aka

¹⁴ ka ibaikĩ ma bari mananãbi piaibutiã Boazĩ Rute kenakĩ yuikĩ: —Nenu huwe. Misi bishũ yutxi bũkashki pukutã piwe— aka tsekaibube Rute tsaua shekiwã tsuiabu Boazĩ Rute inã pikĩ yaniwatã hawẽ teshe arutã

¹⁵ shekiwã cevada meshkã niri akĩ txaka waibu ana itxawai Rute benikaĩkẽ hawẽ dayarubu Boazĩ yunukĩ: —Mã tsekashũ mãtxĩbainai dapi hawẽ meshkã niri ikai hau tupikĩ itxawakubainũ nemayamakãwẽ.

¹⁶ Ha dikabi hau itxapawanũ tsekashũ mãtxĩkĩ hune meshkã eskarabe niri ashũkubaĩkãwẽ. Tsuã itxakawayamariakãwẽ— hatu wa

¹⁷ Boazĩ bai anu kashũ meshkã niri ika tupikĩ itxawakubaĩkĩ ma bari hikikainaya henetã hati itxawashu kusha kusha akĩ hawẽ heshe itxawatã tanakĩ 20 quilo binua shekiwã cevada

¹⁸ peubaini hawẽ mae anu txĩtũkirani hawẽ yayã hiwe anu hikishũ uĩmatã hanushũ bari mananãbi pikĩ teshewabirana hawẽ kapãkã anua bishũ Noemi inã

¹⁹ Noemĩ yukakĩ: —Hani mĩ dayashumẽ, ikisrã? Hania shekiwã cevada itxapahaira mĩ bishumẽ? Tsuãra mia merabewashu Deusũ hau pepawakubainũwẽ— aka hanu ka dayashu hawẽ yaya Rute yuikĩ: —Ha bai anu kashũ shekiwã cevada meshkã tupikĩ ẽ itxawatãshurã, hawẽ iburã, Boazki— aka

²⁰ benimakĩ Noemĩ kemakĩ yuikĩ: —Nukunabu mawariabuma merabewani inũ nũ hiweriayuabu Senhor Deus pepatũ nuku merabewamiswẽ taeshũ ẽ kẽhairawaii. Boazrã, ẽ benẽ enabi kayabiki, merabewakĩ hau nuku mekenũwẽ, nukũ beya txibãkinã— aka

²¹ hanushũ Rute ana banabimakĩ: —Ha dikabi shekiwã tseka keyuriabuma hawẽ dayaru aĩbuaibube dayakũkaĩkĩ ẽ hatubetã tseka keyushanũ ea yuishuki— aka

²² Noemĩ hawẽ babawã Rute kemakĩ yuikĩ: —Peki. Mĩ ẽ bake keskawẽ taea hau mia itxakawayamashanũbũ huni betsã bai anu dayai kayamashãwẽ. Boazĩ dayaru aĩbuaibube besti kakĩ shekiwã cevada meshkã tupikĩ itxawakubaĩshãwẽ— aka

²³ hawẽ yayabe hiweyushũ Boazĩ dayaru aĩbuaibube dayakũkaini ma shekiwã cevada tsekakĩ keyutã ha katxu shekiwã trigo tsekariaibu shekiwã trigo meshkã niri ika henebainaibu tupikĩ itxawariakubaini ma tsekakĩ keyuabũ Boazĩ bai anu Rute ana kamakẽ