Provérbios 16 - Kaxinawá Bíblia (BR)

¹ Hunibu yubakabiakubainaibũ hanushũ Senhor Deusũ haska betxipaiai amakĩ hatu tashnimashũmiski, haska betxipaiama beshtekinã.

² Hunibũ shinãkĩ ibubis bemakis aki: “Ẽ pewaii”, iwanã, shinãkubaĩmisbuki. Hakia Senhor Deusũ hatũ shinã uke merã parananaĩbu hatu unã keyumiski.

³ Hamẽ haska akatsi ikĩ bebũkiri haki txiti ikĩ Senhor Deus mĩ yuishina mĩ yubaka pekẽ hawara pepa Senhor Deusũ mia amakubaĩshanikiki.

⁴ Haska betxipaiai txibãkĩ Senhor Deusũ dasibi dami betsa betsapa wakĩ keyuniki, huni txakabubũ nĩkaisbumari hanu hatu kupiaitiã hatu kupikubaĩti wakinã.

⁵ Ibubis kẽkubaĩmisbu Senhor Deusũ betxipaiama hatu kupikinã, betsabu hawaira kupikĩ inũ betsabu manakubaĩkĩ hatu kupimiski, hatũ txakabu binumamarã.

⁶ Hamapai txakabu tibi yura betsabuna hakimairã, Senhor Deusũ nuikipaiwẽ txanima atiki. Senhor Deus duawakinã, txakabu tibi mĩ heneakeakekubainaii.

⁷ Tsuara hiwei pekũkaĩkĩ Senhor Deus benimawaibũ hanushũ hatuki sinataibu Senhor Deusũ hatu daewashũtiruki, hau ana habe sinatama ha dabe hau hiwei pekubainũbunã.

⁸ Huni pepama parananãkubaĩkĩ pei itxapa bikubaĩtirubuki. Hakia huni betsa hawa parananãma pe dayakũkaĩkĩ eskarabes bibiakĩ ha huni padananãmisbu hatu binuhairaki.

⁹ Hawara wakatsi hunibu yubakakĩ shinaĩbu Senhor Deusũ hatu merabewakĩ haska wai buaibu hatu yunukubaĩmiski.

¹⁰ Shanẽ ibuhairatũ yunukinã, ibubis shanẽ ibuama Deus hãtxashũkĩ hatu unãti wakĩ hatu kupikĩ hau kaneyamanũbũwẽ.

¹¹ Hau hatu parãyamashanũbũ hawẽ shãkama unãti inũ hawẽ txaipa tanati tibi Senhor Deusũ hawẽ hatu unãti wakatsi hatu dami wamaniki. Hamapai tanati pepa hatu yunubiani hawẽ yumetsukĩ hatu benukubaĩmisbu hatu kupishanikiki.

¹² Shanẽ ibuhaira txakabutũ yunutxakaibu Deusũ hatu danãhairamiski. Hakia shanẽ ibuhaira pepatũ hawẽ yunuti kushipawẽ hatu pe yunumisrã, haburã, pepaki.

¹³ Hãtxa txanima yuiaibu shanẽ ibuhairatũ hatu betxipai hatuwẽ benimakũkaĩmiski.

¹⁴ Habũ shanẽ ibuhaira sinatamakĩ yunukĩ beruaburã, ma habianu shanẽ ibũ hatu tenãmatiruki. Hakia unanepabũ shanẽ ibuhaira sinatai daewatirubuki.

¹⁵ Shanẽ ibuhaira benimaya pe hiwekubaĩtirubuki. Shanẽ ibũ hawẽ shinã pepawẽ hatu pe mekearã, ui bekĩ mai metu txa amis keskaki.

¹⁶ Mane ouro karuhairabiakẽ shinã unanepatũ binuaki. Mane prata karuhairabiakẽ tapinikatũ binuriaki.

¹⁷ Huni pepabu hiwei pekaĩkinã, txakabu tibi ana akama henekubaĩmiski. Haskakĩ hatũ hiwea mekekĩ hatũ yura ibubis pe mekeriakubaĩmisbuki.

¹⁸ Ha dukũ kanei ibubis kẽkũkainaiwẽ taearã, txipu txakabu dasibi hukĩ beshte keyushanikiki.

¹⁹ Keĩsbuma nuitapaibube haibunamekĩ mabuyabu mã hatu binuhairatirubuki. Hakia huni mabuyaburã, kenikabube haibunamemisbuki.

²⁰ Yununika pepatũ hamapai akĩ pewairã, hawẽ daya pewakubaĩkĩ ewa wamiski. Tsuãra Senhor Deus ikũwãyã benimawakĩ hatu duawamiski.

²¹ Tsuara unanepakũkainai hakiri shinãkinã: “Harã, hawaira tapinikaki”, akĩ yuikubaĩmisbuki. Tsuara hãtxa duapatũ huni betsa yusĩkĩ hatu shinã betsa wamatirubuki.

²² Tsuabura unanepa shinã pepa hayarã, hatũ hiwea perã, txatxa habai keskaki. Hamẽ unaĩsmapabu tsuãra mã hatu yusĩkubainairã, mã hatube habiaskariki, unaĩsmaparã.

²³ Tsuara unanepa hãtxa hayatũ shinãkubaĩkĩ hawara shabakabi hãtxa hatu yui pewakĩ binumaya: “Txanimaki!” ikĩ yuikubaĩtirubuki.

²⁴ Hãtxa pepa nĩkai ana punu nukama kushipai benimakubaĩmisbuki, buna bata aka keskairã.

²⁵ Haska hatũ hiwea bai pe dabanẽ txibãkubainaiburã, habũ hiwea hawẽ heneaitianã, hatu kupia mawa bestishãkanikiki.

²⁶ Buniama pikubainũ ika dayakubaĩmisbuki, buniwẽ taea datei hawa txikishamarã.

²⁷ Huni txakabubũ hãtxarã, txi here hi ikai keskakĩ hawẽ hãtxawẽ txakabu tibi tashnimamisbuki.

²⁸ Huni atimapa hawẽ hãtxa txakabuwẽ ha imisbuki. Txani yui yuananãkĩ hatu sinatamamisbuki, hawẽ haibube hatu sinatanamemakinã.

²⁹ Hawaira detenamekatsi imistũ hawẽ haibu ha dapi hiweabu parãkĩ haska hawẽ haibũ shinãmabiakẽ hatu yunu txakakubaĩmiski.

³⁰ Tsuãra hawẽ haibu beruwẽ kasmai keshawẽ yunukĩ txakabuwamakatsis ikĩ yunumiski. Tsuãra ma txakabuwa unãkinã, hawẽ kesha mukua dakashũ hatu unãmamisbuki.

³¹ Tsuara hiwei pekaini txakabuismarã, anibui hawẽ bu siũ siũpaya maiti hawẽrua sawea keskakẽ kẽwãshãkanikiki.

³² Hĩ hĩ ikama hamapai tenetã manamistunã, mẽtsisipabu hatu binuhairaki. Hawara txakabu binukĩ tsuãra matũ yura mã mekemisrã, habũ maewã atxikĩ hatu maemamisbu mã hatu binuaki.

³³ Hunibũ hamapai bikatsi hawẽ hamapai unãti shau meshte númeroya ureãbu haratukira número kaiaĩ Senhor Deusũ katukĩ hatu unãmamiski.