Provérbios 13 - Kaxinawá Bíblia (BR)

¹ Hawẽ bake unanepatũ hawẽ epã nemati hãtxa nĩkashũ txibãkubaĩmiski. Hakia bake habiaska beyai nĩkaismatunã, hawẽ epã nemati hãtxa danãkĩ hawa txibaĩsbumaki.

² Haska hãtxamisbu tibi hatũ manakuti bishãkanikiki, pe inũ txakabu yuimisbu tibiwenã. Hakia huni pubẽ detenamemisbunã, ana hatu detekĩ txakabuwanũ ishũ txakabu besti benakubaĩmisbuki.

³ Tsuãra hawẽ hãtxa mekemis ibubis meketirubuki. Hakia tsuãra hamapai yui hãtxawãmisrã, hamẽ hawena besti benushanikiki.

⁴ Txikishbũ hawara betxipaikĩ bikatsis ibiai hawa bitirubumaki. Hakia dayakapaburã, hamapai hayakubaĩmisbuki.

⁵ Huni pepabũ txani hãtxa danãmisbuki. Hakia huni txakabubũ hawara atimapa akai uĩ hawẽ dakemisbuki.

⁶ Huni duapabu hatũ pepawẽ mekemisbuki. Hakia hunĩ txakabuwakubaĩmisbu hatũ txakabuwẽ keyui yamamisbuki.

⁷ Huni betsabu hawa hayamabia: “Ẽ mabuyaki”, iki kẽmisbuki. Hakia tsuara mabu itxapa hayabia shabakabi yuiama nuitapai keska hiwemisbuki.

⁸ Yumetsubũ hau hatu tenãyamanũbũ mabu itxapayabũ hatũ peiwẽ hatu daewatã hawẽ hiwea piskutirubuki. Hakia nuitapaiburã, tsua hatuki sinatamawẽ taea hawa nĩkama hiweabuki.

⁹ Huni pepabu bĩ txashahaira keska benimamisbuki. Hakia huni txakabubu bĩ nuka keskabuki, hawa benima hayamarã.

¹⁰ Hunibu ibubis kẽkĩ hatu txakabuwamakubaĩmiski, hatu detenamemakinã. Hakia huni unaneparã, keãma yusiã pepa nĩkamisbuki.

¹¹ Dayai parananãtã mabu hawaira itxawamisburã, hawaira hawẽ mabu keyushãkanikiki. Hakia tsuãra unãshubira dayakĩ mabu itxawakubainairã, ewawashanikiki.

¹² Hawara akatsi shinãbiaya hamapai betsawẽ taea tea atiruma unaĩ huĩti nishmamisbuki. Hakia haska uĩkatsis ikĩ shinãkĩ manakamis tashniaya benimamisbuki.

¹³ Yunuti hãtxa danãkĩ pe shinãma hawara kanetã aitĩ itxakayamatiruki. Hakia yunuti hãtxa nĩka pewatã txibãkĩ manakuti pepa bishanikiki.

¹⁴ Unanepã yusĩti hãtxa nĩkairã, hawẽ hiwea hayashanikiki, ha mawawẽ datemis piskuirã.

¹⁵ Tsuãra pe shinãkĩ akĩ pewabainaya hunibũ kẽwãmisbuki. Hakia parananaĩ txanitxakakubaĩmisbu ana haskatã petirubumaki.

¹⁶ Unanepatũ bebũkiri pe shinãtã hamapai amisbuki. Hakia unaĩsmapatũ hamapai txakabuwakĩ shabakabi hatu uĩmakubaĩmisbuki.

¹⁷ Hãtxa bunika txakabunã, hatũ hãtxa txani peama hatu txakabu tueshũmiski. Hakia hãtxa bunika pepã hatũ hãtxa pepa txanikĩ hatu daewakĩ benimawamisbuki.

¹⁸ Hawẽ merabewati yusĩti hãtxa tsuãra danãmisrã, yumaĩ dakekubaĩshãkanikiki. Hakia merabewati yusĩti hãtxa tsuãra nĩkamisbu yurabũ hatu kẽwãshãkanikiki.

¹⁹ Hawara haska betxipaiai akĩ menetanã, hawẽ benimamisbuki. Hakia unaĩsmapabunã, shinã betsa watã hatũ txakabu henekatsi isbumaki.

²⁰ Unanepabube haibunãtanã, hawẽ unanepa hãtxa mĩ tapĩkubaĩshanaii. Hakia unaĩsmapabube haibunãkinã, hatũ txakabu tapĩkĩ matũ beya pepa mã putashanaii.

²¹ Habũ txakabu mekubainaiburã, hatũ txakabuwẽ betsa betsapa tenemisbuki. Hakia pepabunã, manakuti pepa bi hawẽ benimamisbuki.

²² Huni pepabu mawakĩ hatũ yusiã pepa inũ mabu pepa hawẽ bababu heneshũbaĩmisbuki. Hakia hunĩ txakabuwamisbũ mabu itxapa itxawashinarã, mawaya huni pepabũ bikĩ ibuwashãkanikiki.

²³ Nuitapaibũ bai anu piti hamẽ ibiaya tsuã hatu pe mekeama hatu itxakawakĩ hatũ piti hamẽ hatu benũtirubuki.

²⁴ Tsuãra hawẽ bakebu betxipaiamarã, txakabuwai hatu nemakĩ pewakatsi isbumaki. Hamẽ tsuãra hawẽ bakebu betxipaikinã, hatu yusĩkĩ bebũkiri nema pewakubaĩmisbuki.

²⁵ Huni pepatũ pikĩ yaniwatã benimai shinã txãkãkũkaĩmiski. Hakia huni txakabũ pibiai bunikũkaĩmiski.