Números 14 - Kaxinawá Bíblia (BR)

Senhor Deusũ hatu mekebiakubaina hawẽ kushipa ikũwãma inibukiaki, na hãtxarã

¹ ha mai pakea hirabi hiwebaunabu mese uĩtani txaniaibu nĩkai datei kashai biski iki meshu txai tanai kashashini

² penaya dasibi Israelĩ enabu Moisés inũ Arãoki sinatai hãtxa txakabu hatukiri yuikĩ: —Egito anua nũ mawai pe ikeanimaki. Hamẽ hanu tsua hiweabuma anua mawa nũ periakeanaii.

³ Haskakĩ Senhor Deusũ nenu nuku iweimamẽ? Ha nawabube nuku detenamemakĩ dateyabi nuku tenanũ, iwananã, nukũ aĩbuaibu inũ nukũ bakebube nukuki sinatakĩ hau nuku tenananũbunã, ha kushipabukẽnã. Nukũ hiwea benukatsi ikama Egito anu nũ ana txĩtuanã, peki— ikĩ

⁴ yuinameakeakekĩ yuikĩ: —Huni betsa nukũ shanẽ ibu katunãkãwẽ, hau Egito anu hatũ nuku ana txĩtũmanunã— ikaibũ

⁵ Moisés inũ Arãonẽ hatu nĩkatã dasibibu bebũ dãti iki beti ikabũ

⁶ haskaibũ haburi datehairakĩ Numnẽ bake Josué inũ Jefoné bake Calebe ha dabetũ ha mai pakea betsa uĩtãshinabu hatuwẽ datei huĩti nishmakĩ hatũ tari ushnitã

⁷ Israelĩ enabu dasibi hatu yuikĩ: —Ha mai pakea nũ hune uĩkubaũtãshinarã, hanu hiweti mai pepahairaki.

⁸ Nukuwẽ benimakĩ ha maewã piti hamẽ ikai anu Senhor Deusũ nuku iyushũ nuku merabewaya nũ hikishanaii, nuku inã hanu ibuwairã.

⁹ Hakia nukũ mekenika Senhor Deus danãyamakãwẽ. Ha dikabi, ha mai pakea anu hiweabuwẽ dateyamariakãwẽ. Senhor Deusũ nuku merabewakĩ hatũ mekenika yushibu nemaya misi pia keska wakĩ nũ hawaira hatu maemashanaii. Nukurã, Senhor Deuski nũ txiti ikaki. Hakia haburã, tsuã hatu mekeamaki. Hatuwẽ hawa dateyamakãwẽ— hatu abiabu

¹⁰ nĩkama dasibitũ mishkiwẽ tsaka tsaka akĩ hatu tenãpanãbũ hanu haki nukuti tari hiwe anushũ Senhor Deusũ hawẽ kushipa txasha txasha ikihairaiwẽ hatu nemakĩ ana hatu uĩmakĩ

¹¹ Senhor Deusũ Moisés besti ana yuikĩ: —Ea danãkubaĩkĩ henekatsi ikabumaki. Hawẽ unãmati dami itxapa ẽ hatu uĩmabiakubirana ea ikũwãkatsi ikabumariki.

¹² Haskakẽ txami mesewẽ kupikĩ hatu yama watã mia inũ mĩ bakebu enabu washũ hatu pahaira wakĩ yurabu kushipa ẽ mia hatu washũshanaii, na Israelĩ enabũ kushipa binumakinã— aka

¹³ Moisĩ Senhor Deus nemakatsi ikĩ kemakĩ ana yuikĩ: —Haska Egito anua mĩ kushipawẽ na enabu mĩ hatu iweima Egito nawabũ haskakiri unãhairakanikiki.

¹⁴ Haska mĩ ea dama yuishu mĩ hatu akaya Egito nawabũ nĩkatã Canaã mai pakea hirabi anu hiwebaunabũri nĩkariashãkanikiki. Habianuri eska mikiri ma mia nĩkaimabuki. Senhor Deus na yurabu hatube kakĩ hatu beismakĩ mĩ hatu kupiama ikimaki. Nai kuĩ merã mĩ hatu bebũ kai inũ hanua meshu merã nai kuĩ dami txi here merã mĩ hatu bebũri hukĩ iwekubiranaii.

¹⁵ Na enabu mĩ hawaira hatu dete keyuaya yurabu shuku tibitũ mĩ kushipakiri unãbiakĩ eska yuikubaĩtirubuki:

¹⁶ “Hanu Senhor Deusũ hatu yubabiani anu hatu hikimatirumawẽ taeshũ hanu tsua hiweabuma anushũ hatu debuwakĩ keyukĩ yamawashinaki”, akĩ mikiri yuikubaĩtirubuki.

^17-18 Haskakenã, Senhor Deusuũ, mĩ haska hatu yubaima akĩ mĩ kushipa hatu uĩmakĩ iyukĩ hatu niti akama heneyamawe. Yurabu txakabubu kupikĩ mĩ heneismabia hakia hatũ ibubũ txakabuwẽ taeshũ hawẽ bakebu inũ, hawẽ bababu inũ, hatũ bababũ bakeburi inũ, habũ bababũ bababuri mĩ hatu kupimisbia ikis hawaira sinatama nuikipa benimanikahairakĩ mia nĩkaisbumabiakẽ hatũ txakabu tere akĩ ana shinãma mĩ hatu hakimawatiruki.

¹⁹ Haskawẽ taeshũ mĩ nui pae ewapa hatu uĩmakĩ hatũ txakabu hatu buashũwẽ, ana shinãmarã. Egito anua hĩ hĩ ikama hatu iwekubirãkĩ na mae anushũ mĩ hatu mekekubainaii— aka

Israelĩ enabu Senhor Deusũ hatu kupikĩ hatu bika tenemakubainikiaki, na hãtxarã

²⁰ Senhor Deusũ Moisés kemakĩ yuikĩ: —Peki. Haska mĩ ea yukairã, hatũ txakabu buakĩ ikis ẽ hatu tenãkĩ keyuamaki.

²¹ Hakia ẽ hiwea inũ ẽ kushipa mae hirabi anushũ uĩmisbuwẽ taea haska ẽ mia yuiai txanima kayabiki.

²² Egito inũ hanu tsua hiweabuma anushũ ẽ kushipa inũ hawẽ unãmati dami betsa betsapa ẽ ma hatu uĩmabiakubirana uĩbiakĩ hawẽtsaĩs ea unãti wanũ ishũ ẽ yunuti hãtxa txibãkatsi ikama ikubirãkanikiki.

²³ Mae pepa hatũ shenipabu ẽ hatu yubani habũ ea nĩkakatsi ikama ikubiranaibũ tsuã uiãmahaira ishãkanikiki. Ea danãmisbutũri hanu hikikĩ uĩtaskabuma iriashãkanikiki.

²⁴ Hatũ shinã keskama ẽ tsuma Calebe bestitũ shinãkĩ txanimahaira ẽ hãtxa nĩkakĩ ea ashũkubaĩmiski. Haskawẽ taeshũ hanu hatubetã uĩbaũtanimanu Calebe hau hikinũ ẽ nemama hikishanikiki. Hanua hawenabu pai hiwekubaĩshãkanikiki.

²⁵ Haskawẽ taea ana hariri mã buaibukiri napãpa ewapanu Amaleque nawabu inũ Canaã nawabu hiwebaunabuwẽ taea ana hari buama meshukiri ana hawẽri hatu txĩtuãbaĩkĩ Ianẽwã Tashipakiri hanu tsua hiweabumanu hatu ana iyutãwẽ— akĩ

²⁶ Senhor Deusũ Moisés inũ Arão ana hãtxa wakĩ:

²⁷ —Hatiã ea nĩkashanaibu teneshũ hatu manakubaĩpa, ea yuaĩ eki ha ikaibu ẽ nĩkashuwẽ taea ha Israelĩ enabu txakabu yuananaĩ hãtxawaĩburã?

²⁸ Ekiri eska ea hatu yuishũwẽ: “Earã, Senhor Deus ibubis ẽ hiweawẽ taeshũ haska ekiri mã yuibaunaibu nĩkatã habiaskari ẽ matu akubaĩshanaii.

²⁹ Dasibi hunibus 20 bariya unuri hiwebainaibu unaki tanakĩ netãmisbu dasibi eki hãtxa txakabukubaini habu mawashãkanikiki. Hatũ yura hanu tsua hiweabuma anu hatu putakubaĩshãkanikiki.

³⁰ 20 bari binubainabu mã tsua hikiama ishanaii. Hakia Jefoné bake Calebe inũ Numnẽ bake Josué hanu ẽ yubani anu habu besti hikitã hiweshãkanikiki.

³¹ Hakia: ‘Nukuki sinatakĩ nukũ bakebu inũ nukũ bababu atxitã dayaru watirubuki’, ikĩ ma yuishinabuwẽ taeshũ matũ huni bake mashkubu inũ matũ bababu hatu iyukĩ hanu mã danãshinabu anu ẽ hatu hikimashanaii, hau hawẽruai hiweshanũbunã.

³² Hanu tsua hiweabuma anu mawa matũ yura putakĩ mã hatu henekubainaya

³³ 40 ano inabu mekekubauni matũ bakebu hiwekubaũshãkanikiki. Haska dayakĩ ẽ hãtxa mã ikũwaĩsbumawẽ taeshũ 40 ano matũ txakabu kupiti matũ bakebũ matu teneshũkubaĩshãkanikiki, mã debui keyuayarã.

³⁴ 40 dia Canaã mai pakea mã uiãtãbaunimaki. Haskawẽ taea 40 ano matũ txakabu pakai mã yumãshanaii, dia tibi mã uĩbaunima keska wakĩ ano bestitxai ẽ matu kupia mã uĩshanaii, mã eki sinataiwẽ taeshunã”, akĩ ea hatu yuishũkãwẽ.

³⁵ Txanima ea Senhor Deus ẽ hãtxa kayabiaii. Na yurabu txakabu eki dasibia sinataiburã, ẽ hatu haska washanaii. Nenu hanu tsua hiweabuma anu hatũ hiwea benushãkanikiki, mawakinã.

Canaã habũ uĩbaũtanimabu 10 huni txakabu mawanibukiaki, na hãtxarã

^36-37 Canaã anu bushũ hau uĩbaũtanũbũ hunibu Moisĩ hatu yunuima txĩtũbirã: “Ha mai txakabuhairaki”, akĩ hatunabu hatu banabimabu Israelĩ enabũ nĩkatã hatunabu Senhor Deus yuãmakĩ hatu ha imashinabuwẽ taeshũ ha 10 huni Senhor Deusũ hatu hawaira debuwakĩ keyunikiaki.

³⁸ Hanua Canaã anu kashũ hatubetã uĩbaunima Josué inũ Calebe besti mawama inibukiaki.

Horma anuabũ Israelĩ enabu shuku betsa hatu yamawanibukiaki, na hãtxarã

³⁹ Haska Senhor Deusũ ma yuishu Moisĩ hatu yuia nĩkai Israelĩ enabu dasibi punu nukai keyuabũ

⁴⁰ ushashini penama bestẽtã kaĩbaini bui mati matipa mapekebaini bua yuinamekĩ: —Ma nenu nũ hubia txanima nũ kanehairashinaki. Habiaskabia hanu Senhor Deusũ nukũ shenipabu yubani anu burinãkãwẽ, hanu ibuwairã— iake iakeaibũ

⁴¹ hatu nemakĩ Moisĩ yuikĩ: —Haskai mã patapamẽ, Senhor Deusũ yunua besti nĩkamarã? Haska mã shinaĩkirirã, mã kanehairashanaii.

⁴² Matũmebi bebũkiri bebuyamakãwẽ. Hamẽ mã haskakainayarã Senhor Deusũ matu merabewairã, ana matubemaki. Hakia nĩkamas mã kayarã, matu maemashãkanikiki, habu nukuki sinataibunã.

⁴³ Habu dukũtũ matu manakakanikiki, Amaleque nawabu inũ Canaã nawabunã, matube detenamekĩ matu tenanũ ikarã. Senhor Deus merabewanika mã heneshina ana matubemaki— hatu aka

⁴⁴ ha yura shuku betsabũ Moisĩ hãtxa nĩkama mati matipanu habũ dukũ ibuwanũ ika mapekeaibũ hakia Senhor Deus hatube yubakani hãtxa aruni bau buama inũ Moisés hatube kamakẽ

⁴⁵ hanua Amaleque nawabu inũ Canaã nawabu ha mae anu hiwebaunabu hanus ma itxatã butubirãkĩ hatu detekĩ taewakĩ maemakĩ hatu txibãkubirãkĩ Horma anushũ hatu maemakĩ yamawakĩ keyutã hatũ mae tibi anu txĩtũbainibukiaki.