Mateus 9 - Kaxinawá Bíblia (BR)

Jesusũ huni yura babuni shushawakĩ hawẽ kuxipa hatu uĩmanikiaki, na hãtxarã

¹ Haska wabu hawẽ tsumabube Jesus shashũ nanetã ana txĩtũkaini iãnẽwã pukebaini hawẽ mae Cafarnaum anu hiki keti ikaibũ

² ma ana Jesus hua nĩkatã huni yura babuni hawẽ dakatiki daka hawẽ haibuaibũ bakebirã datãtã: “Jesusũ shushawatiruki”, iwanã, xinaĩbũ ikũwaĩbu Jesusũ unãkĩ huni yura babuni yuikĩ: —Dateyamawe. Mĩ txakabuwẽ Deusũ mia kupikatsis ibiakĩ mã ea ikũwaĩwẽ taeshũ hau ana xinãyamanũ ẽ mia buashunaii— akaya

³ Deusũ hãtxa kenenibu yusĩnanãmisbũ nĩkatã Jesuski sinatai yuinamei: “Ha huni txakabuki. Nuku paraĩ Deus keskakatsis ikikiki. Deusũ besti hawẽ txakabu buatiruki”, ikaibũ

⁴ tsuã Jesus yuiamabia hatũ xinã unãkĩ Jesusũ hatu yukakĩ: —Matunã, haskakĩ mã xinã txakai ikai?

⁵ Haratu bikamamẽ, hawẽ txakabu buashunaraka, hawẽ yura beniaraka?

⁶ Ha dabe bikakẽ Deusũ besti atiruwẽ taeshũ haskakĩ mã xinãtxakai? Ẽ matũ Hutxi Kayabi Iuwa na mai anua ea ẽ hawẽ kuxipa hayatũ hawẽ txakabu ẽ buashũtiru mã unãnũ ẽ akai uĩkãwẽ— iwanã, huni yura babuni kaya wakĩ yuikĩ: —Benitã mĩ dakati iabaini mĩ hiwe anu kariwe— aka

⁷ hawaira yura damesteni kayatã benikawã hawẽ dakati bitã iabainaya

⁸ mapubaũshũ uĩ datekĩ yuikĩ: —Habaa! tsuã haska waismaki. Hakia Deus pepahairatũ na huni ma kayawashuki— iwanã, uĩkĩ Deus kẽwanibukiaki.

Governo pei bishunika Mateu Jesusũ katukĩ tashnimabaĩnikiaki, na hãtxarã

⁹ Hanua kaĩkaini hanushũ Roma governo pei bishũti hiwe anu ẽ Mateu tsauwa Jesusũ ea betxitã yuikĩ: —Ẽ mia tapĩmai ea txibãkubaĩwẽ— ea wa benitã dasibi hene keyubaĩ txibã taewabaĩ

¹⁰ ẽ hiwe anu iyushũ hatu pimanũ, iwanã, Roma pei bishũmisbu inũ Deusũ hãtxa kenenibu yusĩnanãmisbu hatu nĩkaisbuma ẽ haibuaibu itxawashũ Jesusbetã nũ piaibũ

¹¹ fariseubũ uĩkĩ Jesusũ tsumabu yukakĩ: —Haskakĩ matũ yusĩnã pei bishũmisbu txakabubu inũ nukũ hãtxa nĩkaisbumabetã pimẽkaĩ? Txakabuki— akaibũ

¹² Jesusũ nĩkatã hatu txitekĩ yuikĩ: —“Ẽ peki”, iwanã, xinaĩbu anu huni dauya kaismaki. Hakia isĩ teneaibu anu besti huni dauya kenabu kamiski.

¹³ Deusũ Oséias yuinirã, mã uĩriamamẽ? Matu yuinũ nĩkairakãwẽ: ‘Ea benimawanũ ishũ txashuwã kuakĩ menu keyuaiwẽ besti akama yurabuwẽ nuikĩ hau ea benimawakubainũbũwẽ’, aka nĩkatã Oséiasĩ keneniki. Haskakẽ: “Ẽ txakabuki”, iwanã, xinaĩbu hatũ huĩti pewakĩ ẽ hatu merabewa xinã betsa watã hau Deus ikũwanũbũ ẽ huniki, huni dauya keskairã. Hakia: “Ẽ txakabumaki”, ikĩ xinaĩbu hatu merabewatanũ ika ẽ huamaki— hatu waniki.

Samakenikabũ Jesus yukanibukiaki, na hãtxarã

¹⁴ Hanũkaĩ shaba betsatiã Naximanika Joãoki txiti ikabu Jesus anu beshũ yukakĩ: —Nuku inũ fariseubuki txiti ikabu nukũ txakabuwẽ taea nukũmebi itxakanikai samakei nũ piama ushayumiski. Haskai miki txiti ikabu samakeisbumamẽ?— akabu

¹⁵ Jesusũ hatu yuikĩ: —Huni aĩyaĩ nawaibu anu hawẽ haibuaibu pashkariama manunamei hatũmebi piama itxakanikatirubumaki. Hakia hatu shunũbaini kakẽ manui hawẽ haibuaibu samakei piama ipaketirubuki. Ea iyuabũ habiaskariai ewẽ nui ẽ haibuaibũ piama iriashãkanikiki— iwanã, ana hatu yuikĩ:

¹⁶ —Ẽ yusĩanã, tari bena txukariama keskaki. Matu yusĩnũ nĩkakãwẽ. Tari sheni bashnekea tari bena tuash txukariamawẽ tari sheni tsamĩa patsa estei ana bashnekemiski. Hamẽ matũ yusĩanã, tari sheni bashnekea keskaki. Ẽ yusĩawẽ tsamĩa keska wakĩ matũ yusĩa ẽ pewatirumaki.

¹⁷ Ana habiaskari keskawẽ matu yusĩnũ nĩkakãwẽ. Bitxi bixtu sheniki uva hene bena buspuriama manekĩ mata washũ denesh mestẽwã hamebi katsai buspui bitxi bixtu sheni peshemiski, vinho bena inũ bitxi sheni benuirã. Habiaskari wakĩ ẽ yusĩa bena matũ xinã sheni ẽ husitirumaki, benukinã— hatu wai

Aĩbũ himi bashneni Jesusũ maĩwãtã Jairõ bakeri bestẽwanikiaki, na hãtxarã

¹⁸ hanua hãtxai meneriamakẽ judeu shanẽ ibu betsa Jesus betxibirani hushũ ha bebũ dãti ishũ yuikĩ: —Ẽ aĩbu bake mawakatsis ikikiki. Ebe kashũ uĩkĩ hau shushanũ ea meshuniyuwe— aka

¹⁹ Jesus benitã kaya nũ hawẽ tsumaburi nũ habe buaibũ

^20-21 hanua aĩbu himi bashneni ha isĩ tenei ma 12 ano kabia hawa neseisma bari betsa tukama ikũkaĩmis nuitapakĩ Jesus txibãkĩ xinãkĩ: “Hawẽ tari kesha besti mea ẽ shushatiruki”, iki Jesusũ petxiuri txibãbaini kakĩ hawẽ tari kesha besti metsa hawaira hawẽ himi maiãyã

²² Jesus niti itã nasaukekaũ uĩkĩ ha aĩbu yuikĩ: —Aĩbuũ, mĩ ea ikũwãyã ẽ mia shushawashuki. Ana isĩ teneama unãnuma kai periwe— aka habiatiãri ana himi ikama kaya

²³ haska wabaini buaibũ judeu shanẽ ibũ hiwe anu itxa yurã kaiã kashai saĩ iki biski ikaibũ hikikaĩkĩ hatiritũ teperewe mawaibu Jesusũ

²⁴ hatu yuikĩ: —Haskai eiskaũ kashai mã biski ikanai? Hawẽ bakerã, mawa kayabiamaki. Usha bestia ikikiki. Unu tashniyukãwẽ— hatu waya: “Hawẽ yura ma mawaki”, ishũ itxapabũ Jesus uĩkĩ usaĩbu

²⁵ hatu nitxiã buaibũ hanu aĩbu dakanu Jesus hikikaĩ txipax metsuã ana hiwei benikaunikiaki.

²⁶ Hanushũ ha mae ewapa anushũ Jesusũ haska waxina dasibibu txaniaibu nĩka keyunibuki.

Huni bekũ dabe Jesusũ shushawanikiaki, na hãtxarã

²⁷ Hanua shanẽ ibu Jairõ hiwe anua kaĩkainaya huni bekũ dabetã txibãkĩ hui kuxipawẽ yuikĩ: —Davĩ babaã, nukuwẽ nuiwe— akubainabu

²⁸ hanua Jesus hiwe betsa merã hikiaya huni bekũ dabe haki nukuabu Jesusũ hatu yukakĩ: —Ẽ matu shushawatirurã, mã ea ikũwaĩ?— hatu wa —Haa. Shanẽ ibuũ, nũ mia ikũwaiĩ— akabu

²⁹ hanushũ Jesusũ hatu bemepitã yuikĩ: —Haska xinãkĩ mã ea ikũwaĩnã, mã shushaii— hatu waya

³⁰ hawaira bepeshetã uĩaĩbũ Jesusũ hatu nematxakayamakĩ yuikĩ: —Ẽ matu haska washurã, tsua yuiyama mapuyukãwẽ— hatu wabia

³¹ bushũ haska Jesusũ hatu shushawashu dasibi hatuki txanibaũkĩ kakapa waibũ

Huni huyu Jesusũ shushawanikiaki, na hãtxarã

³² habiatiãri huni huyu yushĩ txakabu haya Jesus anu huni betsabũ iweaibũ

³³ Jesus hawẽ nuikĩ yushĩ txakabu kaĩma kaya hãtxai taeaya ha dapi mapubirãkĩ uĩ e itã yuikĩ: —Israelbũ haska nũ uĩaĩ keska tsuã aismaki. Ha huni pehairaki— akeakeaibũ

³⁴ hatũ hãtxa abuama fariseubũ hatu yuikĩ: —Na hunirã, yushĩ txakabu shanẽ ibũ kuxipa hayaki. Haska bestiwẽ taeshũ yushĩ txakabu hatu kaĩmaikiki— ikeakeaibũ

Jesusũ dayakapabu eskarabeskẽ ana mirima yukatikiri hatu yusĩnikiaki, na hãtxarã

³⁵ hanua hatu haska wabaini kakĩ Galiléia anu mae ewapabu inũ mae hatiubuma anushũ hatũ itxati hiwe anushũ yusĩkĩ Deus shanẽ ibuaikiri kakape yusĩkĩ isĩ betsa betsapa teneaibu shushawakubaũkĩ

³⁶ yurã kaiã uĩ hatuwẽ nuihairakĩ habu txashuwã uĩnikauma keskabuwẽ taea hatuwẽ dabanã ikĩ

^37-38 nũ hawẽ tsumabu nuku yuikĩ: —Ẽ tsumabũ ẽ hãtxa ikũwãkĩ txibãmisbũ hatu yusĩakeakebaunaibũ itxapabũ ea ikũwãshãkanikiki. Haskakẽ ikũ Deusũ bai anu mibã mirima ma huxĩ keyui keska dakaki. Hakia hawẽ dayakapabu eskarabeswẽ taeshũ ana dayakapabu itxapa hau yununũ bai ibu Deus ana yukakãwẽ, hawẽ yunu tsekakĩ itxawashunai keska wakĩ yurabu hau hawẽ hãtxa hatu yusĩbaũshanũbunã— nuku waniki.