Mateus 23 - Kaxinawá Bíblia (BR)

Deusũ hãtxa kenenibu yusĩnanãmisbu inũ fariseubu Jesusũ hatu txitenikiaki, na hãtxarã

¹ hanushũ judeu shanẽ ibubũ nĩkariaibũ Jesusũ yura itxapabu inũ hawẽ tsumabu ana nuku yuikĩ:

² —Deusũ hãtxa kenenibu yusĩnanãmisbu inũ fariseubũ Moisés hãtxa keneni matu yusĩkĩ ikũ hãtxa kaneama matu yuimisbuki.

³ Haska matu yusĩmisbu hatũ hãtxa pe txibãkĩ hakia hatũmebi keĩ beparamemisburã, ha hatu mawayamakubaĩkãwẽ. Pe matu yuibiatã ibubis kanekubaĩkanikiki.

⁴ Haskawẽ taeshũ habunã, shãkamahaira matu iama keska wakĩ yusĩa tsuã txibãtiruma matu yusĩbiakĩ habias yusĩa habũri txibãtirubumaki, haska matu yusĩaĩbu keska hiwekĩ matu uĩmamarã.

⁵ Ha inũ, “Deusũ hãtxa ẽ txibãhairai uĩkĩ dasibibũ hau ea kẽwãnũbũ”, ika tari txaipa dauya panã panãyã sawetã Deusũ hãtxa kene bitxi bau pixtaki nanea bitxiwẽ neshea betũku anu sawekĩ netãtã pũti anuri netãriatã hau ea uĩnũbũ ika hatu kẽwãmai mapumisbuki.

⁶ Ha inũ, pi itxashũ shanẽ ibu dapishũ pinũ, iwanã, benamisbuki. Ha inũ, hanu itxati hiwe anu hikikaĩ haki tsauti pepa hanu dasibibũ hatu uĩtirubu anu tsaukatsis imisbuki.

⁷ Ha inũ, bai shesha tibi mapua mabu inãnanãmisbu anushũ: “Yusĩnaã, akĩ hau ea duawanũbũ”, ika mapumisbuki.

⁸ Hakia maturã, habu ikai keska iyamashãkãwẽ. Yurabu kenamakinã, hakia matũ yusĩnanã bestitxaiki. Ha ikũwaĩ mã hawẽ betsabu inũ hawẽ puibu bestiki. Haskawẽ taeshũ: “Yusĩnaã”, akĩ hau matu kenayamashanũbũwẽ.

⁹ Ha inũ, mai anu hiweabu binu keyua nai anu merabenã Yushĩ Epa Deus bestitxai hiwea mã hayawẽ taeshũ huni betsa Deus itsa wakĩ: “Epaã”, akĩ kenayamakubaĩshãkãwẽ.

¹⁰ Ha inũ, Deusũ Katua Cristo ha besti matũ tapĩmanikaki. Haskawẽ taeshũ: “Tapĩmanikaã”, akĩ hau matu kenayamanũbũ Deuskiri yusĩkĩ hatu mikiri kẽwãmayamashãkãwẽ.

^11-12 Hakia tsuara natiã keãma Deusũ hatu duawakĩ shanẽ ibuhairawashanikiki. Ha inũ, tsuara natiã ibubis keĩ shanẽ ibukatsis imisbu Deusũ hatu dake wakĩ ana shanẽ ibu wama ishanikiki. Haskawẽ taea maturã, tsuara keãma duapakĩ dasibi mã hatu merabewakubaĩmiswẽ taearã, mã shanẽ ibu ishanaii— akĩ nuku yuitã

^13-14 nasaukei dabeketã betsaburi metukĩ yuikĩ: —Deusũ hãtxa kenenibu yusĩnanãmisbu inũ fariseubu mã beparamebuũ, mã peirawa! Deusũ hãtxa hawẽ hiweti unãbiai nĩka pewama tsuabura Deus shanẽ ibuai anu hikikatsi ikaibu mã hatu nemamiski. Maturi mã hikitirumabia habu betsabu hikipanãbũ mã hatu nemakubainaii.

¹⁵ Hanua maturã, Deusũ hãtxa kenenibu yusĩnanãmisbu inũ fariseubu mã beparamebuũ, maĩ bukĩ iãnẽwã pukebaini bushũ nawa betsa matu keska judeu wanũ ishũ hatũ xinã betsa wamakĩ hatu ikũwãmanũ, iwanã, matũ beya mirima mã hatu tapĩmakĩ matũ txakabu mã hatu binumaibuwẽ taeshũ Deusũ hatu kupihairakĩ txi merã hatu urẽa hiwetxakashãkanikiki.

¹⁶ Hanua maturã, matu bekũ keskatũ hatu yusĩtxakakĩ yuikĩ: “Txanima Templo Deusũ xinãmis keska wakĩ ẽ mia parãmaki, akĩ tsuara yubabiatã hawẽ yuba akama hawẽ nuiama peki”, akĩ mã hatu yusĩmiski. Hakia “Hawẽ Templo meranua ouro pei Deusũ xinãmis keska wakĩ ẽ mia parãmaki, akĩ tsuara haska yubatã hawẽ yuba hau anũwẽ. Hawẽ yuba hãtxa akamarã, txakabuhairaki”, akĩ mã hatu yusĩmiski.

¹⁷ Mã bekũ keskabu inũ mã unaĩsmapabuki. Haratu Deusũ abumismẽ? Peimẽ? Hawẽ Temploraka? Matu yuinũ nĩkairakãwẽ. Hawẽ Templo anushũ yurabũ Deus kẽwãmisbuwẽ taea habũ pei xinãma hawẽ kẽwãti Templo besti xinãkĩ Deusũ abumiski— iwanã

¹⁸ —Hamẽ ana betsa hatu yusĩkinã: “Txanima hawẽ kẽwãti txi tapu fogão Deusũ xinãmis keska wakĩ txani txakakĩ ẽ mia parãmaki, akĩ tsuara yubabiatã txipu parananaĩnã, mã hawẽ nuiama peki”, akĩ mã hatu yuimiski. Hakia: “Hawẽ kẽwãti txi tapu fogão anu inã kuĩ betsa betsapa Deusbe nukunabu hãtxashunikabũ mãtxĩtã hatu kuashũmisburã, Deusũ xinãmis keska wakĩ txani txakakĩ ẽ mia parãmaki, akĩ tsuara haska yubatã hawẽ yuba hau anũwẽ. Hakia yuba hãtxa akamarã, txakabuhairaki”, akĩ mã hatu yusĩriamiski.

¹⁹ Bekũ keska unaĩsmapabuũ, haratu Deusũ abumismẽ? Inãkuĩ mania bestimẽkaĩ? Hanushũ kuakĩ Deus benimawamisbu tapuraka?

²⁰ Matu yuinũ nĩkakãwẽ. Tsuara hawẽ kẽwãti txi tapu fogãokiri yubakakĩ hawẽ inãkuĩkiri dasibi mã yubakariamisbuki.

²¹ Ha inũ, tsuara Templokiri yubakai Deus hanu hiweakiri mã yubakariamisbuki.

²² Ha inũ, tsuara naikiri yubakai hanu Deus hiwea inũ Deusũ dasibi mekei tsauwa shanẽ ibumiskiri mã yubakariamisbuki. Beparamei mã haskamiswẽ taeshũ Deusũ matu kupiaitiã mã nuitapahairashanaii.

²³ Deusũ hãtxa kenenibu yusĩnanãmisbu inũ fariseubu mã beparamemisbuũ, mã peirawa! Matũ piti niswati tibi itxawashũ mekẽ dabeti mãtxĩwãtã Deusbe nukunabu hãtxashunika mãtxĩ betsa inãbiakubaĩmis haska Deusũ hãtxa Moisés yusĩni mã xinãma hawara hawẽ pepawati inũ hawẽ nuiti inũ hawẽ hãtxa betsa watima yunubianikẽ matubu hawẽ hiwekĩ mã hatu uĩmaismaki, kanekinã.

²⁴ Bekũ keska unaĩsmapakĩ matunabũ txakabu peshepixta xiu tiubiakẽ uĩkĩ mã hatu yusĩmiski, hatu pewanũ, iwananã. Hakia matũ txakabu ewapa camelo tiubiakẽ matũ txakabu hawa xinãma mã hawa uĩ e itã heneismaki.

^25-26 Deusũ hãtxa kenenibu yusĩnanãmisbu inũ fariseubu mã beparamebuũ, mã peirawa! Matũ beya txibãkĩ matũ kẽtxa tibi bemakis besti datxukĩ mã napã pewamisbuki. Hakia beparamekĩ yumetsui yauxikĩ hamapai txakabu tibi wai matũ xinã mã pewaisbumaki. Fariseubu bekũ keskabuũ, ha dukũ matũ xinã txakabu uke meranua pewakĩ taewakãwẽ, matũ kẽtxa tibi mã bemakisa datxukĩ mã amis keska wakinã. Haskatã mã hiwei pekũkaĩshanaii.

²⁷ Hanua maturã, Deusũ hãtxa kenenibu yusĩnanãmisbu inũ fariseubu beparamemisbuũ, hunibũ pewakĩ hanu mawabu maiwamisbu mixki tãpe hawẽrua wanũ, iwanã, bemakis hushupawẽ dapushmisbuki. Hakia uke merã shau inũ nami txapui pisi maiai mania tsuã meisbuma

²⁸ keskai maturi beparamekĩ yurabu uĩmai bemakis hawẽrua bestitã parananãkĩ matũ xinã txakabu mã henekĩ pewaisbumaki.

²⁹ Hanua maturã, Deusũ hãtxa kenenibu yusĩnanãmisbu inũ fariseubu beparamemisbuũ, Deusũ hãtxa yuishunikabu inũ yura pepa betsabu mawanibũ hanushũ ana hawẽ shau arukatsi maiwati tãpe pepa washũ hawẽ xinãmati hawẽrua wakĩ mã dami washũ netãbaũmiski.

³⁰ Ha inũ, matũ yuikĩ: “Nukũ shenipabũ Deusũ hãtxa yuishunikabu tenãnibu nukuri hiweshũ nukũ shenipabu nũ hatu merabewama ikeanaii”, mã imiski.

³¹ Hawa unãmabia yuikĩ: “Ẽ shenipabũ Deusũ hãtxa yuishunikabu tenãnibuki”, mã imiski, hawa dakeamarã. Haskakẽ mã pubẽnẽ bababuki, hatu keskarã.

³² Matũ shenipabũ txakabuwakĩ taewanibuwẽ taeshũ mã habũ bababũ habiaskari wakĩ hatu meneshũshãkãwẽ.

³³ Hamẽ maturã, mã paranã dunu pianã keskabuwẽ taeshũ Deusũ matu kupihairakĩ txi merã matu urẽa mã hawawẽ taea pashatirubumaki.

³⁴ Haskawẽ taeshũ matu merabewanũ ishũ ea ikũwaĩ Deusũ hãtxa yuishunika inũ unãnepabu inũ yusĩnãmis pepabu hau yusĩ benũbũ ẽ yunushanaii. Ẽ haska wabiakẽ matũ hatu danãkĩ betsabu tenãkĩ bestibu cruzki hatu mastamakĩ betsabu matũ itxati hiwe merãshũ kuxa kuxa akĩ mae tibi anushũ mã hatu itxakawakĩ bika tenemashanaii.

³⁵ Mã hatu haska washanaibuwẽ taeshũ bebũkiri matũ shenipabũ Adãonẽ bake betsa Abel huni pepa tenãnishũ hanushũ huni pepa betsabu hatuki sinatakĩ tenãkubirãkĩ hawẽ henekĩ Baraquiasĩ bake Zacarias na habia Templo hemaĩtĩ anu txi tapu fogão dapikea tenãnibuwẽ taeshũ maturi Deusũ kupishanikiki.

³⁶ Ikũkĩ ẽ matu yuiaii. Matũ shenipabũ hatu tenãnibu keska xinãkĩ habũ txakabuwẽ taeshũ na habiatiã Israelbu dasibi matube hiweabu Deusũ haturi kupishanikiki— hatu watã

Jerusalém anuabuwẽ taea Jesus punu nukanikiaki, na hãtxarã

³⁷ yurabu uĩbaũkĩ Jesusũ hatu yuikĩ: —Jerusalém anu hiweabuũ, Jerusalém anu hiweabuũ, Deusũ hãtxa yuishunikabu inũ hawẽ hãtxa hatu bana beshũpakeaibu Deusũ hatu yunubiaya hatu danãkĩ hatu tenãkĩ matũ shenipabũ anibu keska wakĩ mixkiwẽ mã hatu tsaka tsaka amisbuki. Takarã hawẽ bake nushamis keska wakĩ eãri matu merabewakĩ matu mekẽnũ ika ẽ hubianikẽ haska xinãma ea danãkĩ mã ea hawa nĩkamaki.

³⁸ Uĩkãwẽ. Matũ mae matũ mesti mã mekẽnũ Deusũ matu heneshanikiki, ana Jerusalém mekeamarã.

³⁹ Hakia hanu ẽ ana huaitiã: “Yavé Deusũ kuxipaya huairã”, ikĩ mã yuiriamarã, mã ana ea uĩyuama ishãkanaii— hatu wabaini