Mateus 19 - Kaxinawá Bíblia (BR)

Hunĩ hawẽ aĩ henetimakiri Jesusũ hatu yusĩnikiaki, na hãtxarã

¹ Hanushũ Jesusũ nuku yusĩ menetã Galiléia anua kaĩkaini kai Jordão hene kesha betsauria leste bari huaikiria Judéia mai pakea hatiuma anu nũ hikiaya

² Jesuski yurã kaiã itxakĩ isĩ teneaibu iweaibu hatu kayawakĩ hatu shushawashũpakeaya

³ hanushũ fariseubu hatiritũ Jesus unãti watã haki beparamẽnũ ika haki kematã yukakĩ: —Hawẽ hamapaiwẽ taeshunã, huninã, hawẽ aĩ henetimẽ?— akabu

^4-5 Jesusũ hatu yuikĩ: —Deusũ hãtxa Moisés nukũ shenipabu yusĩshũ kenenirã, mã uĩsmamẽ? Matu yuinũ nĩkakãwẽ. Deusũ damiwakĩ taewakinã, huni inũ aĩbu damiwaniki. Hanushũ Deusũ Moisés yurabu hatu yusĩmakĩ yuikĩ: “Hunĩ aĩbu aĩwãkatsi hawẽ ibubu dapashkabaini ka aĩyãtã hawẽ aĩbe ketashameawẽ taea ana yura dabema habias yura bestitxai keska hiwetirubuki”, aniki.

⁶ Haskakẽ Deusũ huni inũ hawẽ aĩ yura bestitxai keska hatu wa hunĩ hawẽ aĩ dapashkabaĩkĩ henetimahairaki— hatu waya

⁷ hanushũ fariseubũ Jesus ana yukakĩ: —Hamẽ Moisés nukũ shenipabu yusĩkinã: “Haskakĩ animẽ, tsuãra hawẽ aĩ henekatsi ikĩ habe itimaskatanã, hawẽ taeshũ aĩbu heneti kene inãkĩ: ‘Ẽ mia ana aĩwãmaki’, iwanã, kene inãtã hau tashnibaĩshanũbũwẽ”, akinã, haskakĩ haska hatu ashunimẽ?— akabu

⁸ Jesusũ ana hatu yuikĩ: —Matũ shenipabu huĩti kuxikẽ Moisés haska hatu yununiki. Hakia Deusũ dasibi damiwakĩ taewatanã, haska yunuama iniki.

⁹ Ikũ ẽ matu yuiaii. Hamapai xarabu txani nĩkatã sinatakĩ hawẽ aĩ henetirubumaki. Hamẽ henetã kaĩkaĩ aĩbu betsa aĩwaĩnã, ibubis txakabumisbuki. Hakia tsuãra hawẽ aĩnĩ huni betsa txutamabiatã yuiama parãyanã, hawẽ aĩnã henetiruki— hatu waya

¹⁰ nũ hawẽ tsumabũ Jesus yuikĩ: —Huni aĩyãtã hau ana heneyamashanũbũ Deusũ nemaniwẽ taearã, aĩbu biama txutauma unãnuma hiwea pepamẽkaĩtsa— nũ wa

¹¹ Jesusũ nuku yuikĩ: —Ikũki. Hakia huni dasibibu haska hiwetirubumabiakẽ habu Deusũ katushũ merabewakĩ haska yunumis bestibu haskai hiwetirubuki.

¹² Huni bestibu hubushkuma kaĩyã ewatã txutatirubumaki. Ha inũ, huni bestibu hubushkuya kaĩyã ewai escravo dayaruwakĩ hubushku biabu txutatirubumariki. Hakia huni bestibu hubushkuya kaĩyã ewatã Deusũ hãtxa yusĩ besti dayakĩ txutaisbumariki. Tsuabura haska hiwetiruburã, hau hiwekubainũbũwẽ— nuku waya

Hau Deusũ bake mixtĩbu duawanũ Jesusũ yukashunikiaki, na hãtxarã

¹³ hanushũ mamepipakekĩ hau Deus yukashunũ Jesus anu hatũ bakebu habũ iweaibu nũ hatu nemanũ ika ikaya

¹⁴ uĩkĩ Jesusũ nuku yuikĩ: —Hatũ bake mixtĩbu ea anu iweaibu hatu nemayamakãwẽ. Deus shanẽ ibuaitianã, na bake mixtĩbu eki dateabuma keskabu besti Deuski dasishãkanikiki— nuku watã

¹⁵ bake mixtĩbu mamepipakekĩ Deusũ hau unãnuma duawanũ hatu dasibi yukashũtã hanua kaĩkainaya

Berunã mabu itxapaya Jesusbe hãtxanikiaki, na hãtxarã

¹⁶ hanua berunã betsa mabu inũ bai mirimaya Jesus anu kashũ yukakĩ: —Yusĩnaã, mia yukapa? Hiwea kayabi bikinã, hawa pepa akubaĩkĩ ẽ hiwea kayabi ẽ bitirumẽ? Ea yuiwe— aka

¹⁷ Jesusũ yuikĩ: —Haskakĩ pepatikiri mĩ ea yukai? Deus besti pepaki, mĩ unãmamẽ? Hakia hiwei ikibi ikatsirã, Deusũ yunuti inũ hawẽ nemati txibãkĩ heneyamashãwẽ— aka

¹⁸ berunãtũ Jesus yuikĩ: —Haratumẽ?— aka —Huni betsaki sinatakĩ tenãtimaki. Aĩbu mĩ aĩma txutatimaki. Yumetsutimaki. Huni betsaki txani txakatimaki.

¹⁹ Matũ ibubu duawakubaĩtiki. Haska inũ, mĩ habube hiweabu duawariakubaĩkãwẽ, ibubis nui mã mekemis keskairã— aka

²⁰ berunãtũ ana yuikĩ: —Na dasibi mĩ ea yuiairã, bakeixtatũ tapĩnishũ ẽ heneismaki. Hawa betsa Deusũ yununi ẽ ariamamẽ?— aka

²¹ Jesusũ ana yuikĩ: —Mĩ ea pe yuiaii. Na besti mĩ xinãriamaki. Mia yuinũ nĩkawe. Nai anua Deusũ manakuti pepa bikatsis ikĩ mĩ hawara dasibi haya hatu inã keyutã ha pei mĩ bixiã ha nuitapaibu inãkuĩtã txĩtuãma ebe kakĩ ea txibãkubaĩshãwẽ. Mĩ haskakũkainaiwẽ taeshũ hiwekuĩa kayabi mĩ bishanaii— aka

²² hanushũ berunã mabu itxapa hayatũ Jesusũ haska yuiai nĩkai hawẽ mabuwẽ taea pes huĩti nixmai keyutã ana hawa yuiama kaya

^23-24 Jesusũ nuku yuikĩ: —Ikũkĩ ẽ matu yuiaii. Ha yuinaka ewapa camelorã, ha shumush hawẽ txishuiki hawẽ yura kaĩmakinã, tsuã atirumaki. Hakia haska keska bikarã, huni mabu itxapayarã, hawẽ mabu besti xinaĩ hawẽ nuikĩ hatũ xinã betsa wama Deuski txiti itirubumaki— nuku waya

²⁵ —Habaa!— iki yuinamei: —Haskakenã, tsuabu Deusũ nuku mekekĩ pashawakĩ hiwematirumẽ?— nũ ikaya

²⁶ nukuwẽ nuikĩ Jesusũ ana yuikĩ: —Dateyamakãwẽ. Yurabũ haska watirubumahairabiakẽ Deus nuikipatũ dasibi matu ashũtiruki— nuku waya

²⁷ Pedrõ yuikĩ: —Yusĩnaã, nukunã, mia txibãkatsi ikinã, hawara nũ haya dasibi baxikĩ keyubirã nũ ma mia txibãpakeaii. Nũ haskakiranimarã, nũ hawa hayashanai?— aka

²⁸ Jesusũ ana nuku yuikĩ: —Ikũkĩ ẽ matu yuiaii. Bari hawẽ henei keyuaitiã ẽ Epã dasibi benawaya ẽ habe shanẽ ibuaya txĩtuãma mã ẽ 12 tsumabũ ea txibãkubaĩmisbu ebe shanẽ ibukĩ Israelĩ 12 bakebu shukuakeakeabu mã unãti wanũ bariaii.

²⁹ Haska inũ, tsuabũra ea txibãkĩ Deusũ hãtxa kakape yusĩtanũ ishũ dasibi hatũ hiwe henekĩ hatũ betsabu inũ hatũ puibu shunũbaĩkĩ hatũ ibubu shunũkĩ hatũ bakebu baxikĩ hatũ bai henekĩ keyubaĩ yusĩkubaĩmisbuwẽ taeshũ na habiatiã Deusũ ana hatu manakukĩ duawamisshũ haska uatiã hiwexinawẽma Deusũ pepawẽ hatu manakuhairakĩ haska tanatirubuma hatu itxawamakubaĩxĩshũ hanu ma bari keyuaitiã hiwea kayabi hatu inãshanikiki.

³⁰ Haska inũ, yura itxapabu na habiatiã kẽkĩ yunumisburã, Deusũ hatu kẽwãma ishanikiki. Hakia betsabu na habiatiãri hawa kẽkĩ yunuisbumarã, Deusũ hatu kẽwãkĩ shanẽ ibuhairawashanikiki— iwanã,