Lucas 22 - Kaxinawá Bíblia (BR)

Jesus atxinũ ika yubakanibukiaki, na hãtxarã

¹ Ha Páscoatianã, Egito anushũ Deusũ yunua debuwanika nai tsumã nawã bakebu tenãkĩ judeubũ shenipabu dũkebaini xinãmatitianã, usha dabe ma kemai misi shashama pimisbu ma kemaya

² hawenabu Deusbe hãtxashunika shanẽ ibubu inũ Deusũ hãtxa kenenibu yusĩnanãmisbũ haska washũ Jesus parãshũ hune atxitã tenãkatsi yubakai yuinamei yura itxapabũ Jesus nĩkamisbuki ika mesei dateaibũ

³ hanua Jesusũ 12 tsumabu betsa Judas Iscariotes Satanás hawẽ huĩtiki hikia hawẽ haibuaibu dapashkabaĩ

⁴ Deusbe hawenabu hãtxashunikabu shanẽ ibubu inũ habũ Templo mekenika shanẽ ibubube hãtxai kashũ haska watã Jesus hatu atximashanũ ika hatube yubakaya

⁵ habu benimakĩ yuikĩ: “Nũ mia pei inãshanaii”, akabu

⁶ Judas hukĩ: “Hatiã hanishũ ẽ Jesus hatu hune atximatirumẽ?” ikĩ xinãkĩ taewabiranikiaki.

Bari kaya hawẽ tsumabubetã pikĩ Jesusũ hatu yuba bena wanikiaki, na hãtxarã

⁷ Ha bari Páscoa besi taemisbutiã ha dukũ txashuwã bake tesẽshũ taewamisbutiã habianuri misi shashama pikubaĩmisbutiã

⁸ Jesusũ Pedro inũ João nitxĩkĩ yuikĩ: —Ha Páscoa xinãti nukũ piti pewatãkãwẽ— aka

⁹ yukakĩ: —Hani kashũ bawakĩ pewatãpa?— akabu

¹⁰ Jesusũ hatu yuikĩ: —Bui Jerusalém mae anu hikitã habianuri huni betsã ũpash xumuwãki iabiranai haki nukutã txibãbaĩtãkãwẽ. Mã txibãbaina hanu hikiai uĩtã

¹¹ ha hiwe ibu yukakĩ eska watãkãwẽ: “Nukũ yusĩnã nuku yuishurã, mia yukapa? Haratu dĩtu anushũ ẽ tsumabubetã nukũ Páscoa xinãmati piti pipa?” mã wa

¹² hanushũ dĩtu ewapa manaũri ma pewa matu uĩma hanushũ nukũ piti bawakĩ pewayutãkãwẽ— hatu wa

¹³ hawẽ tsuma dabe kaĩbaini Jerusalém anu hikitã haska Jesusũ hatu yuishu keska ha huniki nukutã txibãbaini habe kashũ hiwe ibu yukatã hanushũ Páscoa besikĩ piti bawa menetã butani

¹⁴ bari kai mexuaya Jesus hawẽ 12 tsuma kuxipayabube hui hikitã tapu dapi dakai bashti ibaĩbaĩshũ piaibũ

¹⁵ Jesusũ hatu yuikĩ: —Ẽ mawariama na Páscoa xinãti matubetã pikatsis ikĩ ẽ manakakubaĩxinaki.

¹⁶ Ikũ Deus danaĩbu hushũ ẽ yamawakĩ keyuriama ẽ ana habiaskari piama ishanaii. Hakia Deus shabakabi shanẽ ibuaya ẽ matubetã ana pishanaii— hatu watã

^17-18 hawẽ Páscoa piti keyukĩ hawẽ kẽtxa tsumashũ Deus kẽwãtã yuikĩ: —Ikũ ẽ matu yuiaii. Ẽ Epa Deusbe shanẽ ibui ẽ ana huriama na uva vinho ẽ ana matubetã ayuama ishanaii. Abaũkãwẽ— hatu watã

¹⁹ Páscoa piti hawẽ henekĩ hatu pima keyutã hanushũ xinãmati bena wakĩ misi betsa bishũ Deus kẽwãtã namakis tũketã hatu inãkĩ yuikĩ: —Na misirã, ẽ matu mawashũshanai xinãti ẽ yura keskaki. Ea xinãbetanã mã pishanai ikis pikĩ taewakãwẽ— hatu wa

²⁰ bitã tureshũ pikubaunaibũ habiaskari wakĩ kẽtxa vinho mata tsumashũ yuikĩ: —Yura itxapabu matu merabewai mawakĩ ẽ himi ẽ matu habashũshanaii. Na vinho ẽ himi keskaki. Hawẽ yubaka bena xinãmatiki. Ea xinãbetanã, mã ashanai ikis akĩ taewabaũkãwẽ— iwanã,

²¹ ana hatu yuikĩ: —Hamẽ matu bestitxaitũ na mã ebetã piaibunã, mã ea hatu atximai kaii.

²² Haska ekiri keneniburã, matũ Hutxi Kayabi Iuwa ẽ haskai mawashanaii. Hakia ha hunĩ ea hatu atximai kairã, peirashãwã!— hatu waya

²³ yuinamei yuka irabebaũkĩ yuikĩ: —Eamẽ, ẽ hatu amashanaitsa? —iake iakei keyutã

Haskatã hatu binutikiri Jesusũ hatu yusĩnikiaki, na hãtxarã

²⁴ hanua hawẽ tsumabu yuinamekĩ yuikĩ: “Jesusbe shanẽ ibui haratu kaya nũ binunãnaĩ kai?” ikaibu

²⁵ Jesusũ nĩkatã hatu xinã betsa wamakĩ yuikĩ: —Nawa shukua tibi shanẽ ibubũ hawenabu hatu bika tenemakĩ yunutxakayamabiakĩ hawenabu hatu kẽwãmakĩ yuimakĩ: “Mĩ shanẽ ibu pepaki”, hatu amamisbu, itxakawabia pepawanikapainũ ikarã.

²⁶ Hakia matunã, haska hatu wayamashãkãwẽ. Hatu keskama eska xinãkubaĩshãkãwẽ, matubunã. Tsuara huni ewabia berunã hawa yuiama yunuabu besti txibãkĩ amisbu keskakĩ matunabu betsabu mã binushanaii. Ha inũ, tsuãra hatu yunubiakĩ matunabu betsabu hatu duawakubaĩshãkãwẽ.

²⁷ Eska yurabũ uĩkĩ xinãmisbuki. Na bashti ika dakashũ pimisbu shanẽ ibuki. Hamẽ hatũ hatu pimakĩ duawairã, shanẽ ibumaki, iwanã, xinãmisbuki. Hamẽ eãnã, matu anushũ matu tapĩmanũ ishũ ẽ matu bestibu duawakĩ uĩmakubainaii. Haska keskakĩ haratutũra ea txibãkĩ betsabu mã binuai mã unãtiruki— iwanã,

²⁸ ana hatu yuikĩ: —Nukunabũ ea unãti wakĩ betsa betsapa ea tenemabiaibũ mã ea heneama ikũkainaii.

^29-30 Haska mã bika tenekubaĩxinawẽ taeshũ ebetã pikĩ hawẽ shanẽ ibu haki tsauti ea dapi tsaushũ Israelĩ 12 bakebũ baba shukuabu tibi hau mã hatu unãti watã mekeshanũbũ haska ẽ Epã ea yunua ẽ habe shanẽ ibumis keskakĩ ebe ẽ matu shanẽ ibumashanaii— iwanã,

Pedro haki dakei mesei kaikiri Jesusũ yuinikiaki, na hãtxarã

³¹ Simão Pedro besti Jesusũ yuikĩ: —Simaoõ, Simaoõ, hawena matu wakatsis ikĩ shekiwã shaka tamisbu keska wakĩ matu unãti wanũ, iwanã, Satanásã Epa Deus ma yukaxinaki. Uĩrawe.

³² Habiaskabiakẽ ea txibaĩ hau mĩ huĩti babuyamanũ eãri Epa Deus ma ẽ mia yukashũxinaki. Mia haska wa kanebiatã ana ea txibã taewakĩ ikũwaĩ betsabu hau txĩtũyamanũbũ hatu kuxipa wakĩ merabewakubaĩshãwẽ— aka

³³ Simão Pedrõ xinã pewama yuikĩ: —Yusĩnaã, haskamaki. Mibe kai bitxiti hiwe anu ka kasmai hanu mĩ mawai anu ẽ mibe kaii, hawa dateamarã— aka

³⁴ haska waya Jesusũ nemakĩ: —Pedroõ, mĩ haskamaki. Na habia mexu merã pena kemaya takara keuriama yuikĩ: “Ẽ ha unãmaki”, iki txanima dabe inũ bestiki mĩ eki dakekĩ yui kaii— atã,

Jesusũ hawẽ tsumabu henebaĩkatsi mapui hau haskashanũbũ hatu yununikiaki, na hãtxarã

³⁵ hanushũ Jesusũ hawẽ tsumabu yunua butanimabu hatu yukakĩ: —Mã yusĩtanũbũ peiuma inũ kapãkaũma inũ tae pewetametia benauma ẽ matu nitxiã mã katanimarã, hawa mã yupaimamẽ?— hatu wa habũ kemakĩ: —Haskamahairaki. Dasibi nũ hayaimaki— ikaibũ

³⁶ Jesusũ ana hatu yuikĩ: —Natianã, matu ana nitxĩti ẽ betsa waii. Tsuara mã pei haya bushãkãwẽ. Tsuara mã piti haya bushãkãwẽ. Tsuara mã hawẽ detenameti hayamarã, matũ dakukuti betsa inãnanãtã hawẽ detenameti bishãkãwẽ.

³⁷ Na eska ẽ matuki txaniairã, haska ea wakĩ binumama meneshanaibu Isaíasĩ kenekĩ yuikĩ: “Huni txakabu yuibaũshãkanikiki”, ani ikũ ekiri keneni dasibi betsa teshewama ea ashãkanikiki, ewẽ menekinã— hatu wa

³⁸ hawẽ tsumabũ yuikĩ: —Shanẽ Ibuũ, nũ ma dabe hayaki, hawẽ detenametirã— aka hatu yuikĩ: —Peki. Harakiri ana ẽ matu yuitimaki —Jesusũ hatu watã

Getsêmani anu ka Jesus Deusbe hãtxanikiaki, na hãtxarã

³⁹ Jerusalém anua kaĩkaĩkĩ hawẽ tsumabu iyui hanu kamis anu Oliveiras Mati mapetã

⁴⁰ hanushũ hatu yuikĩ: —Matuki txakabu hikiaya mã kaneyamanũbũ Deusũ hau matu merabewanũ ushama habe hãtxakãwẽ— hatu watã

⁴¹ hatu henebaini kai tsuãra hatishũ tĩ ikimẽkaĩ ishũ mixki ture putabu kai tĩ imistishũ Jesus ka dãti itã hawẽ Epa yukakĩ

⁴² yuikĩ: —Epaã, hamapai dasibi mĩ atiru ẽ unaiĩ. Ẽ mawayamanũ mĩ nematirubia ẽ xinaĩ keska ea akama mĩ xinãnẽ besti ea ashãwẽ— ikaya

⁴³ ha haskaitiã nai anua Deusũ nai tsuma tashnitã merabewakĩ kuxipa watuxiaya

⁴⁴ hanu bika tenetxakayamai mesteã daka anua niskãhairai himi keska tuis tuis ikĩ mai metxa watã

⁴⁵ Deusbe hãtxai menetã benikirã hawẽ tsumabuki nukuyushũ huĩti nixmahairatã ushabu betxitã

⁴⁶ Jesusũ hatu yuikĩ: —Haskai mã ushamẽ? Bestẽtã txakabu huaya mã kaneyamanũ Deusbe hãtxakĩ hau matu merabewanũ yukakãwẽ— hatu wai

Jesus unãmamabaĩ atxinibukiaki, na hãtxarã

⁴⁷ Jesus hawẽ tsumabube hãtxa meneriama huni itxapabube Judas hui hatu bebushũkirani Jesuski nukutuxitã tãtsu akaya

⁴⁸ Jesusũ yuikĩ: —Judasiĩ, hawẽ abuti tãtsu akaiwẽ unãmakĩ mĩ Hutxi Kayabi Iuwa mĩ ea hatu atximai?— akaya

⁴⁹ Jesusbe mapuabũ haskabiranabu unãkĩ yukakĩ: —Shanẽ Ibuũ, na eskabirãkãshurã, matxatuwẽ hatu detekĩ nemapa?— ikaĩ

⁵⁰ betsã hawenabu Deusbe hãtxashunikabu shanẽ ibuhairatũ tsuma hawẽ pabĩki yusiuria maebaĩ mapeshpaikĩ pashteaya

⁵¹ Jesusũ nemakĩ hatu yuikĩ: —Mĩ ma ashuki. Hatu haska wayamakãwẽ— iwanã, hawẽ pabĩki pashtea tĩ ika bishũ patsãkĩ Jesusũ shushawatã

^52-53 hawenabu Deusbe hãtxashunikabu shanẽ ibubu inũ hatũ Templo mekenika shanẽ ibubu inũ mae shanẽ ibu beshmasbũ Jesus atxinũ ika beabu Jesusũ hatu txitekĩ yuikĩ: —Shaba tibi hanushũ Templo hemaĩtĩ anushũ ẽ matu yusĩkubainai mã ea atxiama ikũkaĩxinaki. Haskai natiã yumetsu atximisbu xinaĩ hawẽ deteti nupe txaipaya inũ hawẽ kuxati hiya mã bekãshumẽ? Natiã txanima txakabu dayaya ha merabewamai mã ea atxinũ ika bekãshuki— hatu wa

Jesuski Pedro dakekĩ paranikiaki, na hãtxarã

⁵⁴ nĩkamas Jesus atxishũ hawenabu Deusbe hãtxashunika shanẽ ibuhairatũ hiwe anu iyuaibũ Pedro datekĩ benãta txipu kakĩ txibãkubaina

⁵⁵ hanu shanẽ ibũ hemaĩtĩ txi ketiã yui tsaubaunabube Pedro hatube tsauwa hune yuaya

⁵⁶ hanua aĩbu dayaru hushũ Pedro txĩ yuai uĩ kayati watã hatu yuikĩ: —Na huni matube tsauwarã, hawẽ tsuma betsaki— akaya

⁵⁷ Pedrõ parãkĩ yuikĩ: —Aĩbuũ, hamaki. Ẽ ha unãmaki— ikaya

⁵⁸ hakimamari betsãri betxishũ yuikĩ: —Miarã, mĩ habia hatube uĩnãmãri— aka Pedrõ ana yuikĩ: —Haskamaki. Earã, ẽ hamaki— aka

⁵⁹ hanua hakimatsais katã Pedro metukĩ huni betsã unãshubima mapuabu yuikĩ: —Ikũki. Na hunirã, habe nimiski. Habia Galiléia anuabu hãtxa nũ nĩkaii— ikai

⁶⁰ nĩkatã Pedro datekĩ yuikĩ: —Ha hari mĩ haska yuiairã, ẽ unãmaki— ikaya ha haskaitiã takara keuwaya

⁶¹ Jesus nasaukekawã Pedro uĩayã haska Jesusũ Pedro yuia: “Takara keuriama yuikĩ: ‘Ẽ ha unãmaki’, ikĩ txanima dabe inũ bestiki mĩ eki dakei parananãshanaii”, aka haska xinaĩ

⁶² hanua Pedro tashnikaĩ kashatxakayamaya

Shanẽ ibubu Sinédrio anu Jesus iyunibukiaki, na hãtxarã

^63-64 habianushũri habũ Jesus atxibirã itxakawakĩ besu beputã kashe wakĩ kuxa kuxa akĩ yuikĩ: —Tsuã mia kuxaimẽkaĩ? Unãtã nuku yuiwe— akubaĩkĩ

⁶⁵ betsa betsapa yuikĩ itxakawaxĩkĩ

⁶⁶ hanua bari txi pesheaya mae yununika shanẽ ibubu inũ Deusbe hawenabu hãtxashunika shanẽ ibubu inũ, Deusũ hãtxa kenenibu yusĩnanãmisbu na Sinédrio itxabu anu Jesus hatu iyushunabu

⁶⁷ habũ yukakĩ: —Habia mĩ miamẽkaĩ, nukũ Messias Cristorã? Menã nuku yuiriwe— akabu Jesusũ hatu yuikĩ: —“Txanima ẽ haki”, iwanã, ẽ matu yuibia mã ea ikũwãtirumaki.

⁶⁸ Ha inũ, hawara eãri ẽ matu yukabia mã ea yuitirubumaki.

⁶⁹ Habiaskabiakẽ ẽ matu yuiai nĩkakãwẽ. Na habiatiã mã ea tenãbia Deus kuxipahaira dasibi binuatũ yusiuri ẽ tsauwa ẽ matũ Hutxi Kayabi Iuwa ẽ habe shanẽ ibukũkaĩshanaii— hatu wai

⁷⁰ nĩkatã dasibibũ yukakĩ: —Haskakenã, habia mĩ Deusũ bakeraka ikai?— akabu Jesusũ hatu yuikĩ: —Ibubis matũmebi habiari mã yuiaii— hatu wa

⁷¹ hanua haki sinatai haburi yuinamei: —Hawẽ keshawẽ Deus itxai hamebi txakabuikiki. Haskai nũ nĩkaiwẽ taeshũ hau tenãnũbũwẽ— itã yuinametã