Lucas 18 - Kaxinawá Bíblia (BR)

Punu nukama Deus yukatikiri miyuiwẽ yusĩnikiaki, na hãtxarã

¹ hanushũ hawẽ tsumabũ Deus kuxipa yukai hau punu nukayamashanũbũ miyuiwẽ Jesusũ hatu yusĩkĩ

² yuikĩ: —Mae betsa anu juiz hiweshũ Deuski meseama huni betsã hãtxa nĩkaismari

³ habias mae anua yushabu hawẽ bene ma mawayama hau ea merabewanũ ika juiz anu kashũ yuikĩ: “Huni betsã ea itxakawakĩ paraĩkiki. Merabewakĩ ea pewashũwẽ”, abirã abirãkĩ txikix waya

⁴ ha dukũ hawẽ hãtxa nĩkama ikũkaĩkĩ hanushũ atimas xinãkĩ: “Yurabuwẽ nuiama Deuski ẽ meseamabia

⁵ natũ ea daketapa wabirãbiranaiwẽ taeshũ ẽ nemashuni kaii. Ẽ haska washunamakẽ hukirã hukirãkĩ ea punu nukawatiruki”, ishũ merabewaniki— iwanã,

⁶ ana Jesusũ hatu yuikĩ: —Ha juiz txakabũ haska wamisbũ

^7-8 hamẽ Deusũ nuku merabewakĩ habũ matu txakabuwakatsi ikaibu nemairã, hawẽ xinã betsahairaki. Hawẽ katuabu Deusũ matu merabewakĩ bariri inũ mexu merã mã ea atã manaibu nĩkatã manama hawaira hatu nemakĩ matu pewashũmiski. Haskawẽ taea ea matũ Hutxi Kayabi Iuwa ẽ ana huaitiã habũ ea ikũwãkĩ henekubainabuma ẽ hatu betxituxishanimẽkaĩ?— iwanã,

Fariseu inũ pei bishunikakiri Jesusũ miyuiwẽ hatu yusĩnikiaki, na hãtxarã

⁹ hanua itxapa mapushũ nĩkaibukiri habu hatiri ibubis kẽkĩ xinaĩ beparamei: “Ea besti ẽ pepaki. Hakia betsaburã, haskaisbumaki”, ikĩ hatu danãmisbu Jesusũ ana miyui betsawẽ hatu yusĩkĩ hatu dabĩwãkĩ yuikĩ:

¹⁰ —Templo hemaĩtĩ anu huni dabe Deusbe hãtxai bua mapuabukiri matu yuinũ nĩkakãwẽ. Ha huni daberã, betsa Moisés yusĩa inũ hawẽ shenipabu betsabũ yusĩa txibãhairamis fariseuki. Ha inũ, betsarã, Romanawa shanẽ ibu pei bishunikaki.

¹¹ Haskakaĩ fariseu nia naiuri besushũ Deus dayuikĩ: “Deusuũ, yura betsabu keskama ẽ pewẽ taeshũ ẽ mia kẽwaiĩ. Yumetsumisbu inũ, parananãmisbu inũ, txutanamebaũmisbu inũ, ha pei bishunika txakabu ẽ hatu keskamaki.

¹² Ha inũ, semana tibi shaba dabe mia kẽwaĩ ẽ samakemiski. Ha inũ, hamapai dayakĩ bishũ mekẽ dabeti pashkatã bestitxai mĩ kẽwãti hiwe mekenikabu ẽ inãkuĩmiski”, iki ibubis keãyã

¹³ hanua ha Romanawa shanẽ ibu pei bishunika hawa keãma benãta niriashũ hawa naiuri besuama dakei aitĩ iki shutirĩ shutirĩ ikĩ yuikĩ: “Deusuũ, mĩ hãtxa ẽ kanemisbiakẽ ewẽ nuikĩ ẽ txakabu ea buashũwẽ”,

¹⁴ abaini inũ kaya Deus hawẽ nuikĩ hawẽ txakabu buashũkĩ pewashunimaki. Hakia fariseũ hãtxa nĩkama Deusũ hawa buashunama ikimaki. Haskakẽ tsuabura ibubis kẽmis Deusũ dake washanikiki. Hakia tsuabura keĩsma Deusũ duawashanikiki— hatu wa

Bake mixtĩbu unãnuma wakĩ Jesusũ Deus hatu yukashunikiaki, na hãtxarã

¹⁵ hanua hatũ bake mixtĩbu Jesus anu iwekĩ hau ea mamepikĩ uĩshũkĩ Deus ea duawamashunũ, iwanã, habũ hatũ bake iwebirãbiranaibu Jesuski txiti ikabũ uĩkĩ hatu nemaibũ

¹⁶ nãtashũ hatu haska waibu Jesusũ hatu kenashũ yuikĩ: —Hatũ bake mixtĩbu ea anu iweaibu hatu nemayamakãwẽ. Deus shanẽ ibuaitianã, na bake mixtĩbu eki dateabuma keskabu besti Deuski dasishãkanikiki.

¹⁷ Ikũ ẽ matu yuaii. Bake mixtĩbũ hawẽ ibu abumis keska wakĩ Epa Deus abuabuma Deus shanẽ ibuaitiã haki dasiama ishãkanikiki— hatu wa

Huni shanẽ ibu mabu itxapaya Jesusbe hãtxanikiaki, na hãtxarã

¹⁸ hanushũ shanẽ ibu betsã Jesus yukakĩ yuikĩ: —Yusĩnã pepaã, mia yukapa? Hiwea kayabi bikinã, haska kayatã ẽ bitirumẽ? Ea yuiwe— aka

¹⁹ Jesusũ yuikĩ: —Haskakĩ ea kenakĩ: “Pepaã”, mĩ ea wai? Deus bestiki, peparã, mĩ unãmamẽ?

²⁰ Mianã, Deusũ yunuti inũ hawẽ nemati mĩ ma unaĩnã: “Aĩbu mĩ aĩma txutatimaki. Sinatakĩ yura betsa tenãtimaki. Yumetsutimaki. Yura betsaki txanitxakatimaki. Parananãtimaki. Ha inũ, mĩ epa inũ mĩ ewa hatu duawakubaĩtiki”— aka

²¹ haska wa ana shanẽ Ibũ Jesus yuikĩ: —Haa. Dasibi Deusũ yunuti inũ hawẽ nemati bakeixtatũ tapĩnishũ heneama ẽ txibãkubaĩmiski— aka

²² nĩkatã Jesusũ uĩ hawẽ nuikĩ ana yuikĩ: —Mĩ pe ea yuiaii. Na besti mĩ xinãriamaki. Mia yuinũ nĩkawe. Nai anua Deusũ manakuti pepa bikatsis ikĩ mĩ hawara dasibi mĩ haya hatu inã keyutã ha pei mĩ bixiã ha nuitapaibu inãkuĩtã txĩtuãma ebe kakĩ ea txibãkubaĩshãwẽ. Mĩ haskakũkainaiwẽ taeshũ hiwekuĩa mĩ bishanaii— aka

²³ hakia huni mabuhairayatũ Jesusũ haska yuiai nĩkai pes huĩti nixmai keyutã ana hawa yuiama hawẽ mabuwẽ nuiaya

^24-25 Jesusũ uĩkĩ ana yuikĩ: —Ha yuinaka ewapa camelorã, ha shumush hawẽ txishuiki hawẽ yura kaĩmakinã, tsuã atirumaki. Hakia haska keska bikarã, huni mabu itxapayarã, hawẽ mabu besti xinaĩ hawẽ nuikĩ hatũ xinã betsa wama Deuski txiti itirubumaki— hatu wa

²⁶ hanushũ habũ Jesusũ hãtxa nĩkatã yukakĩ: —Haskakenã, tsua Deusũ nuku mekekĩ pashawakĩ hiwematirumẽ?— ikaibũ

²⁷ Jesus hatuwẽ nuikĩ yuikĩ: —Dateyamakãwẽ. Yurabũ haska watirubumahairabiakẽ Deusũ besti matũ xinã matu betsa wamatã dasibi matuwẽ nuikĩ matu ashũtiruki— hatu waya

²⁸ Pedrõ yuikĩ: —Shanẽ Ibuũ, nukunã, mia txibãkatsi ikinã, nukũ hawara nũ haya dasibi baxikĩ keyubiranimashũ nũ ma mia txibãpakeaii— akaya

²⁹ Jesusũ ana hatu xinãmakĩ yuikĩ: —Ikũ ẽ matu yuiai nĩkakãwẽ. Tsuabũra ea txibãkĩ Deusũ hãtxa kakape yusĩtanũ, ishũ matũ hiwe shunũkĩ matũ ibubu shunũkĩ matũ betsabu baxibaĩkĩ matũ aĩ shunũyubaĩkĩ matũ bakebu baxikĩ keyuyubaĩshanaibu

³⁰ na habiatiãri dayaibu Deusũ pepawẽ matu duawakĩ manakukubaĩxĩshũ habiaskari wakĩ nai anuri matu habe hiwekuĩmashanikiki, ikibi imakinã— hatu wabaini

Mawashanaikiri dabe inũ bestiki Jesus hatuki txanikiaki, na hãtxarã

³¹ hanushũ hawẽ 12 tsumabu besti hatu kenashũ Jesusũ hatu tari iyushũ yuikĩ: —Jerusalém anu nũ ma mapekei kairã, mã unaiĩ. Nũ hanua haskashanaikiri matu yuinũ nĩkakãwẽ. Deusũ hãtxa yuishunikabũ ea matũ Hutxi Kayabi Iuwakiri ekiri kenenibu menekĩ ea ashãkanikiki.

³² Hanushũ eki sinatakĩ ea atxishũ nawabu anu ea iyushũ inãbu habũ ea txitekĩ itxakawakĩ eki kashekĩ eki kemu mitxukĩ

³³ ea kuxa kuxa ashũ ea tenãbu shaba dabe inũ besti kaya ẽ ana bestẽshanaii— hatu wabia

³⁴ hawẽ 12 tsumabũ hawẽ hãtxa nĩkabiakĩ hawa hatu yuiai dabanẽ hawa shabakabi nĩka pewatiruma ibainaibũ

Jericó bai keshakea huni bekũ Jesusũ bepeshnikiaki, na hãtxarã

³⁵ hanua Jerusalémkiri kai mae ewapa betsa Jericó anu kemaya bai kesha huni bekũ tsaushũ pei hatu ea akĩ nĩkaya

³⁶ yura itxapabũ daĩbainaibu nĩkatã yuka ikaya

³⁷ betsabũ yuikĩ: —Jesus Nazaré anua kawani ikikiki— akabu

³⁸ hãtxa kuxipawẽ yuikĩ: —Davĩ babaã, ewẽ nuiwe— akaya

³⁹ bebubaĩkĩ nemapaibiabu nĩkama unãshubima hatu binumakĩ yuikĩ: —Davĩ baba Jesusuũ, ewẽ nuiwe— ikaya

⁴⁰ Jesus niti itã hunibu hatu yunukĩ: —Iwekãwẽ— hatu wa iweabu txaimashũ yukakĩ:

⁴¹ —Mia haska wapa?— aka huni bekũmã yuikĩ: —Shanẽ Ibuũ, ana ẽ uĩnũ ea bepeshwe ika ẽ ikaii— aka

⁴² shushawakĩ Jesusũ yuikĩ: —Ana uĩriwe, mĩ ea ikũwaĩwẽ taea mĩ shushairã— akaya

⁴³ hawaira bepeshetã Deus kẽwãkĩ Jesus txibãbainaya itxapabũri Jesusũ haska wai uĩtã dasibibũ Deus kẽwãbainaibũ