Lucas 11 - Kaxinawá Bíblia (BR)

Haskai Deusbe hãtxatikiri Jesusũ yusĩnikiaki, na hãtxarã

¹ Ana betsatiã Jesus ka Deusbe hãtxai meneaya hawẽ tsuma betsã ea akĩ yukakĩ: —Shanẽ Ibuũ, haska Joãonẽ haki txiti ikabu yusĩma keska wakĩ Deusbe hãtxai harakiri itimẽkaĩ nuku yusĩwẽ— aka

² Jesusũ hatu yuikĩ: —Deusbe hãtxakĩ yuikinã eska watiki: ‘Epaã, mĩ kena meribirã, mia duawakĩ hau mia kẽwãkubainũbũwẽ. Nai anua shanẽ ibukĩ mĩ yunua haska txibãmisbu keska wakĩ nenushũri nũ mia txibãkatsis ikaibu mĩ xinã besti nuku txibãmakĩ nuku merabewakubaĩwẽ.

³ Ha inũ, nuku mekekĩ na habiatiã haska mĩ nuku ashuaĩ nũ piyunũ piti nuku inãkubaĩwẽ.

⁴ Ha inũ, tsuabũra nuku txakabuwaibu hatu hakimawakĩ hatũ txakabu nũ ana haska xinãmawẽ taeshũ nũ mia txakabuwai buashũtã ana haskakiri nuku xinãmayamawe. Ha inũ, nũ kaneyamanũbũ hawara nũ hawẽ kemumis kaĩyaĩ nuku nemashũkubaĩwẽ’, atiki— iwanã,

^5-6 miyuiwẽ ana hatu shabakabi yusĩkĩ: —Matuburã, mã haibu tibiyaki. Yamenapũ mĩ haibũ hiwe anu kashũ kenakĩ: “Sheshei, sheshei, mĩ ushamẽ?” mĩ wa: “Hawamẽ?” ikaya: “Nukũ haibu eki bai hushu ẽ hawa pimatimaki. Misi dabe inũ besti ea inãyuwe”, mĩ wa

⁷ hawẽ hiwe merãshũ mia nemakĩ yuikĩ: “Ma ẽ bakebube inakĩ beputi ẽ besheaki. Haska butukaĩ ẽ mia inãtimaki. Ea txikix wama kariwe”, mia wabia

⁸ mĩ hawẽ haibuwẽ taea txikixkĩ mia inãkatsi ikama ibiaya nĩkamas daketapa wakĩ mĩ yuka heneamawẽ taeshũ butushũ hawara mĩ bikatsis ikai mia inãtiruki.

^9-10 Haska wakĩ tsuãra Deus yukakĩ ea akarã, hawẽ hawara inãmiski. Tsuãra hawara benakĩ Deus yukarã, haki nukumamiski. Tsuãra hawara bi hikinũ ishũ Deus kenarã, bepẽshũmiski. Hawara mĩ yuka mia ashũtiruki. Benakĩ hawara mĩ yuka mia betximashanikiki.

¹¹ Ha inũ, betsarã, mĩ bakẽ baka mia ea aka haki dakekĩ dunu mã inaĩsmaki.

¹² Ha inũ, takara batxi mia ea aka haki dakekĩ nibu mã inaĩsmariki.

¹³ Haskakẽ mã pepamabia matũ bakebu mã duawamis mã unaiĩ. Hamẽ haska binumakĩ Epa Deus nai anuatũ mã tsuabũra yukai nĩkatã hawẽ Yushĩ Pepa matu inãmiski— hatu wanikiaki.

Jesus Satanásã kuxipa besti hayaki, akĩ yuãnibukiaki, na hãtxarã

¹⁴ Ana betsatiã yushĩ txakabũ huni betsa huyu wayama Jesusũ nitxiã kaĩkainaya huni ana hãtxai taeaya yurã kaiãnẽ uĩ yuinamei: “Habaa! Narã, huni kuxipa pehairaki”, ikaibũ

¹⁵ hakia hatiritũ yuikĩ: —Na hunirã, yushĩ txakabu shanẽ ibu Belzebũ kuxipa hayaki. Haska bestiwẽ taeshũ yushĩ txakabu hatu kaĩmaikiki— ikaibũ

¹⁶ betsabũ Jesus unãti wanũ, ishũ Jesus yuikĩ: —Deus anua hawẽ unãti dami nuku ashũwẽ, mĩ hawẽ kuxipa haya nũ uĩnunã— akabu

¹⁷ hatũ xinãnẽ kaneaibu unãkĩ Jesusũ hatu yuikĩ: —Mae betsa anu hatũmebi pashkatã detenamei hatũmebi debui keyumisbuki. Ha inũ, habias yurabu pashkai hatũmebi henenamei yamai keyuriatirubuki.

¹⁸ Habiaskari wakĩ Satanásã hawenabu yurabu anua kaĩma hawẽ yura punu nukai babui keyukeanaii. Ha inũ, Belzebũ kuxipa ẽ haya hawenabu ẽ kaĩmama ikeanaii.

¹⁹ Hamẽ eãnã, Belzebũ kuxipawẽ ẽ yushĩ txakabu kaĩmaya matũ tsumabunã, tsuã kuxipawẽ yushĩ txakabu kaĩmakanimẽkaĩ? Haskakẽ mã kanehairai habũ matu txitekĩ ha ashanikiki.

²⁰ Hamẽ ikũ Deusũ kuxipawẽ eã ẽ yushĩ txakabu kaĩmamiswẽ taea Deus matuki bai ma huaki.

²¹ Haskakĩ mã kanehairai matu yuinũ nĩkakãwẽ. Huni kuxipa hawẽ pia inũ hawẽ kuxatiyatũ hawẽ mae pe mekeaya tsua hikikaĩ yumetsutirumaki.

²² Hakia huni betsa ha binũa hushũ maemakĩ hawẽ yura hunekĩ mekemis inũ hawẽ pia inũ hawẽ kuxati mebĩshũ hawẽ hamapai ibu watã hawẽ haibuaibu inãbaũmiski. Eãnã, Belzebu binukĩ hawẽ kuxipa hatuwẽ dayai mebĩtã ena ẽ watiruki.

²³ Ẽ haskakẽ tsuãra ea haibuwama ea nemaikiki. Ha inũ, tsuãra huni betsabu ea txibãmama hatu eki dakemamisbuki— iwanã,

Yushĩ txakabu kaĩkaina txĩtũmiskiri Jesusũ hatu yusĩnikiaki, na hãtxarã

²⁴ miyui betsawẽ hatu yuikĩ: —Huni betsa anua yushĩ txakabu kaĩma kai huĩrukũkatsi iki hanu ũpash hayama anu kakũkaũkĩ hanu huĩrukũti pepa betxiama xinãkĩ:

²⁵ “Ẽ hanu hiwea ẽ kaĩkirãxina anu ẽ ana txĩtũkainaii”, ikaini kashũ ha yura merã hiwe shaka matsua keska hawa hayama betxitã

²⁶ kashũ ana sete yushĩ betsa txakabuhaira hatube dasikirã, ha dukũtũ ha yura itxakawakĩ mirĩwaima ana binumakĩ pikuhairamisbuki— ikĩ

Jesusũ hãtxa nĩkai benimati kayabi haya hatu yuinikiaki, na hãtxarã

²⁷ Jesusũ hatu yuikĩ meneriama yurã kaiã naxui ishũ hãtxa kuxipawẽ aĩbũ yuikĩ: —Mĩ ewa mia kaĩshũ mia txutxu amaniwẽ taea benimahairaikiki— aka

²⁸ Jesusũ aĩbu yuikĩ: —Txanima habiaskaki. Hakia tsuabũra Deusũ hãtxa nĩkakĩ txibãmisbũ ẽ ewa binui ana benimahairakanikiki— hatu waya

Hawẽ dami wati kuxipa yukamisbu Jesusũ hatu yusĩnikiaki, na hãtxarã

²⁹ hanua ana haki yurã kaiã itxabirãbirani mapubaunaibũ Jesusũ hatu yuikĩ: —Nukunabu na habiatiã mã hiweaburã, mã txakabuki. Hamapai Deus anua unãti tsuã atiruma uĩkatsi mã ea yukabiamisrã, Deusũ Jonas bakawã sheamaxina ana kaĩma hiwenirã, haska keska besti Deusũ matu uĩmakĩ matu ashũriashanikiki. Xinãkãwẽ.

³⁰ Nínive mae ewapa anu kashũ hau hatu yusĩtanũ Deusũ Jonas yunua nĩkama mae betsa anu pashai shashuwẽ kai iãnẽwã merã hasa bakawã ewapatũ shea shaba dabe inũ besti ka hanã Jonas ana besteãwẽ taeshũ Nínive anuabũ unãkĩ hatũ xinã betsa watã Deus kẽwãnibuki. Hamẽ earã, matũ Hutxi Kayabi Iuwa mawa ẽ habiaskariaya bestibu mã ea ikũwãshanaii.

³¹ Haska inũ, betsarã, nawa aĩbu shanẽ ibu sulkiri txaihaira Sabá mai pakea anu hiwea nukũ shenipabu Salomãonẽ hãtxa unãnepa nĩkatanũ ika huniki. Salomão ẽ binuhairabiakẽ mã ea nĩkakatsi ikabumawẽ taeshũ hanu matu kupiaitiã ha nawa aĩbu shanẽ ibũ matu ha atxakayamashanikiki.

³² Ha inũ, Nínive anuabu Jonasĩ Deuskiri hatu yusĩa nĩkakĩ hatũ xinã betsa watã Deus ikũwãnibuki. Hamẽ eãnã, ẽ Jonas binuhairabiakẽ tsuã mã ea nĩkakĩ matũ xinã mã betsa wakatsi ikamawẽ taeshũ hanu kupiaitiã Nínive anu hiwenibũri matu ha ariashãkanikiki— iwanã,

Bĩkiri miyuiwẽ Jesusũ hatu yusĩnikiaki, na hãtxarã

³³ ana hatu yusĩkĩ: —Bĩ dekushũ hune anu tsauĩsbuma inũ hi bauwẽ atximaisbumaki. Hakia hikikĩ hau uĩnũbũ dekushũ manaũri tsaũmisbuki.

³⁴ Haska keskari matũ yura anurã, matũ berurã, bĩ txasha keskaki. Haskakiri matu yusĩnũ nĩkakãwẽ. Matũ beruwẽ mã uĩmiski. Matũ xinãwẽ matũ yura pepa haya kemuama mã shabakabi meke pewaki.

³⁵ Hakia mã bĩ hayarã, mã mexu merã hiwea keskatirubumaki. Uĩrakubaĩkãwẽ.

³⁶ Hamẽ tsuabura Deusũ mekea bĩ txasha keskawẽ txakabuuma mã pe besti xinãshanaii, kaneamarã— hatu watã

Fariseu inũ Deusũ hãtxa yusĩnanãmisbu Jesusũ txitenikiaki, na hãtxarã

³⁷ hanua Jesus hãtxai meneaya fariseu betsã pimakatsi hawẽ hiwe anu iyua Jesus hikikaĩ tapu dapi tsaushũ piaya

³⁸ fariseũ uĩ e iki tekuitã yuikĩ: —Nukũ shenipabũ beya txibãkĩ piriama mĩ mepanuamamẽ?— aka

³⁹ Jesusũ yuikĩ: —Fariseubũ mã xinãmiskiri mia yuinũ nĩkawe. Matũ beya txibãkĩ matũ kẽtxa tibi bemakis besti datxukĩ mã napã pewamisbuki. Hakia yumetsukĩ hamapai txakabuwatã uke meranua matũ xinã mã pewaisbumaki.

⁴⁰ Mã unaĩsmapabuki. Bemakia hawara mã uĩtiru txukakĩ mã pewabiamis matũ huĩti uke merã txakabubiakẽ mã unaĩsmaki. Matũ mekẽ mã uĩtiru inũ hawara uke merã mã haya habias Deusũ damiwaniki. Xinaĩrakãwẽ.

⁴¹ Ha inũ, ha dukũ matũ xinã pewatã Deus duawakatsi ikĩ yauxiama nuitapaibu inãkuĩ mã pepakũkaĩshanaii.

⁴² Fariseubuũ, mã peirawa! Matunã, mã kanekubaĩmisbuki. Matũ piti nis wati itxawashũ maspu mekẽ dabeti washũ bestitxai Deus kẽwãti hiwe anu dayanikabu merabewakĩ mã hatu inãkuĩmiski. Haska pewabiai haska Deusũ hãtxa Moisés yusĩni mã xinãma hawara hawẽ pepawati inũ hawẽ nuiti inũ hawẽ hãtxa betsa watima yunubianikẽ matubu hawẽ hiwekĩ mã hatu uĩmaismaki, kanekinã.

⁴³ Fariseubuũ, maturã, matũ itxati hiwe anu hikikaĩ haki tsauti pepa hanu dasibibũ matu uĩtirubu anu mã tsaukatsis imisbuki. Ha inũ, bai tanai nia hau ea duawanũbũ, ika kemutapa mã nimiski. Mã haskaya Deus matuki sinatamis mã nuitapaii.

⁴⁴ Maturã, mã beparamemisbuki. Matunabu yusĩ txakakĩ hatu parãkĩ mã hatu kanemakubaĩmisbuki, tsuara mawa maiwanibu anu nitimabiakẽ unãma hamamaki haki paia keskakinã— akaya

⁴⁵ hawẽ hãtxaki sinatakĩ Moisés keneni yusĩnanãmis betsã Jesus yuikĩ: —Habaa! Yusĩnaã, haska yuikĩ nukuri mĩ nuku txiteaii— aka

⁴⁶ Jesusũ yuikĩ: —Moisés hãtxa yusĩnanãmisbuũ, maturã, fariseubu keskai maturi mã peirawa! Shãkamahaira matunabu iama keska wakĩ yusĩa tsuã txibãtirubuma mã hatu yusĩbiakĩ haska mã hatu yusĩmis ibubis txibãma hanua mã hatu merabewaismariki.

^47-48 Maturã, mã dakeisbumaki. Matũ shenipabũ Deusũ hãtxa yuishunikabũ yusĩaĩbu danãkĩ hatu tenãshũ maiwanibu haska besti xinãkĩ matũ shenipabũ ani merabewakĩ matũri habias hawẽ xinãti hiwe hawẽrua besti mã wamisbuki.

⁴⁹ Haskawẽ taeshũ Deus unãnepatũ yuikĩ: ‘Ea hatu yuishunikabu inũ ẽ tsuma kuxipayabũ hau hatu yusĩnũbũ ẽ hatu yunupakea hatu danãkĩ betsabu tenãkĩ betsabu itxakawakĩ hatu nitxĩshãkanikiki’, iniki.

^50-51 Matũ shenipabũ hatu danãpauni keska xinãkĩ Deusũ hãtxa yuishunikabu mã danãriamisbuki, na habiatianã. Habias xinãwẽ Deusũ matu manakuriashanikiki. Haskawẽ taeshũ mai damiwakĩ taewani anua hatũ Adãonẽ bake Abel tenãni inũ Deus kẽwãti txi tapu fogão inũ hawẽ kẽwãti Templo namakisshũ Deusũ hãtxa yuishunika Zacarias detenibu inũ dasibibũ Deusũ hãtxa yuishunika betsa tibi matũ shenipabũ tenãpaunibuwẽ taea ha xinãwẽ Deus hakimamawẽ taeshũ na habiatiã hiweabube mã keaĩbu Deusũ matu kupihairashanikiki.

⁵² —Deusũ hãtxa kenenibu yusĩnanãmisbuũ, mã peirawa! Deusũ hãtxa hawẽ hiweti unãbiai nĩka pewama tsuabura Deus shanẽ ibuai anu hikikatsi ikaibu mã hatu nemamiski. Maturi mã hikitirumabia habu betsabu hikipanãbũ mã hatu nemakubainaii— hatu waya

^53-54 yusĩnanãmisbu inũ fariseubũ hawẽ hãtxa nĩkai Jesuski sinatakĩ ibubis kanemanũ, iwanã, parãpaikĩ hawẽ yusĩakiri haikaimas hamapai yukanibukiaki.