Josué 6 - Kaxinawá Bíblia (BR)

Haska watãtã Jericó hau ibuwashanũbũ Senhor Deusũ hatu yununikiaki, na hãtxarã

¹ Israelĩ enabuki datekĩ nemanũ ishũ habu tsua kaĩtirubumawakĩ inũ Israelĩ enabu hikitirumawakĩ Jericó mishki kene keyatapakauna hawẽ hikiti shui tibi bepukĩ mestẽwãkĩ keyuabũ

² Senhor Deusũ Josué yuikĩ: “Uĩwẽ. Jericó ẽ mia yunuaii. Ariwe. Hawẽ shanẽ ibu inũ hawẽ huni detenamenikabu hatu maemamatã ẽ mia hatu mebĩmaii.

^3-4 Shaba tibi mae dũkei bestiwai maputãtãshãkãwẽ, 6 diarã. Matũ huni detenamenikabu hawẽ detetiya inũ ẽ matube yubakani hãtxa aruni bau iabu bebũkiri 7 ebe matu hãtxashunikabũ txashuwã mashũ puri ati txã txã akĩ mawakubainaibũ shaba tibi dũkekĩ hatu iyutãtãshãwẽ. Hanua sétimo diatiã ebe matu hãtxashunikabũ hatũ txashuwã mashũ txã txã akĩ mawakubainaibũ matũ detenamenikabu iyukĩ hatu dũkemabaũshãkãwẽ, 7kirã.

⁵ Haska hatu yunushina itã itani keyutã mapubaunabũ txashuwã mashũ txã akaibu hui kaĩ betsatanaya nĩkatã dasibi hau hui kushipawẽ sai sai ishanũbũwẽ. Ha sai sai ikaibũ hawẽ nemati mishki kenebaunibu hamebi di iki keyuaya huni dasibi hauri besuabuuri bui hatu detenũ ika mae merã hau hikibaĩshanũbũwẽ”, aka

⁶ nĩkatani hushũ Josué Deusbe hawenabu hãtxashunikabu kenashũ hatu yuikĩ: “Senhor Deus nukube yubakani hãtxa aruni bau iabainaibũ txashuwã mashũ puri ati txã txã akubaini matu 7 dukũ bebubaĩkãwẽ”, hatu watã

⁷ hawenabu dasibi yuikĩ: “Ha mae dũkei bukãwẽ, ha detenamenikabu bebuaibũ Senhor Deus hatube yubakani hãtxa aruni bau iabainaibũ hatxũ betsabu buaibu hatu txibãbainirã”, hatu wa

⁸ dasibibũ nĩkatã haska hatu yunushu keskai Deusbe hawenabu hãtxashunikabũ Senhor Deus hatube yubakani hãtxa aruni bau iabainaibũ ha 7bu bebubaĩkĩ txashuwã mashũ txã txã ati mawakubainaibũ

⁹ detenamenikabu bebũ habu Deusbe hawenabu hãtxashunikabu txibãbainaibũ habũ hatu mekea betsã hatũ yubakani hãtxa iabainaibu habũ petxiurishũ hatu uĩshũbainaibu inũ txashuwã mashũ txã akĩ mawakĩ heneabumakẽ

¹⁰ habiatiãri Josué hawẽ detenamenikabu hatu dasibi ana yuikĩ: “Matũ hui hau nĩkayamanũbũ sai sai iyamakãwẽ. Ha dikabi: ‘Sai sai ikãwẽ’, iwanã, ẽ matu yunuriama hãtxama pes buaketãyukãwẽ. Txipu: ‘Hui kushipawẽ sai sai iki keyukãwẽ’, akĩ ẽ matu yunushanaii”, hatu watã

Jericó maewã hatu atxikĩ detenibukiaki, na hãtxarã

¹¹ Senhor Deus hatube yubakani hãtxa aruni bau Josué hatu iamabaũkĩ maewã Jericó hatu dũkemabaũtãkĩ hatũ tari hiwe pũtebaũshinabu anu ana hatu iwea ushashini

^12-13 penaya Josué bestẽshũ hatu ana yunua Senhor Deus hatube yubakani hãtxa aruni bau Deusbe hawenabu hãtxashunikabũ iabainaibũ ha 7 Deusbe hawenabu hãtxashunikabũri txashuwã mashũ tsuma hatu bebushũkĩ txã txã akĩ mawakubainaibũ inũ dasibibu bebũ detenamenikabu hawẽ detetiya hatube butani

¹⁴ shaba ha katxu Jericó ana dũkebaũtani hatũ tari hiwe anu ana txĩtuãbu habiaskastãtãkĩ 6 dia dũkekĩ keyuabu

¹⁵ hakia hawẽ henei sétimo diatiã penamahaira besteĩ keyutã shaba betsatiã ishiãbu keskai dũkekĩ taewai 7ki maewã Jericó dũkebaũkĩ keyuaibũ

¹⁶ Deusbe hawenabu hãtxashunikabũ txã txã akĩ heneabuma hawẽ henei sétimotiã buãkĩ txã akĩ txaipa waibũ Josué hatu yunukĩ: “Sai sai ikãwẽ, na maewã Senhor Deusũ ma nuku inaĩkikirã.

^17-19 Ha mae meribiki. Ha inũ, ha merã mabu Senhor Deusunaki. Huni dabe nũ yunua merabewakĩ ha aĩbu hininipa dasibibũ memis Raabẽ hatu arukĩ huneshinawẽ taea Raabe inũ hawẽ hiwe meranuabu ha besti tenãma hiwemakãwẽ. Hanushũ betsabu dasibi tenãkãwẽ. Hakia hatũ mabu dasibi meribiki, Deusunarã. Mekĩ biãyamakãwẽ. Ha mabu meribiwẽ kemukĩ bikĩ mã ibu wakẽ Senhor Deus mã nukuki sinatamatiruki. Uĩrakãwẽ. Nukuki sinatakĩ nuku kupikĩ yuputiruki. Hakia hatũ prata inũ, hatũ ouro inũ, hatũ bronze mane mabu inũ, hatũ ferro mane mabu meribiki, dasibi Senhor Deusunarã. Itxawatã Senhor Deus nũ arushũshanaii”, hatu wa

^20-21 Deusbe hawenabu hãtxashunikabũ txashuwã mashũ txã akĩ txaipa waibũ nĩkatã kushipawẽ sai sai iki bis itxakayamai txaipaibũ Jericó maewã mishki kenekauna di iki keyuaya hawẽ deteti matxatu txaipaya huni tibi bebubaĩ hiki keyutã dasibi hatu detekĩ hunibu inũ, aĩbuaibu inũ, bake mishtĩbu inũ, anibu inũ, yushabu inũ, hatũ ina awa dasibi inũ, hatũ txashuwã dasibi, inũ hatũ jumento dasibi yamawakĩ hatũ maewã hirabi atxiabu

²² hanua huni dabetũ hune uĩbaũtãshinabu Josué hatu yuikĩ: “Aĩbu hininipã hiwe anu hikishũ haska mã habe yubakashina keska wakĩ ha aĩbu inũ hawenabu hatu tashnimatãkãwẽ”, hatu wa

²³ bushũ Raabe inũ, hawẽ epa inũ, hawẽ ewa inũ, hawẽ puibu dasibi hatunabuya hawẽ hiwe anua kaĩmatã Israelĩ enabũ mae benãta dapi hatu mekekĩ iyuabũ

²⁴ hatũ prata inũ, hatũ ouro inũ, hatũ bronze mane mabu inũ, hatũ ferro mane mabu hatu itxawamashũ Josué hatu yunua buabũ Jericó maewã hirabi kuakĩ yamawakĩ keyuabu shinãshũ Senhor Deuski nukuti tari hiwe merã hawẽ meketi dĩtu anu ha mane mabu mekekĩ Josué arunikiaki.

²⁵ Hau uĩtanũbũ huni dabe Josué yunua hatu huneshinawẽ taea Raabe inũ hawenabu Josué hatu mekekĩ tenãma iniwẽ taea ikis Israelĩ enabube Raabẽ enabu husini ma hiweabukiaki.

²⁶ Jericó hatu kuamakĩ keyutã yupu hãtxawẽ Josué hatu yuikĩ: “Uĩrakãwẽ. Na maewã Jericó haratura shanẽ ibũ ana mae bena wakĩ beniai Senhor Deusũ yupushanikiki. Mishki kenebaũkĩ taewaya kupikĩ hawẽ huni bake iyua tenãshanikiki. Hanu hikiti shui bebuti waya hawẽ huni bake hawẽ henea tenãriashanikiki”, akĩ nemakĩ hatu unãmanikiaki.

²⁷ Haska wakĩ Senhor Deusũ Josué merabewaya Josuéwẽ datei mai pakea hirabi anushũ yura shukua betsa betsapabũ hawẽ kena kaya nĩkakĩ keyubaunibukiaki.