João 7 - Kaxinawá Bíblia (BR)

Hawẽ betsabũ Jesus ikũwãriama inibukiaki, na hãtxarã

¹ Hanushũ judeu shanẽ ibubũ Jesus detekatsi ikĩ benaibuwẽ taea Judéia anu ana kakatsi ikama Galiléia anu besti mae tibi anu kakũkaũkĩ hatu uĩkĩ yusĩkubaunaya

² ha ushetiã ni pei meshtetã peãtã judeubũ shenipabu ushakubaũpaunibu hawẽ xinãti beya nawai pi besishanaibu ma kemaya

^3-5 hawẽ betsabũ ikũwãkĩ kayatiwariabumabia Jesus yunukĩ: —Nenu hanus kesu kesu isama Judéia anu besiaibu anu kashũ uĩtãwẽ, kashũ harishũ mĩ damiwai miki txiti ikabu itxashũ uĩ Habaa! iki Yuu! hau ishanũbunã. Tsuara shabakabi shanẽ ibukatsi ikinã, hawẽ pepa hune akĩ hamapai aisbumaki. Haskakẽ mĩ akairã, pepakiaki. Jerusalém anuabu harishũri dasibi haska mĩ damiwamis shabakabi hatu uĩmaritãwẽ, mianã— akabu

^6-7 Jesusũ hatu yuikĩ: —Haska ẽ ishanairã, kemariamaki. Maturã, tsuã matu hawa danãbuma hamapaiaibutiã mã katiruki. Hakia eãnã, hatũ txakabukiri shabakabi ẽ hatu yuiaiwẽ taeshũ eki sinatakĩ ea danãkanikiki. Haskawẽ taea ẽ daya ẽ meneriamawẽ taea ẽ kayutirumaki.

^8-9 Haskakẽ ẽ hatu uĩmashanai kemariamakẽ matube ẽ kamaki. Matũ mesti uĩtãkãwẽ— hatu wa buaibũ Galiléia anu Jesus baxikui niti ikẽ

Judeubu hanu besimisbutiã Jesusũ hatu yusĩnikiaki, na hãtxarã

¹⁰ nawai besiaibu anu hawẽ betsabu buxiãbũ Jesusũ tsua banabimama hari hatu itxũ kai Jerusalém merã hune hikikẽ

¹¹ nawai taeaibũ Jesus benakĩ judeu shanẽ ibubũ hatu yukakubauni: —Hania mã uĩaĩ, ha huni Jesusrã?— ikaibũ

¹² yurã kaiã Jesuskiri hãtxai yuinamei betsa betsapabũ hakiri yuikĩ: —Harã, huni txakabuma pepaki— akaibũ betsabũri yuikĩ: —Haskamaki. Huni pemaki. Nukunabu parãmiskiaki— ariaibũ

¹³ haskabiakĩ tsua nĩkamama habu judeu shanẽ ibubuki datei Jesuskiri hune hãtxanameakeakeaibũ

¹⁴ usha dabe inũ besti kaya napũriama nawaibu hatishũbukũs namakis Templo hemaĩtĩ anu Jesus ka tsaushũ itxabu hatu yusĩkĩ taewaya

¹⁵ shanẽ ibubũ uĩ e itã haki sinatai yuinamei: —Haskatã haska yusĩa unãhairai ikimẽkaĩ, nukubetã kene tapĩsmabiarã?— ikaibũ

¹⁶ haska hãtxaibu unãkĩ Jesusũ hatu yuikĩ: —Na ẽ yusĩaĩ mã nĩkairã, enamaki. Ea hatũ yununitũ xinãwẽ ẽ matu yusĩ ikaii.

¹⁷ Tsuabũra Deusũ xinã akatsi ikinã ẽ akai unãtã haska txanimamẽkaĩ ikĩ na ẽ yusĩaĩ: “Deus anua huimẽkaĩ, ẽ ibubis ẽ xinãnẽ ikimẽkaĩ”, mã unãtirubuki.

¹⁸ Hamẽ huni betsa ibubis hatu kẽwãmakatsi ikirã, yusĩnã pepai hawẽruamisbuki. Hakia hatũ ea yununi ẽ matu kẽwãmakatsis ikaiwẽ taea txakabuuma pepa besti yui ẽ txani txakamaki. Haskawẽ taeshũ tsuã ha yusĩakiri ekiri metutirubumaki.

¹⁹ Txanima Deusũ hãtxa Moisés matu yusĩbiani mestẽwãtã matũ huĩtinĩ Deusũ hãtxa tsuã mã txibaĩsbumaki. Haskawẽ taeshũ haska xinãma mã ea detekatsis ikanaii— hatu waya

²⁰ ha dapi mapushũ betsã yuikĩ: —Mĩ yushĩ txakabu hayaki. Mĩ haska xinaĩnã, tsuã mia tenãkatsis ikimẽkaĩ?— aka

²¹ nĩkabiai habe hãtxama shanẽ ibubu Jesusũ ana yuikĩ: —Sábado huĩrukũtitiã huni bestitxai shushawakĩ ẽ merabewaima matuki txanimabu haska xinaĩ mã eki sinataibu ẽ unaiĩ.

²² Hakia Moisés nuku yusĩkĩ yuikĩ: “Hawẽ Deus unãmati wakĩ matũ huni bake oito shaba kaya hawẽ hina kubitxi bikubaĩshãkãwẽ”, akĩ nuku yununiki. Hanũkaĩ ha hina kubitxi bikĩ Moisés taewama nukũ shenipabu Abraãonẽ dukũ bikĩ taewani Moisés xinãkĩ habiaskari nuku yununiki. Haskakẽ huĩrukũtitiãbiakẽ kaneama hina kubitxi mã biriamisbuki.

²³ Hanua Moisés hãtxa mã kanekatsi ikamawẽ taea huĩrukũtitiãbiakẽ matũ huni bake kaĩxina hina kubitxi bi maturi mã dayakubaĩmisbuki. Habiaskari keska wakĩ huĩrukũtitiãri huni betsa hawẽ yura hirabi ẽ shushawaimawẽ taeshũ haska xinaĩ eki sinatakĩ mã txakabu ekiri tanaki.

²⁴ Haskakẽ hawara bemakia uĩtã xinaĩ hawaira hãtxayamakubaĩkãwẽ. Hakia hawara mã unãti wakatsi ikairã, hawa kaneama uĩ pehairawatã pe xinãkĩ unãti watã ikubaĩkãwẽ— hatu waya

Hania Jesus huni tsuã unãma inibukiaki, na hãtxarã

²⁵ hanushũ Jesusũ yusĩaĩ Jerusalém anu hiwemisbũ nĩkatã yuinamei: —Ha hunirã, detekatsis ikĩ benakubaunaiburã, habiamẽ?

²⁶ Ũ unu naxui ika yusĩ hãtxairã, hawa tsuã nemama uĩnãmãri! Nukũ shanẽ ibubunã, “Messias Cristoki”, iwanã, xinãkanimẽkaĩ?

²⁷ Hakia Messias Cristo hushanairã, harakiriara hushanai tsuã nũ unãmaki. Haskakẽ hanua Jesus huni nukũ nũ unaĩwẽ taea Messias Cristo itirumaki— ikaibũ

²⁸ Templo hemaĩtĩ anushũ yusĩkĩ haska habu hãtxaikiri xinaĩ hãtxaibu nĩkatã hãtxa kuxipawẽ Jesusũ hatu xinãmakĩ: —Matunã, ea unãkĩ hanua ẽ yumeriani mã unãriaii. Emebi ẽ xinãnẽ ibubis ẽ huamaki. Hakia parananaĩsmatũ ea yununirã, matunã, mã ha unãmaki.

²⁹ Hakia eã ibubis hatũ ea yununi anua ẽ tashnikiraniwẽ taeshũ ẽ ha unaiĩ— hatu wa

³⁰ hanua haskaiwẽ taeshũ atxinũ ishũ xinãbiaibũ hanu mawashanai kemariamawẽ taeshũ tsuã meabuma iniki.

³¹ Hanua hakiri haskabiaibu itxapabũ ikũwaĩ yuinamei: —Messias Cristo hushũ dami itxapa nuku washũshanaikiri nuku yusĩmisbu na hunĩ haska nuku yusĩmisbu keska waikiki. Txipu Messias Cristo hushũ na hunĩ akai binutirumamẽkaĩ? Nũ xinãnã, atirumaki— iki

Jesus hanu kashanai tsuã unãma hatu yuinikiaki, na hãtxarã

³² Jesuskiri yuiaibu fariseubũ nĩkabaĩ Deusbe nukunabu hãtxashunika shanẽ ibubu anu bushũ habube yubakatã hau Jesus atxitanũbũ habũ Templo mekemisbu betsabu hatu yunuabũ

³³ hanushũ mapuabu Jesusũ ana hatu yuikĩ: —Haskaira ea wayamakãwẽ, usha eskarabes besti matube ẽ iyuairã. Hanua hatũ ea yununi anu ẽ ana txĩtũshanairã.

³⁴ Haskakẽ matunã, hanira ẽ kai anu mã unãmabia ea benakĩ ea betxiama mã ishanaii, mã hari katirumawẽ taearã— hatu waya

³⁵ haskai nĩkai judeu shanẽ ibubu yuinamei yuka iki: —Hani ka nũ betxiama itiru txani ikimẽkaĩ, harã? Nukunabu nawabube txai hiwebaunabu anu kashanũ ika xinaĩ ikimẽkaĩtsa? Gregonawabũ Deus unãbumanu yusĩtanũ ika ikimẽkaĩ?

³⁶ Na haska yuiairã, haskara xinaĩ ikimẽkaĩ: “Hanira ẽ kai anu mã unãmabia ea benakĩ ea betxiama mã ishanaii, mã hari katirumawẽ taearã”, ikai nũ nĩkairã— ikĩ xinãnibukiaki.

Ikũwaĩbu hawẽ hiwekuĩmati ũpash hayakiri Jesusũ hatu yusĩnikiaki, na hãtxarã

³⁷ Nawai keyui hawẽ henei ma shaba dabe inũ besti kaya nawai besi bexiã ma kakatsi keyui dasibi itxahairabũ Jesus benikawã hãtxa kuxipawẽ hatu yuikĩ: —Ũpash manuhairai mã tetsusinairã, eanu beshũ aki bekãwẽ, ea ikũwãkinã.

³⁸ Habiaskari Deusũ hãtxa keneni keska wakĩ tsuãra ea ikũwaĩ hawẽ huĩti meranua hiwekuĩmati hene habai netsuama ishanikiki, hatu kuxipa wairã— hatu waniki.

³⁹ Haska nuku yuikinã, Deusũ Yushĩ Pepakiri nuku yuiniki. Hanushũ Jesus ikũwaĩbu hawẽ kuxipa Deusũ inanũ ikaya Jesus mawa besteã hawẽ Epanu kariamakẽ Deusũ Yushĩ Pepa nuku inãyuama iniki.

⁴⁰ Hanushũ hatiritũ Jesusũ hãtxa nĩka pewatã yuikĩ: —Txanima na hunirã, Deusũ hãtxa yuishunikakiri Moisés nuku yuinirã, haki— ikaibũ

⁴¹ betsabũri yuikĩ: —Messias Cristorã, haki— akaya betsabũri yuikĩ: —Hamaki. Galiléia anua Deusũ Messias Cristo tashniama ishanai nuku yusĩmisbuki.

⁴² Hanua tashnikirãshanairã, “Davĩ mae Belém anua Davĩ babarã, Cristo Messias ishanikiki”, akĩ nuku keneshuniki. Haskakenã, Jesusrã, Deusũ Messiasmaki— akaibũ

⁴³ Jesusũ hatũ hãtxa nĩkatã hawẽ taea Jesuskiri xinã betsa betsapawaibuwẽ taeshũ

⁴⁴ hatiritũ atxibaĩ bitxi bupanãbũ tsuã hawa meabumakẽ

Judeu shanẽ ibubũ Jesus ikũwãma danãnibukiaki, na hãtxarã

⁴⁵ hanu fariseubu inũ Deusbe nukunabu hãtxashunika shanẽ ibubu itxashũ Templo mekenikabu Jesus anu hatu yunua bua ibai habũ Jesus iweama mais beaibũ shanẽ ibubu betsã hatu yukakĩ: —Haskakĩ Jesus atxi biai kashũ mã iweama ishumẽ?— hatu wa

⁴⁶ mekenika betsã yuikĩ: —Haska ha huni hãtxai peaya huni betsari hãtxakĩ nematirumaki, txakabu hatu yuiamawẽ taeshunã— hatu wa

⁴⁷ hanushũ fariseubũ hatu yuikĩ:

⁴⁸ —Habi mã unaĩsmapabenibĩ, maturi paraĩkikirã! Nuku nũ shanẽ ibubu inũ nũ fariseubunã, nũ hawa ikũwãmaki.

⁴⁹ Hakia Moisés hãtxa unãbumawẽ taea ha yuraburã, ibubis yupukunaĩ ikanikiki— hatu waya

⁵⁰ hanua fariseu betsa Nicodemos Jesus anu ka habe hãtxatanimatũ hatu yuikĩ:

⁵¹ —Hawẽ hãtxa nĩkariama hawara dayai nũ uĩriamabia Moisés hãtxawẽ taeshũ: “Huni txakabuki”, akĩ nũ kupitirumaki— hatu wa

⁵² Nicodemoski sinatakĩ yuikĩ: —Galiléia anua unaĩsmapabu keska xinãyamawe. Deusũ hãtxa kenenibu una anua uĩtã Galiléia anua Deusũ hãtxa yuishunika tashniama ishanai mĩ unãshanaii— itã

⁵³ henebaini hatũ hiwe anu inũ buake buakenibukiaki.