João 16 - Kaxinawá Bíblia (BR)

¹ ana betsa nuku yuikĩ: —Txipu habũ matu itxakawabu mã ekiri hakimama xinã betsa wama mã txĩtũyamashanũ bebũkiri ẽ matu yuiai nĩkairakãwẽ.

² Hanu itxati hiwe anushũ matu danãkĩ nitxĩkĩ nukunabu matuki dakemashãkanikiki. Ha inũ, betsabũ xinaĩ: “Nũ Deus merabewaii”, ikĩ tsuabura matu betsa betsapa detekĩ

³ ẽ Epa Deus unãma eari unãbumawẽ taeshũ matu hawa unãma itxakawashãkanikiki.

⁴ Matu haska waibuaibu ẽ matu yuini matu xinãmai buaibuwẽ taeshũ bebũkiri ẽ matu yuiaii. —Matube bebũkiri nibiashũ haska shabakabi ẽ matu yuiama iyuniki.

Deusũ Yushĩ Pepatũ ashanai Jesusũ hatu unãmanikiaki, na hãtxarã

^5-6 Hakia natianã, hatũ ea yununi anu ẽ samama kaiwẽ taeshũ ikis ẽ matu yuishuki. Ẽ matu yuia nĩkatã matũmebi xinaĩ huĩti nixmashũ: “Hani mĩ kashanai?” mã ea wamaki.

⁷ Hakia ikũkĩ ẽ matu yuiai nĩkakãwẽ. Ẽ matu kashũamakenã, Mekenã Bena matu anu hutirumaki. Hakia kashũ Mekenã Bena matu anu ẽ yunushanaii. Haskawẽ taea ẽ kayarã, maturã, mã pepakũkaĩshanaii.

⁸ Ha Mekenã Bena hushunã, yurabu mai anuabu shabakabi Deuskiri txakabuwamisbu inũ, habũ Deuskiri txakabuwama pepa wamisbuma inũ, tsuabura Deusũ unãti watã kupishanai hatu unãmashanikiki.

⁹ Tsuabumẽ, Deuskiri txakabumisburã? Habũ ea ikũwãbumarã.

¹⁰ Tsuamẽ, Deuskiri txakabu hayamarã? Ẽ eaki, ẽ Epa anu ẽ kakẽ mã ana ea uĩyama ishanairã.

¹¹ Tsua ashanimẽkaĩ, Deusũ unãti washũ kupikinã? Na yurabu mai hirabi anu maniabu hatu shanẽ ibushũmis ma unãti wanishũ kupishanikiki.

¹² Ana hãtxa itxapa ẽ matu yusĩkubaĩpanã hati mã tsuma keyutirumaki.

¹³ Hakia txipu Yushĩ Txanima Unãmanika hushũ txanima dasibi matu yusĩkĩ meshtãmashanikiki. Hawẽ xinãnẽ hãtxama hakia ekiri dasibi nĩkatã hawara ishanairi matu shabakabi unãmashanikiki.

¹⁴ Ha Yushĩ Txanima Unãmanika hamebi huama ẽ kuxipa bitã matu unãmakĩ inãkĩ matu kuxipa washanikiki.

¹⁵ Dasibi ẽ Epa hayarã, enariki. Haskawẽ taea: “Yushĩ Txanima Unãmanika ena bitã matu unãmashanikiki”, akĩ ẽ matu yuishuki— iwanã,

¹⁶ —Haskaira hatishuĩra ka ẽ hari i iyamaki. Hakia samamahaira nũ ana uĩnanãshãkanaii— nuku wa

Ana punu nukama mã benimahairashanaii, hatu wanikiaki, na hãtxarã

¹⁷ mawa ana bestẽshanaikiri hãtxai nũ unãma yuinamei: —Hawa nuku yuikatsi ikimẽkaĩ? “Ana eskarabes ea uĩyama hanũkaĩ ana usha eskarabes kaya mã ea ana uĩshanaii”, ikai inũ: “Deus anu ẽ kashanaiwẽ taearã”, ikĩ haskara nuku yui ishumẽ?

¹⁸ “Ana usha eskarabesrã”, hawamẽ? Harakiri daki yui ikikika!— nũ ike ikeaya

¹⁹ nũ yukapaia unãkĩ nuku yuikĩ: —Ẽ hãtxawẽ taea mã yuinameairã,

²⁰ ikũkĩ ẽ matu yuiaii. Ẽ mawakẽ ea manui kashai mã huĩti nixmakẽ habũ ea ikũwãbuma benimahairashãkanikiki. Hakia maturã, ẽ mawakẽ matũ huĩti nui henetã mã benimahairashanaii.

²¹ Haska inũ, aĩbu tuya bake kaĩkatsi punu nukai xinã txãkaĩsmaki. Hakia kaĩtã: “Peki”, ika benimai isĩ hakimamisbuki.

²² Habiaskariai ikis mã punu nukaki. Hakia ẽ ana huaya mã benimahairaya matũ benima pae tsuã matu mebĩtirubumaki.

²³ Habiatiãri ea uĩkĩ mã ea hawa yukama ishanaii. Hakia ẽ Epa Deus mã yuka ewẽ taeshũ matu merabewashanikiki.

²⁴ Ea ikũwãkĩ taewabianishũ ẽ kenawẽ taeshũ mã Deus yukariamahairaki. Na habiatiã ẽ kenawẽ taeshũ Deus yukakĩ taewarikãwẽ. Haska wakĩ mã yuka matu ashuã mã benimashanaii— iwanã,

Hatu itxakawaibu Jesusũ hatu maemashanaikiri hawẽ tsumabu yuinikiaki, na hãtxarã

²⁵ hanushũ ana nuku yusĩkĩ: —Hãtxa hunea miyuiwẽ ẽ matu yusĩkubirãxinaki. Hakia ana hãtxa huneawẽ yusĩama hanu shabakabi ẽ matu unãmashanai ma kemaikiki. Haskakaĩxĩshũ ẽ Epa Deuskiri hanu shabakabi kayabi ẽ matuki txanishanaii.

²⁶ Habiatiãri Deus ẽ ana matu yukashunama ishanaii. Hanu matũmebi ibubis ẽ kenawẽ taeshũ mã yukakubaĩshanaii,

²⁷ ẽ Epa Deus matuwẽ nuikĩ abuaiwẽ taeshunã. Deus anua ẽ huni ikũwãkĩ mã ea abuaiwẽ taeshũ Epa Deus matuwẽ nuikĩ matu aburiaikiki.

²⁸ Hamẽ ẽ Epa Deusũ besuuria kaĩkirani na mai anu yurabube hiwenũ ika ẽ huni haska ea yununi menetã natiã ana hawẽri kakĩ na yurabu ẽ henebainaii— nuku waya

²⁹ hanushũ hawẽ tsuma betsã yuikĩ: —Txanima na habiatiã shabakabi nuku yui ana miyui hãtxa huneawẽ mĩ hãtxamaki.

³⁰ Hanũkaĩ txanima mikiri nũ unaiĩ. Nũ mia yukariama unãkĩ nukũ xinã mĩ unaĩ inũ hamapai tibi mĩ unaĩwẽ taeshũ Deus anua mĩ hunirã, nũ ikũwaiĩ. Haskawẽ taea mĩ Deusũ bake kayabikẽ tsuã nũ ana mia yukai bika teneamaki— aka

³¹ haska waya Jesusũ nuku ana yuikĩ: —Natiã hanu mã ma ea ikũwaĩ?

³² Mã ea haska wabiai hanu mã datei pashairã, ma kemakanikiki. Uĩrakãwẽ, hanu dasibi sa ikĩ mã bestibu ea dapashkabaĩkĩ mã ea henebiabaina earã, ẽ emestimaki. Ẽ Epa ebe ketashameshũ ea heneamaki.

³³ Ea haibuwai eki dasia mã dateama unãnuma hiweshanũ na hãtxa ẽ matu yuishuki. Mai anushũ ea ikũwãbumã matu itxakawariaibũ dateyamashãkãwẽ, ẽ ma hatu maemakĩ binuniwẽ taearã— nuku watã