João 13 - Kaxinawá Bíblia (BR)

Hawẽ tsumabu Jesusũ hatu hutxunikiaki, na hãtxarã

¹ Páscoa nawai mexukiri ishanaitiã yurabu henebaini hawẽ Epa Deusbe ana dasi kashanai ma kemai Jesusũ unaĩ na mai anua habũ ikũwaĩbu abui hatuwẽ nuikũkaini haska bestiwẽma hakia nũ hawenabuwẽ taea nuiyabis mawakĩ nuku uĩmaniki.

² Hanushũ bari kaya mexu merã Jesusbetã nũ piaya habiatiãri Judas Iscariotẽ Jesus hatu atximashanai diabo Satanásã Judas xinãmaya

³ mai hirabi anua dasibi Epa Deusũ Jesus shanẽ ibumakatsi yununi Deus anua huni ana hawẽri txĩtũ kaĩshanai Jesusũ unaĩ

⁴ nukubetã pibiai pia henetã benikawã hawẽ tima tari pekatã hawẽ datekere iti txaipa bitã txiabukukĩ tarãkĩ mestẽwãtã

⁵ hanushũ kẽtxa ewapaki ũpash hushketã nũ hawẽ tsumabu nuku hutxukĩ taewakĩ hawẽ datekere itiwẽ nuku hutekere akubauni

⁶ Simão Pedroki kematã anũ ikaya nemakĩ yuikĩ: —Shanẽ Ibuũ, mĩ ẽ yusĩnãki. Haska wakĩ mĩ ea hutxunũ ika ikai?— aka

⁷ —Ikis ẽ matu akai mĩ unãmaki. Hakia txipu mĩ unãshanaii— aka

⁸ Pedrõ ana yuikĩ: —Duawakĩ ea hutxuwe, iwanã, ẽ mia yunuamaki— aka Jesusũ nemakĩ: —Ẽ mia hutxuamarã, mĩ enabu kayabi iturumaki— aka

⁹ Simão Pedrõ yuikĩ: —Haskakenã, Shanẽ Ibuũ, ea hutxu bestiama ea metxukĩ ea butxuriawe— aka

¹⁰ Jesusũ kemakĩ: —Tsuabura dama naxitani huirã, hawẽ tae besti hau ana hutxuki bestinũbũwẽ. Haskarã, mã ana detsismaki. Haska keskai ẽ hãtxawẽ taea besti mã pepaki, mawaira dasibimarã— nuku watã

¹¹ Judasĩ hatu atximashanai unãkĩ haska nuku yuiniki.

¹² Hanushũ nuku hutxushũ hutekere akĩ menetã hawẽ datekere iti pekatã hawẽ tima tari txaipa ana sawetã ana daka bashti ishũ nukubetã pikĩ nuku ana yuikĩ: —Ẽ dama matu ashurã, xinãkĩ mã unaĩ?

¹³ Txanima ea kenakĩ: “Yusĩnaã inũ Shanẽ Ibuũ”, akĩ mã ea kenamisrã, habia ẽ eaki.

¹⁴ Ea ẽ matũ Yusĩnã inũ matũ Shanẽ Ibubiatũ ẽ matu hutxukĩ duawakĩ ẽ matu uĩmashu keska wakĩ maturi duanamei hutxukinaĩ keskakubaĩshãkãwẽ.

¹⁵ Na eã eska wakinã, habiaskari wakĩ mã ashanũbũ ẽ matu bebũkiri uĩmakĩ ashuki.

¹⁶ Ikũkĩ ẽ matu yuiai nĩkakãwẽ. Dayakapã hawẽ tsuma binuĩsmaki. Haska inũ, tsuara yunua hawẽ yunua ashũkĩ binuĩsmariki.

¹⁷ Na haska ẽ matu yuiai tsuabũra nĩkatã hawẽ hiwekĩ habũ aki benimakubaĩshãkanikiki.

¹⁸ Na haska hãtxairã, matu dasibikiri ẽ hãtxamaki. Eã ẽ matu katunishũ ẽ unaiĩ. Hamẽ ekiri Deusũ hãtxa yuishunikatũ ea dayuikĩ: “Ebetã pibiakĩ ea detenũ ishũ xinaĩkiki”, ini keskai haska ekiri kenenibu yuiaiwẽ taea txanima matu bestitxaitũ mã ea habiaskari wakatsis ikaii.

¹⁹ Ea ẽ inirã, mã ikũwãshanũbũ haska ea washanaibu bebũkiri ẽ matu banabimai txaniaii.

²⁰ Txanima tsuara ẽ kenaya ẽ yunua ka habũ hatũ hãtxa nĩkakĩ ikũwãkĩ hatu duawakĩ eari habiaskari wakĩ hatũ ea yununiri habiaskari washãkanikiki— nuku wai

Hanubi hawẽ tsuma hawẽ kuxipaya betsã hatu atximai Jesusũ hatu yuinikiaki, na hãtxarã

²¹ hanua Jesus hawẽ huĩti meteshekei nixmahairakĩ shabakabi ana nuku yuikĩ: —Txanima haratura bestitxaitũ mã ea hatu atximai kaii— nuku wa

²² nuku hawẽ tsumabu betsakiri hãtxai unãma e itã nũ beisinãkeakeaya

²³ Jesusũ ea abuhairaiwẽ taea ẽ pekatxu Jesus bashti ika dakashũ piai

²⁴ Simão Pedro ẽ beisa hawẽ metutiwẽ Jesus ea yukamakĩ: —Tsukiri hãtxaimẽkaĩ? Yukawe— ea wa

²⁵ dabekekawã teshkitã Jesus yukakĩ: —Shanẽ Ibuũ, tsuamẽ?— ẽ wa

²⁶ basheshẽri Jesusũ ea besti yuikĩ: —Misi pukushũ ẽ inaĩnã, haki— ea watã misi bishũ tewe inũ yutxi mutsaki pukutã Simãonẽ bake Judas Iscariotes inã

²⁷ piaya Satanás Judasĩ xinã merã ma hikiawẽ taeshũ Jesusũ Judas yuikĩ: —Mĩ haska xinaĩnã, hawaira aritãwẽ— aka

^28-30 nĩkatã hawa yuiama hawaira kaĩkaini mexu merã hanira Judas kakẽ haska wakĩ Judas Jesusũ yunua kakẽ nukubetã pi unãbumabia betsã xinaĩ yuinamei: “Judas pei mekenikarã, ‘Nawakĩ piti ana bitãwẽ’, akĩ Jesusũ yunushuki”, iake iakeaibũ betsãri xinãkĩ: “ ‘Nuitapaibu peiwẽ hatu merabewatãwẽ’, akĩ Jesusũ yunushuki”, iake iakeriakĩ xinaĩbũ

Yunua bena Jesusũ hatu baxishũbainikiaki, na hãtxarã

^31-32 hanua Judas kaĩkaĩkẽ Jesusũ nuku yuikĩ: —Ẽ hatũ Hutxi Kayabi Iuwa ẽ kuxipa hayaki, hawẽ taeshũ natiã Deusũ ea hatu unãmairã. Haskawẽ taeshũ Deusũ kuxipa ẽ hatu unãmaii. Ẽ hatũ Hutxi Kayabi Iuwa Deusũ hatu unãmaikiki, ẽwenã. Haskakẽ hau unãnũbũ manama hawaira akikiki— iwanã,

³³ —Ẽ bake kayabibuũ, ana hatishuĩra ẽ matube niamaki. Hakia usha eskarabes ka ea benakĩ mã ea betxiama ishanaii. Haska judeu shanẽ ibubu ẽ yuixina keskarã, ẽ maturi yuiai ea nĩkakãwẽ. Hanu ẽ kai anu mã katirumaki.

³⁴ Haskawẽ taeshũ hawẽ yunuti hãtxa bena ẽ matu baxishũkĩ yunubainaii. Haska matuwẽ ẽ nuiai keskairã, habiaskariai matubus nui duanamepakeriashãkãwẽ. Haskai xinãnãnaĩ mã nuibukuaĩ

³⁵ matu uĩkĩ mã haskai ẽ tsumabu kayabi dasibibũ matu unãkubaĩshãkanikiki— nuku waya

Pedro: Ẽ ha unãmaki, iki kaikiri Jesusũ yuinikiaki, na hãtxarã

³⁶ hanushũ Simão Pedrõ Jesus yukakĩ: —Shanẽ Ibuũ, mĩ hani kai?— aka —Hanu ẽ kai anurã, ikis mĩ ea txibãtirumaki. Hakia txipu mĩ ea txibãshanaii— aka

³⁷ Pedrõ ana yuikĩ: —Shanẽ Ibuũ, haskakĩ ẽ mia txibãtirumamẽ, ikisrã? Earã, ẽ mia mawashũtiruki, miwenã— aka

³⁸ Jesusũ Pedro ana yuikĩ: —Txanima mĩ ea mawashũtirumẽ?— iwanã —Haskamahairaki. Txanima kayabi ẽ mia yuiai nĩkawe. Penariama takara keui taeriama eki dakekĩ: “Ha hunirã, ẽ ha unãmaki”, iki dabe inũ bestiki eki dakekĩ mĩ yui kaii— akĩ