João 11 - Kaxinawá Bíblia (BR)

Lázaro mawanikiaki, na hãtxarã

^1-2 Hanua xinã Betânia anushũ Mariã txipu sheni ininipawẽ Shanẽ Ibu Jesusũ tae peukashũ hawẽ buwẽ tere ashanai anu hawẽ betsa Maria inũ Martabe hatũ pui Lázaro hiwea hanua isĩ teneaya

³ hau Jesus yuishũtanũbũ hawẽ pui dabetã hatu yunua bushũ Jesus hatu yuishũkĩ: —Shanẽ Ibuũ, mĩ haibu mĩ abuairã, isĩ teneikiki. Nukube kashũ uĩ kawe— akabu

⁴ Jesusũ nĩkatã nũ hawẽ tsumabu nuku yuikĩ: —Ha isĩmanã tenãkĩ debu wamaki. Hakia Deus inũ hawẽ bakẽ kuxipa hatu uĩmashanũ ika isĩ teneikiki— ikaya

⁵ Maria inũ Marta inũ hatũ pui Lázaro abuhairabiai

⁶ Lázaro isĩ teneai yuiabu nĩkatã kayuama ana usha dabei Jesus baxikuxĩshũ

⁷ nũ hawẽ tsumabu nuku ana yuikĩ: —Judéia anu ana bunãkãwẽ— nuku wa

⁸ —Yusĩnaã, judeu shanẽ ibubũ dama harishũ mixki tũkuwẽ mia tsakapai ixiãbuki. Haskai hariri mĩ ana kakatsi ikai?— nũ wa

⁹ nuku yuikĩ: —Shaba tibirã, 12 hora hayaki. Bariri shabatiã tsuara kai uĩ pewabaini tsua huti itirumaki, na ẽ mai anu shaba txasha hayawẽ taearã.

¹⁰ Hakia tsuara mexu merã biũma kairã, huti itirubuki, eauma kai keskarã—

¹¹ itã, —Nukũ haibu Lázaro ma ushaki. Datekĩ ẽ bestẽwaĩ kaii— nuku wa

¹² —Shanẽ Ibuũ, ha huĩrukuĩ usharã, mawama maĩkiki. Kayamawe— nũ wa

¹³ Lázaro mawakiri Jesusũ nuku yuibia unãma usha bestiakiri nũ xinãniki.

¹⁴ Haska nũ xinaĩ unãtã shabakabi Jesusũ nuku yuikĩ: —Lázarorã, ma mawaxinaki.

¹⁵ Ẽ harimakẽ ixĩkẽ ẽ benimaii. Haskarã peki, matunarã, ana shabakabi ẽ matu ikũwãmai kairã. Eki sinatabiaibu anua Lázaro uĩnũ bukãwẽ— nuku waya

¹⁶ haskaya nũ hawẽ 12 tsuma kuxipaya betsa Tomé tsupibu bakẽ nuku yuikĩ: —Kawe. Haria habe mawarinũ bukãwẽ— nuku waya

Jesusrã, mawabu bestẽwãkĩ hiwemanikakiaki, na hãtxarã

^17-19 haska nĩkatã Jesusbe nũ kaya Betânia dapishũ: “Usha dabe inũ dabe ka Lázaro maiwaxinabuki”, akĩ nuku yuiabu Jerusalém txaima quilômetro dabe inũ besti anua judeu shanẽ ibubu itxapa beshũ hatũ pui mawaxĩkẽ Marta inũ Maria kashaibu hatuwẽ nuikĩ daewakĩ hatu nese wai beabũ

²⁰ Jesus huai bana nĩkatã Martã itanũ ika kai Jesuski nukui kaya Mariãri hawa nĩkama hiwetã hiwekẽ

^21-22 haki nukushũ Martã Jesus yuikĩ: —Shanẽ Ibuũ, mĩ nenukenã, ẽ pui mawama ikeãxinaki. Hamapai xarabu mĩ Deus ea akai nĩkatã mia merabewakĩ mia ashũmiski, ẽ unãnã— aka

²³ Jesusũ yuikĩ: —Mĩ puirã, ana hiweshanikiki— aka

²⁴ hanushũ Martã yuikĩ: —Txanima habiaskaki. Bari hawẽ heneaitiã mawabu Deusũ yura dasibi bestẽwãshanaitiã ana hiweshanai ẽ unãnaiĩ— ikaya

²⁵ hanushũ Jesusũ ana yuikĩ: —Bestẽwãkĩ hiwemanikarã, habia ẽ eaki. Tsuabũra ea ikũwaĩ mawabia ana hiweshãkanikiki.

²⁶ Habu dasibi hiweyushũ ea ikũwaĩ mawataskama ishãkanikiki. Na ẽ mia yuiairã, mĩ ikũwaĩ?— aka

²⁷ —Heẽ, Shanẽ Ibuũ, mĩ Cristo Messiaski. Hawẽ bake yurabube hau hiweyushanũ Deusũ yubanirã, habia mĩ miaki, ẽ unãnã. Ẽ mia ikũwaiĩ— atã

Lázarowẽ taea Jesus kashanikiaki, na hãtxarã

²⁸ hanua Marta hawẽ hiwe anu txĩtũkirã hawẽ betsa Maria hune yuikĩ: —Nukũ Yusĩnã ma huaki. Mia kenaikiki. Kayuwe— aka

²⁹ Mariã nĩkatã benikaini hawẽ betsa Martabe kaĩkainaya

³⁰ hawẽ mae anu hikiriama habianuari Marta haki nukushu anushũ Jesusũ manaya

³¹ judeu shanẽ ibubũ Maria daewai bea hawẽ hiwetã habe maniabũ Mariã hawa hatu yuiama benikaini hawẽ betsabe hawaira buaibũ hatu uĩtã xinaĩ: —Mixki tãpe anua kashai kaikiki— ikĩ txibaĩbũ

³² Jesuski nukutã huĩti nixma ha namã dãti ishũ Mariã yuikĩ: —Shanẽ Ibuũ, mĩ nenukenã, ẽ pui mawama ikeãxinaki— atã

³³ judeu shanẽ ibubube Maria kashai bis ikaibũ Jesusũ haskaibu uĩ hatuwẽ uke merã nuihairai hatube kashakatsis ikĩ

³⁴ hatu yukakĩ: —Hani mã datãxinamẽ?— hatu wa —Shanẽ Ibuũ, uĩnũ kawe— abainabu

³⁵ Jesus kashakainaya

³⁶ shanẽ ibubũ uĩ yuinamei: —Uĩwẽ, aburiaikikirã— akaibũ

³⁷ hakia shanẽ ibu betsabu yuinameriai: —Huni bekũ shushawabiaxina hau Lázaro mawayamanũ shushawati xaraxina hawawẽ haska watima damapaikiki— abainaibũ

Lázaro mawaxina Jesusũ bestẽwã ana hiwenikiaki, na hãtxarã

³⁸ Jesus hatube kai kashakũkainaya ana nui pae tsekekirani kakĩ mixki tãpe merã datãtã mixki ewapawẽ bepuxinabu anu kematã

³⁹ —Bepẽkãwẽ— hatu wa nemakĩ Lázarõ pui Martã yuikĩ: —Shanẽ Ibuũ, hamaki. Meyamanãwẽ. Ma shaba dabe inũ dabe ka txapui pisi mayaikiki— aka

⁴⁰ Jesusũ kemakĩ yuikĩ: —Ewẽ dateyamawe. “Ikũwãkĩ Deusũ kuxipa mĩ uĩaiĩ”, akĩ ẽ mia dama yuibirãshurã, xinãwẽ— akaya

⁴¹ hanushũ mixki ewapawẽ bepuxinabu bepẽshunabu Jesusũ uĩtã naiuri teskãshũ yuikĩ: —Epaã, mĩ ea nĩkaiwẽ taeshũ ẽ mia pepawaii.

⁴² Ẽ mia yuka nĩkatã mĩ ea merabewakubaĩmiski. Mĩ ea yununirã, na ebe mapubaunabũ hau ea uĩkĩ ikũwanũbũ shabakabi ẽ mia yukaii— itã,

⁴³ hui kuxipawẽ kenakĩ: —Lázaroõ, hari dakama tashniyuwe!— akaya

⁴⁴ mawa tariwẽ yabu keshtu wakĩ sebikĩ utsi washũ hawẽ besuri beyabubiaxinabu ana hiwei bestẽtã kaĩkiranaya Jesusũ hatu yunukĩ: —Hawẽ yabu dapekãwẽ, hau kanunã— hatu wa dapeabu haskai Lázaro ana bestẽtã hiweniki.

Jesus atxitã tenãkatsi yubakanibukiaki, na hãtxarã

⁴⁵ Hatũ berubi Jesusũ haska waiwẽ taeshũ judeu shanẽ ibu itxapabu Mariabe beshũ Lázaro mawaxina Jesusũ ana hiwemai uĩkĩ: “Jesus Deusũ bakeki”, ikĩ ikũwaĩbũ

⁴⁶ hakia shanẽ ibu betsabũ haska washu ikũwãkatsi ikama fariseubu anu bushũ haska Jesusũ ashu hatuki txaniabu

⁴⁷ hanua Deusbe nukunabu hãtxashunika shanẽ ibubu inũ fariseubu Sinédrio kena hatube itxatã Jesuski datei yuinamei: —Ha huninã, hatu unãti wamakĩ dami tsuã haska watiruma itxapa waikiki. Nũ haska watirumẽ?

⁴⁸ Nũ nemama nuku henekĩ keyutã dasibibũ ikũwaĩ haki txiti iki keyutirubuki. Haskaibũ Romano shanẽ ibubũ hatũ soldadobu mirima beshũ nukũ Templo inũ nukunabuya nuku yamawashãkanikiki— ikaibũ

⁴⁹ hakia na habia baritiã Deusbe nukunabu hãtxashunika shanẽ ibuhaira Caifásĩ hatu nĩkatã yuikĩ: —Matunã, mã hawa unãmaki.

⁵⁰ Nukunabu hau pashkai sa iyamashanũbũ huni bestitxai nukunabu mawashunaya mã pepakũkaĩshanai mã haska xinãmaki— hatu wanikiaki.

⁵¹ Haska yubakaibu xinãmakinã, ibubis Caifásĩ xinãma hakia na habia baritiã Deusbe nukunabu hãtxashunika shanẽ ibuhairawẽ taeshũ: “Jesus judeubu mawashũtiruki”, akĩ Deusũ Caifás hatu yuimaniki.

⁵² Na haska yunuirã, habu bestikiri ikama hakia Deusũ bakebu pashka hiweakeakeabu habũ ikũwaĩbu dasibi itxawashanũ ika merabewai Jesus nuku mawashũshanai

⁵³ Caifásĩ haska hatu yuiaiwẽ taeshũ judeu shanẽ ibubũ Jesus tenãnũ ika yubakai taenibukiaki.

⁵⁴ Judeu shanẽ ibubu haki haskaibu hanua Jesus shabakabi ana niama hatu anua kaĩkaini mae betsa Efraim anu hanu hiweabuma dapi nuku iyushũ usha itxapakĩ Jesusũ nuku besti yusĩayã

⁵⁵ Páscoa judeubu nawai besimisbutiã ma kemaya nawai taeriama hatũ beya txibaĩ hau Deus ana hatuki sinatayamanũ Deus daewai ibubis pepakatsi iki mae hatiubuma anua Jerusalém anu yurabu mirima beshũ

^56-57 Jesusũ yusĩaĩ nĩkakatsi ikĩ benabaunaibũ Deusbe nukunabu hãtxashunika shanẽ ibubu inũ fariseubũ Jesus atxitã bitxinũ, iwanã, hatu yunuxĩshũ hatu yuikĩ: —Jesus haniara betxitã nuku yuikãwẽ— ikaibuwẽ taea mae betsa betsapa anua bexiãbu Templo hemaĩtĩ anua yuinamei: —Jesuskiri hawa mĩ xinaĩ? Huimẽkaĩ? Huamaraka?— ibaũbaunaibũ