João 10 - Kaxinawá Bíblia (BR)

Txashuwã mekemisbukiri miyuiwẽ Jesusũ hatu yusĩnikiaki, na hãtxarã

¹ ana Jesusũ hatu yuikĩ: —Txanima ẽ matu yuiai nĩkakãwẽ. Tsuara txashuwã meketi shuiwẽ hikiama hamauri hawẽ keneki inakaĩ butumisrã, yumetsubuki.

² Hakia hanu hikiti shui kayabi bepẽshuni hikimisrã, txashuwã mekenika kayabiki.

³ Hamẽ kene shui mekenikatũ txashuwã uĩkĩ bepẽshuna hawẽ ibuã txashuwã tibi hawẽ kenawẽ kenapakea hawẽ hui nĩkatã kaĩbiranaibũ

⁴ hawenas kaĩmakĩ dasibi kenakĩ keyubaĩkĩ bepuaya hawẽ hui nĩkabaĩkĩ txibãmisbuki.

⁵ Hanushũ huni betsã hatu iyunũ ishũ hatu kenariabaina hawẽ hui nĩkama txibãma pashai hamakiri bumisbuki— akĩ

⁶ txashuwã miyuikiri hãtxa huneawẽ Jesusũ hatu yuikĩ hatu yusĩpaia tsuã nĩkabumahairawẽ taeshũ

Jesus txashuwã mekenika kayabi hakiri yusĩnikiaki, na hãtxarã

⁷ judeu shanẽ ibubu Jesusũ ana hatu yuikĩ: —Ikũkĩ ẽ matu yuiaii. Hanu txashuwã hikiti shuirã, habia ẽ eaki.

⁸ Ẽ huriama habu dukũ bea dasibibu ẽ kenawẽ parananãkubaĩmisburã, yumetsu keskabukẽ txashuwã pepabũ hatũ hãtxa nĩkama ikubainibuki.

⁹ Hakia hanu hikiti shuirã, ẽ eaki. Tsuara eanu hikiaibu ẽ hatu mekekubaĩshanaii, Deusunabu hatu wakinã. Txashuwã meke pehairawakĩ hatu bitxitã kaĩmakĩ basi pepa pimakĩ ẽ hatu ama keska wakubaĩshanaii.

¹⁰ Huni itxakanikairã, yumetsukĩ detekĩ yamawai parananaĩ bemisbuki. Hakia hatu hiwekuĩmai ikibi imairã, ẽ ea huniki, unãnuma itxapa hatu inãkĩ yauxiama hatu kuxipa wairã.

¹¹ Earã, ẽ matũ mekenã pepaki. Mekenã pepatunã hawẽ txashuwã mekei yauxi mawashũtiruki.

¹² Hakia dayarũ pei binũ ika dayakĩ txashuwã mekeshunaya hanua kamã inu pubenẽ txashuwã pinũ ika huaya betxitã hawenamawẽ taea txashuwãki petxitã henebaini pashaya inawã bestibu atxikẽ hatiri pashai benumisbuki.

¹³ Hanua dayaru txashuwãwẽ nuiama pei besti binũ ika mese huaya pashamisbuki.

^14-15 Haska inũ, Ẽ Epã ea unãnũ eãri ẽ Epa ẽ unaĩ keska wakĩ enabu txashuwã keskabu ẽ hatu unãyã habũri ea unãkanikiki. Haskakẽ ẽ mekenã pepawẽ taea enabu txashuwã keskabu ẽ hatu mawashũtiruki.

¹⁶ Nenu besti enabumaki, na txashuwã kene anuarã. Hakia txashuwã betsaburi Deusũ ea ma yununiki. Israelbumabiakẽ haturi ẽ mekekubaĩshanaii. Ẽ hui nĩkaibu txashuwã shukua bestitxai mekenika bestitxaiya keska Israelbũ ea ikũwaĩbube Deusũ enabu dasibi ea iweshũshãkanikiki, hatuki dasi wakinã.

¹⁷ Haska inũ, hawẽ mawati kuxipa inũ hawẽ bestẽti kuxipa ẽ Epã ea yununi ẽ hayaki. Ana bestẽkatsi ẽ hiwea yauxiama ẽ mawashanaiwẽ taea ẽ Epã ea abui ewẽ nuikiki.

¹⁸ Haskakẽ tsuã ea debu watirumaki. Hakia ikatsis iki ibubis ẽ xinãnẽ ẽ debutiruki. Mawakĩ ẽ hiwea ẽ henexina ẽ ana bitiruki, ha kuxipa ẽ Epã ea yununiwẽ taearã— hatu waya

¹⁹ Jesusũ hãtxa nĩkatã judeu shanẽ ibubũ xinã dabe wai pashkakĩ

²⁰ betsabũ yuikĩ: —Yushĩ txakabu haya patapaki. Haskakĩ nũ nĩkakubaini ikanai?— hatu waibũ

²¹ betsabũri yuikĩ: —Yushĩ txakabu hayatũ pepa hãtxa yuitirumaki. Yushĩ txakabuyatunã, bekũ shushawatirumariki. Haskawẽ taea Jesus huni pepaki— ibaini buaibũ

Judeu shanẽ ibubũ Jesus danãnibukiaki, na hãtxarã

^22-23 hanua uitiã Jerusalém anu Deus kẽwãti Templo pewanibu xinaĩ besi nawaibutiã Templo hemaĩtĩ kesha anu hanu utai huĩrukuĩ tsauti txaipa hawẽ kena Salomão anu Jesus kai

²⁴ shanẽ ibubũ bebũteshũ yukakĩ: —Hatishuĩra nũ ana hamẽ bika teneyamanũ menã hawa kuxi shabakabi nuku yuiriwe, habia mĩ nukũ Messias Cristomẽkainã— akabu

²⁵ Jesusũ hatu kemakĩ yuikĩ: —Matunã, ẽ matu yuia mã ea ikũwãma ikimaki. Ẽ Epã kuxipawẽ hawara pepa shabakabi ẽ amiswẽ taeshũ ẽ tsuamẽkaĩ mã ea unãtiruki.

²⁶ Hakia mã ẽ txashuwãmawẽ taeshũ mã ea hawa ikũwaĩsmaki.

²⁷ Ẽ txashuwanẽ ea unãkĩ ẽ hui nĩkakĩ ea txibãbainaibu eãri ẽ hatu unaiĩ.

²⁸ Eki txiti ikabu benuama ẽ hatu hiwekuĩmakubaĩshanaii. Parãshũ tsuã hatu ea mebiãma ishanikiki.

²⁹ Ha inũ, tsuabura ẽ Epa kuxipa dasibi binuatũ habu ea yunua hatuwẽ nuikĩ ẽ hatu mekehairakubainai tsuã ea hatu mebĩtirubumaki.

³⁰ Ea inũ ẽ Epa Deus ha dabe nũ bestitxai keskaki, dapashkanaismarã— hatu wa

³¹ mixki tũkuwẽ tsakanũ ishũ judeu shanẽ ibubũ bitanaibũ

³² hatuki dateama Jesusũ ana hatu yuikĩ: —Epa Deus anua dami mirima pepa ẽ matu uĩmamiski. Haratu damiwẽ taeshũ mã ea tsakanũ ika ikanai?— hatu wa

³³ —Pepawẽ taeshũ nũ mia tsakamaki. Hakia huni bestibia mimebi mĩ hãtxawẽ: “Ẽ Deuski”, ikĩ mĩ Deus itxaiwẽ taeshũ nũ mia aki ikaii— akabu

³⁴ ana hatu yuikĩ: —Manakãwẽ. Ẽ Deus itxamaki. Deusũ hãtxa yuishunikatũ kenekĩ: “Ha irabeaibu pewanika hatu wakĩ Deusũ hawẽ hãtxa hatu yunukĩ yuikĩ: ‘Mã hatu merabewakubainairã, mã deusbuki’, ikĩ Deusũ hatu yuiniki”, akĩ hatu keneshuniki, na kenerã, nũ unãkanaii.

³⁵ Haskawẽ taeshũ mã danãtirubumaki. Haskakẽ hawẽ hãtxa hatu yunukĩ: “Mã deusbuki”, aki nishũ

³⁶ Deusũ ea meribi washũ yurabu anu ea yununirã, eã yuikĩ: “Ẽ Deusũ bakeki”, ẽ ikaiwẽ taeshũ: “Mĩ Deus itxaii”, ikĩ ea txitekĩ mã kaneaii.

³⁷ Hamẽ ẽ Epã pepawai keska ẽ akamakenã, ẽ hãtxa ikũwãyamakãwẽ.

³⁸ Hakia ẽ Epã pepawai keska ẽ akai ẽ hãtxa mã ikũwãma ibiakĩ ẽ Epã kuxipawẽ ẽ dami pepawai ikũwãkãwẽ. Ha dami ikũwãkĩ ẽ Epa ebe imis inũ ẽ haberi imis mã unãtirubuki— hatu waya

³⁹ ana atxipanãbũ Jesus pashai

⁴⁰ Jordão Hene pukei hanushũ Naximanika Joãonẽ hatu naximakĩ taewani anu nũ habe kakẽ

⁴¹ ana mirima hari yurã kaiã haki shukuabu hatu yusĩa yuinamei: —Joãonẽ damiwamabia dasibi Jesuskiri nuku yuixinarã, txanimaki— ikĩ

⁴² harishũ itxapabũ Jesus ikũwãnibuki.