Jó 1 - Kaxinawá Bíblia (BR)

Jó nuitapanikiaki, na hãtxarã

¹ Mai pakea ewapa Uz anu huni betsa Jó hiwea huni pepa hawa Deuskiri txakabuismatũ Deuski mesekĩ dayashũkũkaĩkĩ hawa txakabu mekĩ tsua txakabuwakatsi ikama hiwepaunikiaki.

² Hawẽ bakebu inũ hawẽ inabu hati haya inikiaki, hawẽ huni bakebu 7 inũ, hawẽ aĩbu bakebu 3rã.

³ Hanua hawẽ ina 7.000 txashuwã inũ, 3.000 camelo inũ, dabe ketashamabaĩbaina 500rã, habu ina awa bene pe dayamakubaĩkatsi hawẽ hubu meshte keyumis inũ, 500 jumenta yushã inũ, hawẽ dayaru escravo huni inũ aĩbu mirima hati hawenas ipaunikiaki. Haskawẽ taea bari huaikiri mai hirabi anu hiwebaunaburã, Jó ha besti mabuhairayatũ hatu binu keyua ipaunikiaki.

⁴ Jó 7 huni bakebũ hatũ beya txibãkĩ hatũ hiwetãshũ semana tibi habu tibitũ semana betsa shaba bestitxaitiã hawẽ huni bake betsã piti hatu pewashũtã hawẽ betsabu 6 inũ hawẽ puibu 3 hatu kenashũ piti inũ nushuti hatu pewashuna besikĩ hatubetã pikubainaibũ

⁵ semana tibi pikubaĩkĩ hanu keyuaibutiã shaba betsaki Jó shinãkĩ: “Deus yuãkĩ txakabuwashinabumẽkaĩ”, ishũ Jó penamahaira butukaũ hawẽ bakebu kena beabu hau hatukiri pe Deusũ shinanũ hatu daewashunũ, iwanã, txashuwã tesẽshũ Jó txi anu bestibu tibi hatu menushũpaunikiaki, Deus hatu daewashũkinã.

⁶ Hanua shaba betsatiã Senhor Deus bebũ hau benũbũ hawẽ nai tsumabu hatu kena bei itxabũ habiatiãri nai tsuma itxakanika Satanásri hua hatube nikẽ

⁷ Senhor Deusũ Satanás yukakĩ: —Harakiria mĩ huai?— aka Satanásã kemakĩ yuikĩ: —Mai hirabi anu uĩkĩ keyukubaũtani ẽ huaii— aka

⁸ nĩkatã Senhor Deusũ yuikĩ: —Ẽ tsuma Jó mĩ uĩmisrã, haskara hakiri mĩ shinaĩ? Jó ea duawai txĩtuĩsma keska mai hirabi anu hiweabu tsua huni betsa haska keska hayamahairaki. Hakia Jó huni pepatũ hawa txakabu mekĩ txakabuwaismatũ tsua itxakawaismaki— aka

⁹ hanushũ Satanásã kemakĩ: —Jó mia hamẽ txibãmaki. Hakia mĩ duawakubainaiwẽ taeshũ besti mia kẽwãkĩ duawai txĩtuĩsmaki.

¹⁰ Tsuabũra Jó itxakawapanã mĩ hatu nemamiski, hawẽ yura mekekĩ dasibi hawenabu inũ hawara dasibi haya mekeshũkinã. Hawara sharabu Jó dayakĩ biai merabewakĩ duawakĩ mĩ pepa wakubaĩmiski. Haskawẽ taea hawẽ inabu inũ hawẽ mabu haya dasibi hawẽ mai pakea anu hatube hiwea Jó hatu binu keyuaki.

¹¹ Hakia hawara sharabu dasibi haya mebĩshãwẽ. Mĩ haska wa miki sinatakĩ habi yupukĩ mia berabĩwãshanikiki— aka

¹² Satanás kemakĩ Senhor Deusũ yuikĩ: —Peki. Hawara sharabu Jó haya mĩ haska wakatsis ikai miã atãwẽ. Hakia Jó itxakawakĩ hawẽ yura meyamashãwẽ— aka haska wa nĩkatã Senhor Deus anua itxakanika Satanás kaĩkaĩshĩkẽ

¹³ txipu shaba betsatiã Jó huni bake iyuatũ hiwe anushũ hawẽ huni bakebu inũ hawẽ aĩbu bakebũ piti pepa itxawashũ pikĩ uva vinho aki besiaibũ

¹⁴ hanua Jó hiwe anu huni betsa hushũ banabimakĩ eska kaka Jó yuikĩ: —Heshe bananũ, iwanã, ina awa bene itxapawẽ nũ mai pukĩbainaya habiatiãri nuku dapi mĩ jumenta yushã dasibibũ basi piaibũ

¹⁵ hawaira hune Sabeu nawa mirimahairabu beshũ mĩ inabu dasibi yumetsukĩ nupe txaipawẽ mĩ dayaru dasibi tenã keyuaibũ ea besti hunei pashakirã ẽ mia yuiaii— aki

¹⁶ hawẽ hãtxa meneriama yui nikẽ huni betsari hushũ haki txaniriakĩ Jó yuikĩ: —Nai anua kana baka baka ikĩ mĩ txashuwã dasibi inũ mĩ txashuwã uinikabu tenãkĩ keyuaya ea besti hunei pashakirã ẽ mia yuiaii— aki

¹⁷ hawẽ hãtxa meneriama huni betsari hushũ Jó yuiriakĩ: —Caldéia nawabu shukua dabe inũ besti hawaira beshũ nuku detekĩ tenã keyukĩ mĩ camelo dasibi yumetsubaĩkãshuki. Ea besti hunei pashakirã ẽ mia yuiaii— aki

¹⁸ hawẽ hãtxa meneriama ana huni betsari hushũ Jó yuiriakĩ: —Mĩ huni bake iyuatũ hiwe anushũ besikĩ mĩ huni bakebu inũ mĩ aĩbu bakebũ pikĩ nushuaibũ

¹⁹ hariri tsua hiweabumakiria niwewã hawaira bekĩ hiwe deshũ dabe inũ dabe tekekĩ mĩ bakebuki di ikĩ hatu tenã keyuaya ea besti pashakirã ẽ mia yuiaii— aka

²⁰ nĩkatã haskawẽ taea punu nukahairatã Jó benitã hawẽ tari ushnitã mashtekei mãkutã Deus kẽwaĩ beui beti itã

²¹ yuikĩ: —Tariuma ẽ kaini inũ ẽ mawa tariuma ẽ kaĩkaĩshanaii. Dasibi Senhor Deusũ ha ea inãkubaĩshina Senhor Deusũ ana dasibi ea mebĩshuki. Hakia Senhor Deus kẽwãkĩ ẽ pepa wabestikubaĩshanaii— itã

²² dasibi benu keyubiatã Jó hawa txakabu shinãma inũ Deuskiri hawa txakabukĩ txakabu yuiama ikũkainikiaki.