Jeremias 7 - Kaxinawá Bíblia (BR)

Senhor Deus kẽwãti hiwe hemaĩtĩ anua Jeremias hatuki txaninikiaki, na hãtxarã

¹ Senhor Deusũ Jeremias yunukĩ yuikĩ:

² “Ẽ kẽwãti hiwe hemaĩtĩ shui dapi nishũ na hãtxa hatu yusĩkĩ hatu nĩkamatãwẽ. Mã dasibi Judá enabuũ, mã Senhor Deus habũ kẽwanũ ika hikiaiburã,

³ eska Israelĩ enabũ mekenika Senhor Deus kushipahaira dasibi binuatũ hãtxa nĩkakãwẽ: ‘Haska mã hiwekũkainai inũ haska mã akubainai pewakubaĩshãkãwẽ. Mã haska waya na mai pakea anu ẽ matu hiwemakubaĩshanaii, hawa mai pakea betsa anu matu yunuamarã.

⁴ Tsuãra matu parãkĩ yuikĩ: Senhor Deus kẽwãti hiwerã, nenuki! Senhor Deus kẽwãti hiwerã, nenuki! Senhor Deus kẽwãti hiwe nenuwẽ taea dateyamakãwẽ!’ ikaibu ha parananaĩbu ikũwãkĩ hawa hatu nĩkayamashãkãwẽ.

^5-6 Betsabube ana hatube parananãbukuãma, inũ matunabuma beaibu ana hawa hatu itxakawama inũ, bake ibuuma inũ aĩbu beneuma ana hatu itxakawama inũ, na nenu hiweabu yurabũ hawa txakabuwabuma detekĩ ana tenãma inũ, ibubis txakabui atimapakĩ yushibu dami betsa ana kẽwãma inũ, matũ hiwea mã pewakubainai inũ, haska mã ikũkainai shinã betsatã mã pepaiburã,

⁷ na mai anu hawa heneama matũ shenipabu ẽ hatu ibuwamani anu mã hiwearã, ẽ matu hiwemakubaĩshanaii.

⁸ Hamẽ parã hãtxa hawamabiakẽ hatu ikũwãkĩ mã nĩkakubaĩmisbuki,

⁹ eska tibi meirã, yumetsukubainirã, huni betsa tenãkinã, aĩbu betsa beneya txutakinã, yura betsaki hamẽ txanitxakairã, yushibu Baal kẽwãkĩ sheni ininipa kuashũkinã, haska ẽ matu nemahairabianikẽ yushibu betsa betsapabu betxipaikĩ kẽwãkinã.

¹⁰ Mã haskabiai na ẽ kẽwãti hiwe ẽ meribi wani anu ea bebũ nishũ ea yukanũ ika mã bebirã bebirãmisbuki, ‘Ẽ mekei pea hiweaki’, ikarã. Hakia haska ẽ betxipaiama txakabu betsa betsapa mã akubainai eã ẽ ana tenetirumaki.

¹¹ Na kẽwãti hiwe ẽ meribi wabianikẽ ikis yumetsubũ hiwe keska wakĩ itxakawakĩ mã ea shinãmismẽ? Dasibi mã haska wakubainairã, ẽ matu uĩkubainaii. Ea ẽ Senhor Deusũ ẽ txanima hãtxawẽ ẽ matu mestẽwaiĩ.

¹² Ha dikabi ha mae Siló ena wakĩ katutã hanu dukũ eki nukuti tari hiwe ẽ hatu pũtemani anu hanu bushũ uĩtãkãwẽ, ẽ haska wanimẽkainã, Israelĩ enabu ha Siló mae anushũ txakabuwaibuwẽ taeshunã.

¹³ Mã txakabu betsa betsapa wai matu shinã betsawamakĩ ẽ matu yuibiakubaina mã ea nĩkakatsi ikama iniki, ea hawa kemamarã. Ea ẽ Senhor Deusũ ẽ txanima hãtxawẽ ẽ matu mestẽwaiĩ.

¹⁴ Haskawẽ taeshũ ha ẽ kẽwãti hiwe meribi Siló anua ẽ txakabuwani keska wakĩ matũ shenipabu inũ matubu na ẽ kẽwãti hiwe matu meribi wamatã ẽ kena ẽ netani ha mã haki txiti ikabu habiaskari wakĩ ẽ txakabuwashanaii.

¹⁵ Matu haska besti wama ea bebunua matu putakĩ txaihaira ẽ matu nitxĩshanaii, Efraimnẽ enabũ ea ana txibãbuma ẽ hatu nitxini keska wariakinã”, iwanã,

Israelĩ enabũ Senhor Deus sinatamanibukiaki, na hãtxarã

¹⁶ “Jeremiasĩ, mianã, na yurabukiri ea yukakĩ ana ea hãtxa wayamashãwẽ. Hatuwẽ dabanã ikĩ ea ea ayamawe. Hatuwẽ nui ekiri hatu hãtxashũyamawe. Hatukiri ẽ mia nĩkamawẽ taeshũ hawẽtsaĩs yukakĩ ea bika wayamashãwẽ.

¹⁷ Judá enabũ mae tibi anushũ inũ Jerusalém anushũ haska habũ akaibu mĩ hatu uiãmamẽ?

¹⁸ Bake mishtĩbũ karu metash itxawakĩ mãtxiaĩbũ hatũ ibu hunibũ txi keti waibũ aĩbuaibũ shekiwã trigo duru misi wakatsi pewakĩ kamuskĩ teshwashũ misi watã dami yushibu aĩbu hawẽ kena Nai Shanẽ Ibu hawẽ dami bebũshũ kẽwãkĩ ha misi inãkubaĩmisbuki. Haska wakĩ ea danãkĩ nawabũ yushibubu kẽwãkĩ uva vinho inaĩ mã eki sinatamisbuki.

¹⁹ Hakia eki sinatabiai eki sinatama haskairã, ibubis hatumebi daketapai itxakanikakubaĩmisbuki. Ea ẽ Senhor Deusũ ẽ hãtxa ẽ mestẽwaiĩ.

²⁰ Haskamisbuwẽ taea eari berukukaũ hatuki ẽ sinata paepai ea uĩshãkanikiki, na ẽ kẽwãti hiwe inũ, na mae anu hiweabu inũ, hatũ inabu inũ, hatũ mibã hi sharabu inũ, hatũ yunu tsekariabuma ẽ kupishanaii, bai ewapa ketiã hi ikainai tsuã nukawatiruma keska wakinã. Haska Senhor Deusũ txanima ẽ matu yuiaii”, ikĩ

²¹ Israelĩ enabu mekenika Senhor Deus kushipahaira dasibi binu keyuatũ hawenabu yuikĩ: “Ea hawẽ kẽwãkĩ ina hirabi menukĩ keyukubaĩkĩ txashuwã tesẽshũ hawẽ bitxi dashpeshũ hawẽ nami shateshũ hati mã akatsi ikai ea benimawakĩ hawẽ sheni menu keyukĩ hawẽ nami pitxãshũ pikubaĩshãkãwẽ, ẽ hatu aniki.

²² Hakia Egito anua matũ shenipabu ẽ hatu tashnimabiranaitiã Mati Sinai anushũ inabu hirabi menukĩ keyutirubu inũ txashuwã sheni kuatã hawẽ nami huatã pitirubukiri yunukĩ ẽ hatu yuiriama

²³ hau ea dukũ nĩkakubaĩshanũbũ ẽ hatu yunukĩ taewaniki. Haska ẽ hatu yunua akubainaibu enabu hatu watã hatũ mekenika Deus ẽ ikũkaĩshanaii”, iwanã, “ẽ hatu yuiniki, hau habu ea hiwei peshũkubaĩshanũbunã.

²⁴ Ẽ hatu haska wabiani ẽ haska betxipaiai akĩ ea benimawama ẽ hãtxa danãkĩ hatũ huĩti kushi watã ea nĩkama hatũ txakabu putama haska besti shinãkĩ akatsi iki hiwekubainibuki. Ea anu ana txĩtuĩ bekatsi ikama txakabu henekatsi ikama eki petxinibuki.

²⁵ Egito anua matũ shenipabu tashnibiranibutiã inũ na habiatiãri ẽ hãtxa yuishunikabu betsa betsapa ẽ matu anu yunuakeakekubirãmiski.

²⁶ Hakia matubũ ea nĩkakatsi ikama ẽ haska matu yunuai txibãkĩ ea ashuãma huĩti kushihairatã txakabuwakĩ matũ shenipabu mã binuhairaii”, iwanã,

²⁷ “Jeremiasĩ, mia hawa nĩkabumabiakẽ na ẽ hãtxa hatu yuikubaĩshãwẽ. Mia hawa kemabumabiakẽ hui kushipawẽ hatu yuishãwẽ,

²⁸ eska hatu wakinã: ‘Matũ mekenika Senhor Deusũ matu yunubia ha yurabu mã hiweabu matu pewapanã mã ea hawa nĩkakĩ txibaĩsbumaki. Matũ hãtxa txanima matũ kesha anu ana hayamahairakiaki’, akĩ ea hatu yuishũshãwẽ”, akĩ Senhor Deusũ ea yuimaki.