Jeremias 1 - Kaxinawá Bíblia (BR)

Jeremias Deusũ hãtxa yuishunika taenikiaki, na hãtxarã

¹ Hilquiasĩ huni bake Jeremiasĩ yuini inũ akubaini matu yuinũ nĩkakãwẽ. Benjamimnẽ enabũ mai pakea anu mae betsa Anatote anu Jeremias hiweniki. Hawẽ epa inũ hawẽ shenipabu hunibu hawenabu Deusbe hãtxashunikabu ipaunibuki.

² Judá enabũ mai pakea anu Jerusalém anu Amomnẽ huni bake Josias shanẽ ibukũkaini ma 13 ano kainaitiã Senhor Deus Jeremiasbe hãtxai taeniki.

³ Ha dikabi Jerusalém anu Josiasĩ huni bake Jeoaquim shanẽ ibukũkainaitiã inũ Josiasĩ huni bake betsa mashku Zedequiasri shanẽ ibuyama 11 ano kainaitiã Senhor Deus habe hãtxakũkainiki. Hanua habias 11 anotiã 5 ushe kaya Jerusalém Babilônia anuabũ atxitã hanu hiweabu Babilônia anu hatu iyuaibũ Senhor Deus Jeremiasbe hãtxakũkainiki.

Senhor Deusũ Jeremias katutã kushipawanikiaki, na hãtxarã

⁴ Senhor Deusũ ea hãtxa wakĩ yuikĩ:

⁵ “Mĩ ibubũ mia bikĩ naneriama bebũkiri ẽ mia katuniki. Minabu shukuabu tibi hiwebaunabu anu ẽ hãtxa ea yuishunika mĩ ikũkaĩshanũ mĩ kaĩriama eã mia meribi wakĩ ẽ mia pashkaniki”, ea wa

⁶ eã kemakĩ yuikĩ: “Mĩ ea peirawawa! Senhor Deusuũ, ẽ berunã ẽ hãtxa tapĩkĩ ẽ unãriamaki”, akĩ

⁷ ẽ haska wabia Senhor Deusũ ea yuikĩ: “ ‘Ẽ berunãki’, ikĩ yuiyamawe. Hanu ẽ mia yunuai anu mĩ kakũkaĩshanaii. Haska ẽ mia hãtxamai hãtxakĩ mĩ hatu yuikubaĩshanaii.

⁸ Haska ẽ mia yunuaiwẽ taearã, tsuki dateyamakũkaĩshãwẽ. Eanã, mia mekei mibe kakĩ ẽ mia merabewashanaii. Ea Senhor Deusũ txanima ẽ hãtxa ẽ mia inaiĩ”, iwanã,

⁹ Senhor Deusũ meshũkirã ẽ kesha mekĩ ea yuikĩ:

¹⁰ “Mĩ kesha anu ẽ hãtxa mistukĩ ẽ mia inaiĩ. Natiã mia tsuã binutirumawakĩ ẽ mia kushipawaii. Shanẽ ibu kushipabu inũ dasibi nawabu hiwebaunabu mĩ hatu betsea keska washanai inũ betsabu mĩ hatu berãshanaii. Betsabu hatu nuitapawakĩ mĩ hatu yamawashanaii. Betsabu mĩ hatu denekĩ akawashanaii. Ha dikabi betsabu merabewakĩ mĩ hatu ana benishanaii, mibã ana banakĩ hatu akawakinã”, iwanã,

¹¹ hanushũ ea uĩmakĩ Senhor Deusũ ea yukakĩ: “Jeremiasiĩ, hawa mĩ uiaĩ?” ea wa eã kemakĩ yuikĩ: “Amendoeira hi mebi ẽ uiaiĩ”, ẽ wa

¹² Senhor Deusũ ea ana yuikĩ: “Haska txanima mĩ pe yuiaii. Haska ẽ yunua hau txibãkĩ menekubainũbũ eari ushama ẽ uĩkubaĩshanaii”, ea watã,

¹³ ana ha katxu Senhor Deusũ ea yukakĩ: “Mĩ hawa uiaĩ?” ea wa eã kemakĩ: “Kẽti pitxãmea kukatsa iki ma nortekiri keshkã hukukatsis ikai ẽ uiaiĩ”, ẽ wa

¹⁴ Senhor Deusũ ana ea yuikĩ: “Ha mai pakea nortekiri hiweabu txakabu atimapa bekĩ hatu na mai pakea atxishãkanikiki.

¹⁵ Ea Senhor Deusũ txanima ẽ haska washanai ẽ mia yuiaii. Nortekiria shanẽ ibu betsa betsapa dasibibu hawẽ detenamenikabuya ẽ hatu kenashanaii. Mae tibi anu shanẽ ibubu bea Jerusalém hikiti shui tibi bebũ inũ Judá mai pakea mae bekesh tibi mishkiwẽ kenebaunibu keshebaũshũ hatu yunukĩ hatũ shanẽ ibu tibi tsauti anu tsaubaũshãkanikiki.

¹⁶ Nawabũ hatũ yushibu dami watã kẽwãmisbu enabũri ha dami kẽwãkĩ ha bebũshũ sheni ininipa kuakubaĩkĩ ea danãkĩ henenibuwẽ taeshũ ha txakabubu hau hatu kupinũbũ shanẽ ibu txakabubu hatu anu ẽ yunushanaii.

¹⁷ Miarã, ibubis kushipawe, hawa dateamarã. Hatu anu kashũ ẽ hãtxa dasibi mia yuikĩ ẽ mia yunushu hatu yuikubaĩtãwẽ. Haska ẽ mia yunuai mĩ betsa waya hatu bebũshũ ẽ mia saki saki imatiruwẽ taea hatuwẽ dateyamashãwẽ.

¹⁸ Judá enabũ mai pakea anu hiweabu hatũ shanẽ ibuhairabu inũ, hatũ shanẽ ibu yununika beshmasbu inũ, minabu ebe hãtxashunikabu inũ, yurabu mae anu hiwebaunabu bebũshũ mĩ hatu nemakubaĩshanũ mae mishkiwẽ kenebaũkĩ keyatapa wanibu keska mia wakĩ inũ, mane ferro txibu kushipa keska mia wakĩ bronzewẽ mae kenebaunibu keska mia watã ikis eã mia nitxĩkĩ ẽ mia yunuaii.

¹⁹ Mia mekei ẽ mibe kakũkaĩshanaiwẽ taeshũ habũ mia nĩkama miki sinatabiakĩ mia hawa binumama ishãkanikiki. Ea Senhor Deusũ txanima ẽ hãtxa ẽ mia inaiĩ.”