Hechos 5 - Kaxinawá Bíblia (BR)

Ananias inũ hawẽ aĩ Safirã Deusũ Yushĩ Pepa parãpai eskanibukiaki, na hãtxarã

¹ Ha haskaibutiã huni betsa hawẽ kena Ananias inũ hawẽ aĩ Safirã hatũ bai huni betsa inãtã hawẽ taeshũ pei bitã

² hawẽ aĩbe yubakatã pashkashũ dabukũ hawena wakĩ arutã hatiri Jesusũ kuxipayabu anu bushũ inãyã

³ hanushũ Pedrõ yuikĩ: —Ananiasiĩ, mĩ bai inãtã pei bitã pashkashũ dabukũ arutã haskakĩ Satanásã mia txakabuwamaya nuku yui Deusũ Yushĩ Pepaki mĩ txani txakai?

⁴ Mĩ bai mĩ hatu inãriama minayushuki. Ha inũ, pei mia inãbu minariayushuki. Hakia mĩ pei mĩ pashkashũ nuku inãkĩ mĩ nuku paraĩnã, mĩ nuku akamaki. Mĩ Deus paranũ ika ikaii. Hawai eiskirã mĩ haskatuxiai?— aka

⁵ Ananias haska yuiai nĩkatã tĩ itã mawaya haskai nĩkatã dasibibu dateaibũ

⁶ hanua berunã dabe hushũ hawẽ yura yabutã bushũ maiwai buabũ

⁷ hakimamari três hora binuaya Ananiasĩ aĩnĩ haskashu nĩkariama hatũ hiwe anu hikiaya

⁸ Pedrõ yukakĩ: —Matũ bai inãtã hati pei besti mã bishu mĩ benẽ ea inãshumẽ?— aka Safirã kemakĩ: —Heẽ, habiati besti hawẽ karuki— akaya

⁹ Pedrõ yuikĩ: —Haskai Deusũ Yushĩ Pepa parãkatsis iki mã yubakarabekãshumẽ? Mĩ bene parananaĩwẽ taea ma mawa maiwatani bekanikiki. Mĩ miari mawaya mia maiwariai bukanikiki— akaya

¹⁰ habiatiãri hawaira hari mawai Pedrõ tae namã di ikaya hanua ha hawẽ bene maiwatani berunã dabe hikitã hawẽ aĩ ma mawaria betxitã hawẽ yura hari bushũ hawẽ bene dapi maiwarianibukiaki.

¹¹ Hanua ikũwaĩbu itxapabu inũ dasibibũ haskashu kakaibu nĩkatã date paepanibukiaki.

Tsuã haska watiruma wakĩ Jesusũ kuxipayabũ haikaimas isĩ teneaibu hatu shushawanibukiaki, na hãtxarã

¹² Deusũ hawẽ kuxipa hatu yunua Jesusũ kuxipayabũ yurã kaiã merabewakĩ dami atimaska haikaimas betsa betsapa akaibũ hatu bana nĩkatã hatube itxai bebirã bebiranaibũ hanu Templo hemaĩtĩ anu hanu bari kuaya utamisbu hawẽ kena Salomão anu ikũwaĩbu betsabu hatuki dasi itxakubainibukiaki.

¹³ Hanua hatiritũ hatũ yusĩa nĩkai itxakatsi ikabumabia hakia dasibibũ ikũwaĩbukiri pe xinã bestikubainibukiaki.

¹⁴ Haskabiaibũ ana mirimabũ hatubetã hatũ Shanẽ Ibu ikũwaĩ huni itxapa inũ aĩbu itxapa hatuki dasikubainaibũ

¹⁵ hanua betsarã, tsuabũra hatunabu isĩ teneaibu hawẽ dakatiki iweshũ bai kesha hanu Pedro huai anu xinãkĩ hau ha kawãkĩ hawẽ yura baka utawẽ hau shushawashunũ isĩ teneaibu hanakubainabu Pedro hanu kakĩ ha isĩ teneaibu bestibu hatu shushawakubainaya

¹⁶ hanua ha dikabi hanu Jerusalém dapi hiwebaunabũ hatũ yurabu isĩ teneaibu inũ yushĩ txakabũ betsa betsapawẽ hatu nuitapawamis habu Jesusũ kuxipayabu anu hatu iweriabirãbiranaibu dasibibũ ea akaibu haburi hatu shushawakĩ keyurianibukiaki.

Jesusũ kuxipayabũ hau ana yusĩyamanũbũ shanẽ ibubũ ana hatu nemapai inibukiaki, na hãtxarã

¹⁷ Ha hatu haska waibutiã Deusbe hawenabu hãtxashunika shanẽ ibuhaira inũ saduceu habũ txibãmisbu habianushũri Jesusũ kuxipayabu hatu uĩ hatũ kuxipawẽ kemubiai hatuki sinatakĩ

¹⁸ Templo mekenikabu hatu yunua atxitã hatũ mae meketi hiwe merã hatu bitxiabũ

¹⁹ hanushũ mexu merã Deusũ nai tsuma hushũ habũ mekeabu hatu unãmamatã bitxiti hiwe beputi bepẽtã hatu kaĩmatã yuikĩ:

²⁰ —Nenua ẽ matu kaĩma bushunã, ha Templo hemaĩtĩ anu hikitã hanushũ Deusũ kakape hiwekuĩmati hãtxa dasibi hatu yusĩritãkãwẽ— hatu wa

²¹ haska hatu yuia nĩkabaĩ penaya Templo hemaĩtĩ anu bushũ hatu yusĩkĩ taewaibũ habiatiãri ma kaĩbainabu unãmabia Deusbe hawenabu hãtxashunika shanẽ ibuhaira hawenabube itxatã Israelbu shanẽ ibu betsa betsapabu Sinédrio dasibi hatu itxawashũ hatũ meketi hiwe anua Jesusũ kuxipayabu hatu bitxixinabu hau itanũbũ hatũ mekenikabu yunuabu

²² bushũ meketi hiwe anu hikishũ ma kaĩbainabu hawa hatuki nukuama benatã txĩtũbaĩ ha kaka hatu

²³ yuikĩ: —Hanu meketi hiwe anu nũ hikia beputi tibi bepui pea policiabũ pe mekeabu uĩtã hatu iwẽnũ, ishũ hawẽ hikiti beputi bepẽtã ana tsua ha merã hayama nũ uĩtanaii— hatu wabu

²⁴ hatu haska yuiabu nĩkatã Templo mekenikabu shanẽ ibu inũ Deusbe hawenabu hãtxashunika shanẽ ibubu yuka iki: “Haskaxinabumẽ?” iki hawa xinãtima yuinameaibũ

²⁵ ha haskaibutiã haskarapanãbũ huni betsã hatu uĩbirã hikishũ hatu yuikĩ: —Ha hunibu mã hatu bitxixinarã, ũ unu Templo hemaĩtĩ anushũ ma hatu yusĩkanikiki— hatu wa

²⁶ hanua mekenika shanẽ ibu hawẽ tsumabube bushũ ana hatu itanũ ika kashũ yurã kaiãki datei: “Nuku mãkãwẽ tsaka tsaka akana”, ika hawa hatu meama

²⁷ Sinédrio anu hatu iweshũ hatu bebũ nitxĩtuxiabu Deusbe hawenabu hãtxashunika shanẽ ibuhairatũ hatu yuikĩ:

²⁸ —Ha huni akimabukiri mã hatu yusĩaĩbu nũ matu nemahairabiaxina nukũ hãtxa hawa nĩkama haskakĩ Jerusalém anuabu hatu itxawakĩ mã ha hunikiri yusĩkĩ heneamamẽ? Haska wakĩ ha huni nukukiri yuikĩ: “Mã hatu tenãmaimaki”, akĩ mã nuku hawẽ taeshũ yuãkĩ mã nuku hatu dake wamakubainaii— ikaibũ

²⁹ haskaibũ Pedro inũ Jesusũ kuxipaya betsabũ hatu kemakĩ: —Haska Deusũ xinaĩ nũ txibanũ nuku yunumis nũ akatsis ikaii. Hunibũ yunuawẽ taea nũ beshteketirubumaki— iki

³⁰ ana hãtxa txitxibaĩkĩ yuikĩ: —Jesus cruzki mã hatu mastamashũ hatu tenãmabia ha habias Deus nukũ shenipabũ kẽwãpaunibu habiatũri tenãbu nuku bestẽwãshuĩmaki.

³¹ Deusũ haska watã nai anu ainitã hawẽ yusiuri nuku tsaũshunimakẽ ha nukũ mekenã inũ nukũ yusĩnã nũ ma hayaki. Haskawẽ taea nũ Israelbu shukua tibi tsuabũra nukũ txakabu henetã Deus anu txĩtuĩ nũ xinã betsaibu nuku hawenabu wakĩ Deusũ nukũ txakabu buatã ana xinãmaki.

³² Na haskarã, Deusũ haska waima nukũ besti nũ unaiĩ. Ha dikabi Deusũ Yushĩ Pepatũ unãriaikiki, haska habũ nũ txibaĩbu Deusũ nuku inaĩmarã— hatu wabu

³³ hatu haska waibu nĩkatã hatu abuama hatuki sinatahairakĩ hatu detekatsis ikaibũ

³⁴ hanua habianuri Deusũ hãtxa kenenibu yusĩnanãmis huni betsa fariseu dasibibũ nĩkakĩ hakiri pe xinãmisbu hawẽ kena Gamaliel hatube shanẽ ibubu hanu itxabu anuri hatube tsauwa benikaũ policiabũ hau Jesusũ kuxipayabu hatu kaĩmayunũbũ hatu yunua iyuaibũ

³⁵ hanushũ Gamalielĩ habube shanẽ ibubu hatu yuikĩ: —Israelbuũ, na hunibu kupikatsis ikĩ mã haska wairã, xinãkĩ uĩrakãwẽ.

³⁶ Eskaki, matu yuinũ nĩkakãwẽ. Huni betsa Teudas shanẽ ibunũ, ishũ hatu binunũ ikĩ nukunabu parãyã 400 hunibũ hawẽ hãtxa nĩkakĩ txibaĩ haki shukuabu soldadobũ atxishũ ha huni deteabũ habũ txibaĩbu datei dasibi pashai sa iki keyunibukiaki, hanu beshtekei keyuirã.

³⁷ Hanua txipu César Augustõ hawenabu hau hatu tananũbũ yunua tanaibutiã huni betsa Galiléia anua Judas shanẽ iburianũ, ika Romanobu nemanũ ika mẽtsisipakaũkĩ hatu yusĩayã itxapabũ hawẽ hãtxa nĩkakĩ txibaĩbũ ha Judasri soldadobũ atxishũ tenãriaibũ dasibi habũ txibaĩbu pashai sa iki keyurianibukiaki.

³⁸ Haskawẽ taeshũ matu xinãmakĩ yuinũ nĩkakãwẽ. Ha huniburã, hatu meyamayukãwẽ. Habũ hatũ yusĩa ibubis ikaiburã, hamẽ hawama binushanikiki.

³⁹ Hakia Deusũ hatu yunua ikaiburã, mã hawa hatu nematirumaki. Txanima habũ Deusũ hãtxa kayabi yusĩaĩbu hatu nemakĩ mã binutirumaki. Deus nemanũ ika mã haskatirumaki. Haskakẽ xinãkĩ uĩrakãwẽ— hatu wa hawẽ yusĩa txibãkĩ pe nĩkatã:

⁴⁰ —Peki— iake iaketã Jesusũ kuxipayabu hatu ana kenashũ itxakawakĩ hi siriwẽ hatu kuxa kuxa ama bestitã ana hau Jesuskiri hatu yusĩyamashanũbũ ha akĩ hatu nemahaira bestitã hatu nitxĩkĩ heneabu

⁴¹ shanẽ ibubũ besuuria Jesusũ kuxipayabu kaĩbaini yuinamei: “Hawẽ bake Jesus Cristõ kakapekiri nũ yusĩayã Deusũ hawẽ nuku unãti watã nuku duawakatsi hatu yunua habuwẽ datei nũ beshtekẽnũ nuku akanikiki”, iki benimabaini buxĩshũ

⁴² hatu yusĩkĩ hawa heneama Templo hemaĩtĩ anushũ inũ hiwe betsa betsapa anushũ shaba betsa tukuma Messias Jesus Cristokiri kaka pepakiri hatu tapĩmakubainibukiaki.