Gênesis 37 - Kaxinawá Bíblia (BR)

¹ Hanua hanu hawẽ epa Isaque hiweni anuri Jacó hiwerianikiaki, Canaã anurã.

² Jacó inũ hawẽ bakebu hiwei haskapaunibukiaki. José 17 bariyatũ hawẽ epã escrava aĩ dabe Bila inũ Zilpã huni bakebube hawẽ epã hatu yunua hawẽ txashuwã nimakĩ pimai harishũ hawẽ betsabu maputxakashũ txakabu akaibu José hawẽ epaki txanikirãkiranikiaki.

José namai eskakũkainikiaki, na hãtxarã

³ Israel anibukĩ José bawaimawẽ taeshũ ha besti betxipaihairanikiaki, hawẽ huni bakebu betsa mawaira hatu betxipaiamarã. Haskawẽ taeshũ tari hawẽrua txaipa daya tarima Israelĩ José hatu wamashuna

⁴ hatũ epã haska washũkĩ José betxipaihairai hatu binuhaira hawẽ betsabũ uĩkĩ José dananibukiaki, haska wa nia uĩ habe pe hãtxanameamarã.

^5-8 Hanua ana betsatiã José usha namashĩkĩ hawẽ betsabu yuikĩ: —Usha namairã, ẽ eska shinaiĩ. Matu yuinũ, nĩkakãwẽ. Bai anu nũ dayakĩ shekiwã meshteshũ neashũ nũ mãtxĩkubainaya ẽ shekiwã nea hamebi benikauã nikẽ hanua matũ shekiwã neari benibirã hushũ kẽwaĩ ena dashukua itxa ena namã tinĩbaĩbaina ẽ uĩshinaii— hatu wai nĩkatã ana haki sinatakĩ yuikĩ: —Nuku binui shanẽ ibutã mĩ nuku yunushanai uĩshĩkĩ mĩ nuku yui ikai?— akĩ José nama inũ hawẽ hãtxa betxipaima José danãkubainibukiaki, shaba tibirã.

⁹ Hanua ana betsatiã José ana usha namakĩ uĩtã bestẽkauã hawẽ betsabu ana yuikĩ: —Uiã. Ẽ ana usha namashinaii. Matu ana yuinũ ea nĩkakãwẽ. Bari inũ ushe inũ 11 bishi ea namã shukua ea kẽwaĩ tinĩbaĩbaina ea daserea ẽ uĩshinaii— hatu wabirã

¹⁰ hanua hawẽ epa anuri hushũ habias hawẽ betsabu yuishu hawẽ epaki txaniaya hawẽ epã kũyã akĩ yuikĩ: —Mĩ nama mĩ nuku yuikubainairã, haskashanũ ishũ mĩ nuku yui ikai? Ea inũ, mĩ ewa inũ, mĩ betsabũ mia kẽwaĩ nũ daka beti ika dakashãkanai? Mĩ nukũ shanẽ ibu daka ikũkaĩshanai?— akaya

¹¹ hawẽ betsabũ danaĩ haki sinataibũ hakia hawẽ epã besti José hãtxa hakimama shinãshũkubainikiaki.

Hawẽ betsabũ José peiwẽ nawa betsabu inãnibukiaki, na hãtxarã

¹² Hanua betsatiã hatũ epã txashuwã pimanũ ika basi pepa benai Siquém anu José betsabu bushiãbũ

¹³ hanua txipu hau José hatu uĩtanũ Israelĩ yunukĩ: —Siquém anu mĩ betsabũ nukũ inabu pimai bushiãbuki. Hatu uĩtãwẽ, hani haskakanimẽkainã— aka —Peki. Haskakenã, ẽ hatu uĩ kaii— ikaya

¹⁴ —Mĩ betsabu inũ nukũ inaburã, haskaramẽkaĩ? Hatu uĩtãwẽ, hushũ ea banabimayushunã— iwanã, haska hanu Hebrom napãpa anushũ José yunua kai Siquém anu José hikitã

¹⁵ hatu benakubauni hamakiri benui kaya huni betsa haki nukushũ yukakĩ: —Mĩ hawa benakubaunai?— aka

¹⁶ kemakĩ: —Ẽ betsabu ẽ benai ikaii. Mĩ hatu uĩshinamẽ, hanishũ inabu pimakanimẽkainã? Ea yuiwe— aka

¹⁷ yuikĩ: —Ma nenu ibaĩshinabuki. “Dotãkiri bunãkãwẽ”, ikaibu ẽ nĩkashinaki— aka hawẽ betsabu txibaĩ Dotãkiri hatuki nukui kaya

¹⁸ José hatuki kemariama José txai huai hawẽ betsabũ betxitã: —Haska watã nũ tenaĩ?— ika yubakatã

^19-20 hatũ shinã tibiwẽ yuinametã: —Tua huaii, usha namatã nukuki txanimisrã. Tenãtã kini merã putanãkãwẽ. Hawẽ epa yuikĩ: “Yuinaka pianãbũ José pishiãki”, nũ aki bushanũbunã. Hanushũ hawẽ nama nuku yuimis haskashanimẽkaĩ, nũ uĩshanũbunã— ikaibũ

^21-22 Rúbenẽ haskaibu hatu nĩkatã José hatu nemashunũ, iwanã, yuikĩ: —Tenãkĩ himi txakawama nenu na tsua hiweabumanu ua na kini merã putanãkãwẽ, deteamarã— haskatã José detepaiaibu hatu nemakĩ txipu hawẽ epanu iyushũkatsi Rúbenẽ haska shinanikiaki.

²³ Hanua hawẽ betsabuki José nukutushiai hawa hãtxa wama atxishũ hawẽ tari txaipa hawẽrua pekãtã

²⁴ kini keyatapa metu anu putabu

²⁵ hawẽ betsa Rúben pashkakaĩkẽ hawẽ betsabu pi manishũ uĩkĩ Ismael nawabũ camelowẽ sheni ininipa hawẽ iti inũ hawẽ pushati dau Egito anu hatu inãtanũ ika Gileade anua beaibu hatu betxitã

^26-27 Judánẽ hawẽ betsabu yuikĩ: —José hamẽ detetanã, nũ hawa bitirumaki. Haskakenã ua Ismael nawa beaibu hatu inãtã pei binãkãwẽ, hau dayaru escravo wabaĩtanũbunã. Josérã, nukũ himiwẽ taeshũ tenãyamanãkãwẽ— iki yubakai maniabũ

²⁸ Ismael nawa shukua betsa mabu inananãmisbu Midiã nawabu bei hatuki nukuaibũ hatube hãtxatã kini meranua José metsũshũ kaĩmabirã hatu inãkĩ 20 pei heshe hushupa prata ewapa karuhairawẽ taeshũ José hatu inãbu Egito anu iyui buaibũ

²⁹ Rúben hatu dapashkabaĩtani ana kini anu kemashũ uiã José hayamakẽ nuihairai huĩti nishmahairatã hawẽ beyawẽ taeshũ hawẽ tari ushnitã

³⁰ hawẽ betsabu anu kashũ hatu yuikĩ: —José kini merã mã putarã, ana hayamaki. Mã haska washumẽ? Haskawẽ taea earã, haskashãpa?— hatu wa haska wakãshu Rúben yuitã

^31-32 hanushũ hatũ epa hawẽ beparãkatsi txashuwã bene pishta tesẽtã José tari hawẽ himiwẽ irumawatã hawaira neshebaĩ hatũ epanu bushũ parãkĩ yuikĩ: —Na tari nũ betxishinaki, hanu tsua hiweabuma anuarã. Habia mĩ bakẽ tarimẽkaĩ? Uĩwẽ— akabu

³³ uĩkĩ unãtã Jacó yuikĩ: —Ẽ bakenaki. Yuinaka pianãbũ pikĩ ẽ bake José ea daki piãshinabuki— itã

³⁴ huĩti nishmahairatã hawẽ tari ushnitã pekashũ nishi tari tima besha sawea usha itxapa hawẽ bakewẽ nuitxakayamai kashahairaya

³⁵ hawẽ huni bakebu dasibi inũ hawẽ aĩbu bakebu dasibitũ nesewapaiabu hatu nĩkama yuikĩ: —Ea nemakĩ nesewayamakãwẽ. Ẽ bake Joséwẽ nui saĩ isi ẽ haki nukui mawariairã— ika kasha heneyuama inikiaki.

³⁶ Habiatiãri Midiã nawabu, habias Ismael nawaburã, José iyui Egito anu hikishĩshũ peiwẽ taeshũ habũri pei bikatsi José Potifar inãnibukiaki, hau hawẽ tsuma wakĩ escravo wanunã. Egito nawa shanẽ ibuhaira Faraónẽ hiwe ewapa hawẽrua anua detenamenikabu shuku betsa mekemis Potifar hatũ shanẽ ibu inikiaki.