Gênesis 30 - Kaxinawá Bíblia (BR)

¹ Hanushũ hawẽ betsa Léiã bake bikubainaya hawawẽ haskatima hawẽ betsa bakeyaiwẽ taea nuikĩ Raquelĩ Jacó yuikĩ: —Eari bakewawe, ẽ bake biamas mawatirukirã— aka

² haska wa haki sinatakĩ Jacó Raquel yuikĩ: —Mĩ haskara shinaĩ ikai? Ẽ ea Deusmaki. Deusũ besti mia bimatiruki. Eanã, ẽ mia haska washũ bimatirumaki— aka

³ Raquelĩ ana yuikĩ: —Uiã, nukũ beya txibãkĩ ẽ dayaru escravo Bila mewe, haki mĩ ea bakewashuna ẽ bake ishanikikirã— atã

⁴ hanushũ Bila yunua Jacó bikĩ nãta aĩwãtã Bilaki bakewa

⁵ Bilã Jacó huni bake kaĩshuna

⁶ Raquelĩ datxukĩ yuikĩ: “Deusũ ea uĩkĩ ea unãkĩ ẽ shinã pewẽ taeshũ ẽ yukai hãtxa ea nĩkaimashũ ikis ẽ huni bake ea inãshuki. Haskawẽ taea na bake kenarã, Dãki”, aka

⁷ hanushũ Raquelĩ dayaru escravo Bilã ana ha katxu bake bia Jacó huni bake kaĩshuna

⁸ Raquelĩ ana datxukĩ yuikĩ: “Ẽ betsa maemanũ ika ẽ habe ha imis ẽ ma binuaiĩ. Haskawẽ taea ha bakeishtã kenarã, Naftaliki”, hatu wanikiaki.

⁹ Hanushũ Léiari ana bake biamawẽ taeshũ unãkĩ hawẽ dayaru escravo Zilpa Jacó yunuria bikĩ nãta aĩwãriatã

¹⁰ Zilpaki bakewa bake bia Jacó huni bake kaĩshuna

¹¹ Léiã datxukĩ yuikĩ: “Haska ẽ pepahairairã, enaki. Haskawẽ taea bakeishta hawẽ kenarã, Gadeki”, hatu wa

¹² hanua Léiã dayaru escravo Zilpã ana ha katxu bake bia Jacó huni bake ana kaĩshuna

¹³ Léiã yuikĩ: “Ẽ hati bake haya ẽ benimaiwẽ taea aĩbuaibu ewẽ benimakĩ ea kẽwãshanaibu ẽ benimaii. Haskakẽ bakeishta hawẽ kenarã, Aserki”, hatu anikiaki.

¹⁴ Hanu shekiwã tsekakĩ meshteaibutiã Léiã bake Rúbenẽ bai anu kashũ sheati bimi batapa betxishũ beshũ hawẽ ewa inãkẽ hanushũ Raquelĩ uĩtã Léia ea akĩ yuikĩ: —Mĩ bakẽ sheati bimi batapa mia beshuanã, eskarabe ea inãwẽ— aka

¹⁵ inãkatsi ikama haki sinatakĩ Léiã yuikĩ: —Ha dukũ ẽ bene mĩ ea mebiniki. Ikis ẽ bakẽ bimi batapa ea beshuã mĩ ea mebĩriakatsis ikai?— aka Raquelĩ hawẽ bimi sheanũ ishũ —Haskakenã, na meshu merã hau mibe iki kanũ Jacó ẽ mia anu yunuaii. Haskakẽ mĩ bakẽ bimi mia beshuã ea dabukũ inãriwe— aka haska yubaiwẽ taeshũ inãkẽ

¹⁶ hanua bari kaya hawẽ bai anua Jacó huaya Léia ka haki nukushũ yuikĩ: —Ẽ bakẽ sheati bimi ea beshuã Raquel ẽ inãshuwẽ taeshũ ẽ mia yubayushuki. Haskawẽ taea na meshu merã ebe iyuyuwe— aka Jacó nĩkatã hawẽ hiwe anu meshu merã ka habe ishũ txutakẽ

¹⁷ Léiã haskakiri Deus ea akimakiri Deusũ nĩkatã hawẽ nuikĩ Léia ana ha katxu bake bima Jacó huni bake ana kaĩshuna Léia ma 5 huni bake hayatã

¹⁸ yuikĩ: —Ẽ dayaru escrava ẽ bene ẽ yunuyamawẽ taeshũ Deusũ ea manakushuki. Haskawẽ taea hawẽ kenarã, Issacarki— akimashũ

¹⁹ habianuri ana bake betsa Léiã bima Jacó huni bake ana kaĩshuna 6 huni bake hayatã

²⁰ Léiã yuikĩ: “Deusũ ea pepawakĩ ea duawashuki. Ẽ ma 6 huni bake kaĩshunawẽ taea hanu ẽ bene ewẽ nui ebe hiweshanimẽkaĩ. Haskawẽ taea ha bakeishtã kenarã, Zebulomki”, anikiaki.

²¹ Txipu hawẽ henekĩ Léiã ana bake bia aĩbu bake kaĩshũ kenakĩ: “Dináki”, anikiaki.

^22-24 Hanushũ Deusũ Raquelkiri shinãkĩ hawẽ hãtxawẽ bake bikatsi ea akai nĩkamis shũ hau bake binũ merabewakĩ Raquel bake bimaima huni bake kaĩshũ yuikĩ: “Ẽ bakeumawẽ taeshũ ea yuãmisbu ẽ dake ea maĩwãkĩ Deusũ ẽ txakabu tere akĩ ea huni bake inãshinaki. Ana huni bake betsa Senhor Deusũ ea inãshanimẽkaĩ. Haskawẽ taea na ẽ huni bakẽ kenarã, Joséki”, anikiaki.

Labãonẽ Jacó kapanã nemanikiaki, na hãtxarã

^25-26 Hanua Raquel hawẽ bake José kaĩmakẽ Jacó hawẽ kuka Labão yuikĩ: —Ea heneriwe, nitxĩkinã, ẽ mae anu ẽ epa hiwea anu ẽ kakatsi ikairã. Ẽ mia pe dayashũkũkaĩmiswẽ taeshũ ẽ aĩ dabe inũ ẽ bakebube ea yunukĩ ea nitxĩriwe. Haskarara ẽ mia dayashũmis mĩ unãhairaii. Haskawẽ taeshũ ea nemayamawe, ẽ kaĩkainairã— aka

^27-28 nĩkatã Labão kemakĩ nemakĩ: —Miwẽ taeshũ Senhor Deusũ ea duawai ẽ uĩmiski. Mĩ ea betxipaikĩ ea ana dayashũkĩ haska mĩ ea yukai keska ẽ mia pakakĩ ashũshanaii— aka

^29-30 Jacó ana yuikĩ: —Ẽ mia dayashunaya mĩ inabu ma papakeai mĩ uiaiĩ. Ẽ mia anu huriamakẽ eskarabes mĩ hayaniki. Ikis inabu itxapahaira mĩ hayaki. Hanua ẽ mia dayashunaitiã Senhor Deusũ mia duawamiski. Natiã haska mĩ ea yuiairã, hatiã ẽ bakebu ẽ tari meribi dayashũtirumẽ?— aka

^31-32 —Hawa mĩ betxipaiai ẽ mia hawẽ pakairã— aka —Peiwẽ ea pakayamawe. Mĩ cabra inũ mĩ txashuwã itxawatã namakis nikaũkĩ katukĩ pakebaũkĩ keneya inũ meshupa inũ shiwaya ha ẽ katua mĩ ea yunua ena ishanai nũ unãtiruki. Hawẽ mĩ ea pakatiruki. Mĩ ea haska washuna mĩ inabu ẽ ana yumewakĩ mia itxapa washũtiruki.

³³ Txipu mia hushũ ẽ inabu uĩbaũkĩ mina uĩriakĩ haratu mina ẽ yumetsua mĩ uĩtiruki. Enarã, keneya inũ, shiwaya inũ, meshupa ẽ bikatsis ikaii. Haskakẽ hushupa ena anu nashui ika uĩkĩ ha ẽ mia yumetsũshina mĩ unãshanaii. Ẽ mia haska washuna ẽ huni txakabuma mĩ unãshanaii— aka

³⁴ Labão yuikĩ: —Peki. Haska mĩ shinaĩ nũ akubaĩshanaii— itã

^35-36 kashũ inabu keneya inũ meshupa inũ shiwaya pashkashũ hawẽ huni bakebu mekemakĩ shaba dabe inũ besti kaĩ hikianu Jacó txashuwãyã Labão hatu nitxĩkẽ hanushũ Jacó Labão inabu mekeshũkĩ ana taewanikiaki.

³⁷ Hanushũ Jacó hi siri itxapa meshteshũ daris akĩ pusteya wakĩ hushupa inũ meshupa watã

³⁸ hanua ũpash txashuwanẽ akaibu anu besuuri nitxĩkĩ seu wa akeakea anua ũpash aki beabu hushupabusbia txutanamekĩ

³⁹ hi siri shiwaya uĩkĩ bake bia bake meshupa inũ shiwayabu itxapa tashnikubainibukiaki.

⁴⁰ Txashuwã bake meshupa inũ keneya inũ shiwaya Jacó pashkakĩ Labão txashuwã hushupabu besuuri mapũkĩ hawena wa

⁴¹ ũpash amati anua txashuwã kushipa txutanameaya Jacó hawaira hi siri itxapa betsebaĩ nitxiã ha txashuwã hanua uĩkĩ hi siri pusteya dapikea txutanamekĩ bake kushipa hushupa pawakubainibukiaki. Hatu haska wa akeakekubaina hushupama tashnikubainibukiaki.

⁴² Hanuari txashuwã babu txutanameriaibũ hi pusteya ha dapi Jacó nitxiãma bake nanea txashuwã bake hushupa babu imana tashniriakubainibukiaki, haskakẽ txashuwã hushupa babubu Labãonarã. Hanua txashuwã keneya inũ meshupa inũ shiwayabu kushipabu hawẽ dais Jacónã inikiaki.

⁴³ Haskawẽ taea Jacó hawena itxapa hayakũkainikiaki, inabu inũ, huni inũ aĩbu tsumabu inũ, camelo inũ, jumento mirima hayairã.