Gálatas 2 - Kaxinawá Bíblia (BR)

Paulo Jesusũ kuxipaya betsa inikiaki, na hãtxarã

¹ Hanua ma 14 ano binukainaya txipu Jerusalém anu ana kakĩ Barnabébetã Tito ẽ iyuniki.

² Haskakaini kairã, ẽ xinãnẽma Deusũ haska ea unãmaya ẽ kaniki. Jerusalém anu Jesusũ kuxipayabu yununikabube hatube besti itxatã haska hatumaki Jesuskiri kakape judeubumakiri kashũ ẽ hatu yusĩtãmis ẽ kanemismẽkaĩ ika datebetanã ẽ hatuki txaniniki, hau ea nĩkatã unãnũbunã.

³ Haska ẽ hãtxa danãma inũ betsarã, Tito Gregonawabiakẽ uĩbiakĩ hau hawẽ hina kubitxi meshtenũbũ hawa nuku yunuama irianibuki.

^4-5 Hanua betsarã, nũ itxanu nukũ betsabu hatiri nukubetã ikũwaĩ kayabibumari hune nuku unãti wanũ ika hikia manishũ nĩkakĩ hawama Jesus Cristokiri nĩkatã txibaĩ ma mekei pepabiaibũ hanua habũ Moisés hatu yusĩni hatũ beya nuku ana husimakĩ txibãmanũ ika ikaibũ hawa hatu nĩkama binumakĩ ha Jesuskiri hãtxa txanimawẽ taea hawa beya tibiwẽ husikĩ matukiri nuku kanemama inibuki, mã haska betsatã maetirubumakirirã.

⁶ Jesusũ tsumabu unãnepabu habu hatu nĩkamisbu shanẽ ibubiabũ habũ hawa hãtxa bena betsa ea yuiama inibuki. Hakia txanima bemakis nũ hatu uĩkĩ xinãkĩ kẽwãbiamiskẽ haska Deusũ bemakisa xinãkĩ unãti waismaki. Haska katukinã, hatũ huĩti uke merã uĩmiswẽ taea haskawẽ ẽ nuiamaki.

⁷ Haskawẽ taea ha beya dabekiri nũ unãtinãnibuki. Haska Jesuskiri kakape nũ hatu pe yusĩnũbũ Deusũ nuku yununiki, ea nitxĩkĩ yunukinã. Judeubuma anu kashũ Jesus mekenãkiri ẽ hatu tapĩmanũ bebũkiri ea unãmaniki. Habiaskari wakĩ Jesusũ Pedrori judeubu anu yunukĩ nitxĩrianiki, hau hakiriri hatu unãmakubainunã, hawẽ mekeakirirã. Nũ haska dayamis nuku nĩkakĩ nukũ shanẽ ibubũ nuku unãnibuki.

⁸ Deusũ bake Jesusũ Pedro katushũ yunurianiki, hau hawẽ kuxipayashũ hawenabu judeubu hau hatu yusĩkubaĩshanunã. Habiaskari wakĩ Deusũ bake Jesusũ eari katutã hawẽ kuxipayawashũ judeubuma anu eari yununiki, haburi ẽ hatu yusĩriakubaũshanunã.

⁹ Haskawẽ taeshũ ẽ hawa pepamabiakẽ ewẽ nuikĩ Jesusũ ea katushũ ea yununi ẽ hatuki txanikĩ meshtãma nĩkatã habu dukũ Jesusũ hatu katuni binuabu Tiago inũ, Pedro inũ, Joãonẽ ẽ haskamis txanima unãtã ea haibuwakĩ nuku danãma ea inũ Barnabébe ea habe metaka anibuki. Nuku haska wakĩ haibuwabu ea Barnabébe pashkakaĩ judeubuma anu nũ yusĩ kaya hanua haburi hawenabu judeuburi hatu yusĩnũbũ hatube yubakatã nũ ana dayai kaniki.

¹⁰ Eska besti nuku yununibuki, nuitapaibu nũ hatu hakimayamanũbunã, eã ma ẽ habiaska wabiamiskẽ ana nuku xinãmakinã.

Antioquia anushũ Paulõ Pedro ha anikiaki, na hãtxarã

¹¹ Hanua Jerusalém anu nũ itxaxina menetã ana Antioquia mae ewapakiri nũ txĩtũkainima hiwekẽ habiatiãri Pedro nukuki bai kaxĩshũ hatu yusĩkĩ kaneaya ẽ ha bebũshũ ha ani matu yuinũ nĩkakãwẽ.

¹² Ha dukũ Pedro kashũ judeubũ beya unãbiakĩ Tiagõ haibuaibu beriabumakẽ Jesus ikũwaĩbu judeubumabetã pikubainaya habũ judeubũ beya txibãkĩ henekatsi isbuma Jerusalém anua bei ma hikiabũ hatuki mesekĩ hau hakiri txakabu xinãyamanũbũ hatu beparani ana ikũwaĩbu judeubumabetã Pedrõ piama hatu heneyuniki.

¹³ Hanushũ Jesus ikũwaĩbu judeubu betsa Antioquia mae ewapa anuabũ judeubumabetã piaibukiri pe xinãbiakĩ haska Pedrõ kanekĩ taewai keska wakĩ habũri habiaskari wakĩ kaneriakubainibuki, ẽ haibu Barnabẽ dikabirã.

¹⁴ Haska wakĩ Jesusũ yusĩa kayabi txibãkĩ pewama kaneaibu eã uĩkĩ Pedro hawẽ haibuaibube nia hatu txitekĩ: “Pedroõ, judeubia uatiã judeuma keskai mĩ hatube nishũ pikubaĩxinaki. Haskai natiã hatu beparani ana txĩtũkirã judeubũ beya hau judeubuma mĩ hatu uĩmatxakai?

¹⁵ Nukubu na nenu mapuaburã, judeubumabũ Deusũ yunuti inũ hawẽ nemati unãbuma keskama judeubu kaĩtã nũ yumeniki.”

¹⁶ Habiaskabiakẽ Moisés yunuti inũ hawẽ nemati txibaĩbuwẽ taeama tsuabũra Jesus Cristo ikũwaĩbuwẽ taeshũ Deusũ hatũ txakabu buatã ana xinãma nũ unaiĩ. Nukũri judeubũ beya nũ txibaĩwẽ taeama Jesus nũ ikũwãyã nukũ txakabu Deusũ buashũ nuku ma pepawani nũ unãriaii. Jesus haibuwama judeubũ beya besti txibaĩbũ tsuabũra txakabuwai Deusũ buashũkĩ pepa waismaki.

¹⁷ Hamẽ nuku ikirã, Moisés yusĩa txibaĩ nũ txakabu iyunibuki. Haskawẽ taeshũ ẽ mia yuiairã, Cristõnã, nuku txakabu amaismaki, txanimarã. Haskakẽ nũ pepakatsis ikĩ hatu unãti wamairã, hau nuku unãti wanunũbũ Cristowẽ taea besti nũ pepatirubuki.

¹⁸ Ha inũ, judeubũ beya danãkĩ henebiatã ana txĩtũkirã ẽ bena wairã, earã, ẽ txakabu ikeanaii.

¹⁹ Haskakẽ Moisés keneni txibãhairabiai earã, hawẽ taearã, ẽ mawa keska iniki. Haskawẽ taea Jesus Cristo mawaya ẽ habe cruzki dununi keskawẽ taea hatishũra ẽ hiweawẽ Deus duawai ẽ hiweshũyuaii.

²⁰ Natiã na ẽ yurawẽ ẽ hiweyuairã, Deusũ bakẽ ea abui ewẽ taea mawanishũ ea xinã betsa wamani ha ikũwaĩ ẽ hiweyuaii. Haskawẽ taea earã, ẽ ana emebi yunui ẽ hiweamaki. Hakia Cristo bestitũ ea yunui ewẽ hiweyuikiki.

²¹ Haska inũ, Moisés keneni txibaĩ ẽ pepa bestiaya Cristo hamẽ nuku mawashũkeaniki. Hakia natianã, ẽ ana haskamaki. Deus ewẽ nuiaya Cristõ ea mekeawẽ taeshũ ẽ shenipabũ beya henetã Cristo besti ẽ txibãkubainaii”, akĩ ẽ Pedro yusĩniki, dasibitũ nĩkaibunã.