Êxodo 7 - Kaxinawá Bíblia (BR)

¹ hanushũ Senhor Deusũ Moisés ana yuikĩ: —Uiã. Hau Faraónẽ mia nĩkakubainũ ea keska wakĩ ẽ mia heneaii, hau ẽ yunuti kushipawẽ mĩ betsa Arão hau mia hãtxashũkũkaĩshanunã.

² Dasibi ẽ mia yunua, hanushũ mĩ betsa mĩ yuia, hatũri Faraó mia yuishũkubaĩshanikiki, hau hawẽ mai pakea Egito anua Israelĩ enabu dasibi pashai buaibu hau hatu nitxĩshanunã.

³ Hakia hawẽ huĩti kushi wakĩ nĩkaisma watã ẽ kushipa hawẽ unãmati dami betsa betsapa inũ hawẽ e imati itxapa sharabu ẽ matu amashanaii, Egito mai pakea hirabi anushunã.

⁴ Matũ hãtxa Faraónẽ nĩkama danãyã hanu ẽ kushipahaira ẽ hatu uĩmakĩ dasibibu unãmakĩ Egito nawabũ hatu itxakawakubaĩmisbu Israelĩ enabu shanẽ ibu tibi hawenabube nenua ẽ hatu iyushanaii.

⁵ Ẽ kushipawẽ Egito nawabu kupitã hatu anua Israelĩ enabu ẽ hatu tashnimabainai eã ẽ matu haska wabainai Egito nawabũ ea ẽ matũ shanẽ ibu Senhor Deus ea unãshãkanikiki— akĩ Senhor Deusũ Moisés yuia

⁶ Moisĩ nĩkatã haska Senhor Deusũ dasibi yunushina Moisés inũ Arãonẽ ashũkubainibukiaki.

⁷ Moisés 80 bariya inũ hawẽ betsa Arão 83 bariya Faraó anu kashũ Senhor Deus hãtxashunibukiaki.

Arão mestẽtikirikiaki, na hãtxarã

⁸ Faraó anu buriabuma Senhor Deusũ Moisés inũ Arão yuikĩ:

⁹ —Ẽ hãtxa mã yuia Faraónẽ matu yuikĩ: “Mã ea paraĩ ikimẽkaĩ? Matũ kushipa ea uĩmakĩ hawara dami ea washũkãwẽ”, matu waya, Faraó tsaua bebũshũ hau hawẽ mestẽti Arão putashunũ Arão yunushãwẽ, hau dami dunununã— hatu wa

¹⁰ Moisés inũ Arão Faraó anu bushũ haska Senhor Deusũ yunushina keska wakĩ Faraó inũ hawẽ merabewanika shanẽ ibubu bebũshũ hawẽ mestẽti Arãonẽ puta dami dunua dakakẽ

¹¹ Faraó dateama hawẽ unanepabu inũ hawẽ mukayabu hatu kena beshũ hatũ yushĩ kushipawẽ habiaskari hatuna akĩ

¹² bestibu tibitũ hawẽ mestẽtiri putabu dami dunua maniabũ hakia Arãonẽ mestẽti dami dunuatũ hatũ mestẽti dami dunuabu ha Arãonenatũ hatu sheãkĩ keyuã

¹³ haska Faraó ashũbiabu uĩbiatã hawa dateama huĩti kushitã haska Senhor Deusũ yuishina keska Moisés inũ Arão Faraóne hatu nĩkatã hawenabu heneshunama inikiaki.

Hene dami wakĩ himi wakĩ keyunikiaki, na hãtxarã

¹⁴ Hanushũ txipu Senhor Deusũ Moisés yuikĩ: —Minabu bupanãbũ Faraó huĩti kushitxakayamatã hatu bashikiki.

¹⁵ Haskakẽ meshukiri penamahaira Arãobe hene kesha anu kakĩ ha mestẽti dunu damishina tsuma kashũ hanu Faraó butuai anushũ manashãkãwẽ.

¹⁶ Mã hari ka aki nukutã Faraóne ea yuishũkĩ: —Hebreubu mekenika Senhor Deusũ mianu ea yunushuki. Mia yuikĩ: “Hanu tsua hiweabuma anushũ enabũ ea kẽwaĩ hau bunũbũ ana hatu nemayamawe. Ẽ mia yuibia mĩ ea nĩkariamaki.

¹⁷ Mĩ haska waiwẽ taeshũ Senhor Deusũ yuikĩ: Na habiatiã ẽ shanẽ ibu Senhor Deus mĩ ea tapiaiĩ, mia waikiki. Haska hakiri mĩ unãmakẽ ea yunushu mĩ uinũ na mestẽtinĩ ẽ hene bekusha dasibi hene himi keyuikiki.

¹⁸ Ẽ haska waya baka dasibi mawai keyukanikiki. Hene pisi mayaya mesekĩ hanua ha ũpash akabuma danãshãkanikiki— akĩ

¹⁹ hawẽ betsã haska washanai Moisés besti Senhor Deusũ yuikĩ: —Arãonã, eska wamashãwẽ. Hawẽ mestẽti bitã Egito mai pakea hirabi hene anu hau himi daminũbũ hawẽ mestẽti tsumatã hene dasibi bemaki sanãbaũwẽ. Hatũ henewã inũ, hatũ iã dasibi inũ, hene beshuru ikai anu inũ, ũpash hanua biti mai pukĩkĩ kini wanibu inũ, hatũ ũpash haki manemisbu dasibi anu inũ, hanira Egito nawabu hiwebaunabu anu himi wamashãwẽ, hatũ hi kẽtxa inũ hatũ mishki shumu anurirã, akĩ Arão amashãwẽ— aka

²⁰ Senhor Deusũ yunua kashũ hau haska wanũ Moisĩ Arão ama hawẽ merabewanika shanẽ ibububetã Faraónẽ uiãyã Arãonẽ hawẽ mestẽti binikĩ sanãtã hatũ henewã bekusha hene dasibi dami himi keyuaya

²¹ baka mawai keyui hene napismayaya txakabukẽ Egito nawabũ danãkĩ atirubuma hanu hiwebaunabu anu hene dasibi dami himi keyunikiaki.

²² Hakia hatũ yushĩ kushipawẽ Egito nawa mukayabũ habiaskari wakĩ habũ ũpash dami wakĩ himi wariakẽ haska uĩbiatã Faraó huĩti kushitã haska Senhor Deusũ Arão inũ Moisĩ ma hatu yuishu keska ikaya

²³ hanua haska uĩbiashu hawa hawẽ nuiama Faraó hawẽ hiwe ewapa hawẽrua anu txĩtũkaini mapekekẽ

²⁴ hene anu ũpash bishũ atirubumawẽ taea ũpash beshna hanua biti hene kesha anu dasibitũ pukĩbainaibũ

Heu dami atimapa wanikiaki, na hãtxarã

²⁵ haska Senhor Deusũ Moisés inũ Arão hatu hene bekushmakĩ itxakawamashina 7 shaba binukainaya