Êxodo 6 - Kaxinawá Bíblia (BR)

¹ Senhor Deusũ kemakĩ yuikĩ: —Txanima habiaskaki. Natiã Faraónẽ ẽ kupiai mĩ uĩshanaii. Matu nitxĩkatsi ikama matu yaushibiai ẽ kushipawẽ taeshũ hawenabu anua ibubis Faraó matu ana nemama nitxĩshanikiki, mã kaĩbainũbunã— iwanã,

Deusũ Moisés ana hãtxawanikiaki, na hãtxarã

² Moisĩ hau hawenabu yuinũ Deusũ ana Moisés yuikĩ: —Earã, ẽ matũ shanẽ ibu Senhor Deuski.

³ Ea mekenika dasibibu binuatũ matũ shenipabu Abraão inũ, Isaque inũ, Jacó eã ẽ hatu unãmakubainiki. Hakia ẽ kena txanima kayabi shanẽ ibu Senhor Deus ẽ hatu unãmama iniki.

⁴ Habu ẽ hatube yubakanirã, Canaã mai pakeanu nawa keskai hiwekubaũpaunibu anu ha mai hirabi hawenabubetã hau ibuwashanũbũ ẽ hatube yubakaniki.

⁵ Natiã ẽ hatu nĩkairã, Egito nawabũ hatunabu tsumawanishũ hatu dayamakĩ nuitapawa txakayamaibuwẽ taea haska hatũ shenipabube ẽ yubakani ma ẽ ana hatukiri shinaiĩ.

^6-8 Haskakẽ minabu ea hatu yuishũwẽ: “Earã, emebi ẽ hiwea ẽ kenarã, Senhor Deuski. Egito nawabũ minabu dayamakĩ hau hatu ana tsumawayamashanũbũ hatu meshpamatã hatũ mai pakeanua mĩ habu pashawashanaii. Ẽ kushipa shabakabi dasibibu hatu uĩmakĩ Egito nawabu kupitã ẽ matu iyushanaii. Haska watã enabus ẽ matu washanaii. Matũ mekenika Senhor Deus ẽ ikũkaĩshanaii. Egito nawabũ matu dayama txakayamakĩ matu bika tenemaibu matũ mekenika Senhor Deusũ ẽ matu iyuni matu inũ matũ bakebu inũ matũ bababũ unãkĩ shinãkubaĩshãkanikiki, ea hakimamarã. Mai betsa ukeria Abraão inũ, Isaque inũ, Jacó ha mai pakea ẽ hatu yubaniwẽ taeshũ ha matu yunukĩ ẽ matu ibu wamashanaii. Earã, ẽ matũ shanẽ ibu Senhor Deuski, eã ẽ matu hãtxa wairã. Ea nĩkakãwẽ”— hatu wa

⁹ habias hãtxa Israelĩ enabu Moisĩ hatu yuibia Egito nawabũ hatu dayama txakayamaiwẽ taea huĩti nishma punu nukahairakĩ Moisĩ hãtxa danãkĩ ana nĩkakatsi ikabumakẽ

¹⁰ Senhor Deusũ Moisés ana yuikĩ:

¹¹ —Egito anua Israelĩ enabu kaĩbainaibu Faraónẽ hau hatu bashiyamashanũ ana uĩkĩ yuitãwẽ— aka

¹² hakia Moisĩ kemakĩ yuikĩ: —Uiã, Senhor Deusuũ, mĩ hãtxa ẽ hatu yusiã Israelĩ enabu ea hawa nĩkabumahairaki. Enabũ ea nĩkabumawẽ taeshũ haska watã Faraónẽ ẽ hãtxa nĩkatirumẽ? Earã, shabakabi hãtxai ẽ peismabia ẽ haska yuitirumaki— aka

¹³ ana nemakĩ Senhor Deusũ Moisés inũ Arão yunuhairakĩ: —Nenu Egito anua enabu Israelĩ enabu hau pashanũbũ mã hatu iyushanũ ẽ matu yunuaii. Na habias hãtxa ẽ matu yuishu matunabu inũ Faraó banabimatãkãwẽ— hatu wanikiaki.

Moisés inũ Arão Deusũ katunikiaki, na hãtxarã

²⁸ Ana shaba betsatiã Egito mai pakeanua Senhor Deus Moisésbe hãtxakĩ

²⁹ ana yuikĩ: —Earã, ẽ matũ shanẽ ibu Senhor Deuski. Hãtxa dasibi ẽ mia yuishanai Egito shanẽ ibu Faraó ea yuishũkubaĩshãwẽ— aka

³⁰ Moisĩ Deus ana kemakĩ: —Shanẽ ibu keska hãtxa pewẽ ẽ hãtxatirumaki. Haskatã Faraónẽ ẽ hãtxa ea nĩka pewatã ea ashũshanimẽkaĩ?— aka