Êxodo 34 - Kaxinawá Bíblia (BR)

Mishki sapa betsa dabeki Deusũ hawẽ yunuti inũ hawẽ nemati kene bena wanikiaki, na hãtxarã

¹ Senhor Deusũ Moisés ana yuikĩ: —Mishki sapa dabe ibubis meshte dabewe, haska ha dukũ ẽ mia inãshina keskarã, haki ẽ mia ana hãtxa kene bena washuainã, ha ha dukũ hãtxa ẽ ashiã mĩ puta durukui sa ishiã keskarã.

² Haska wakĩ pewatã penaya meshukiri mishki bena dabe bui Mati Sinai mapetã ha mamaki ea bebũ nishãwẽ.

³ Tsua hau mibe mapekeyamashanũwẽ. Ha dikabi minabũ mati uĩ hau mapekeyamashanũbũwẽ. Haska inũ, matũ inabũ basi pi hau mati bebũ mapuyamariashanũbũwẽ— aka

⁴ haska Senhor Deusũ yunushina keska wakĩ mishki ture sapa dabe hatiu dabes ha dukũ Deusũ ashiã keska wakĩ pewatã ushashini ma penakẽ bututã mishki sapa dabe bena tsumatã bui Mati Sinai anu mapekea

^5-6 hanua nai kuĩwẽ Senhor Deus bututã Moisésbe nitã ha bebũ daĩbaĩkĩ Moisés hui kushipawẽ hawẽ kena kayabis yuikĩ: —Earã, Senhor Deus Hamebi Hiwemis ẽ eaki! Ẽ nuikipa pepa inũ ẽ hĩ hĩma inũ ẽ txanitxakaisma inũ ẽ nuikipa itamamaki.

⁷ 1.000ti pakea pakubainaibu ẽ nuikipawẽ kaneama ẽ hatu mekepakemiski, hatũ txakabu hakimairã, sinatabiaibu inũ txakabuaibunã. Hakia tsuãra txakabuwakẽ hawẽ kupitiwẽ ẽ nuitirumaki, ha txakabu shinãkĩ hatu kupikinã, hatũ ibubu inũ, hatũ bakebu inũ, hatũ bababu inũ, hatũ bababũ bakebu hatube ẽ kupipakeshanaii— ikaya

⁸ haskai nĩkatã Moisés hawaira maĩ di itã beushũ Senhor Deus kẽwãkĩ

⁹ yuikĩ: —Senhor Deusuũ, miarã, Senhor Deus Mimebi mĩ Hiweaki! Ẽ mia benimawamiswẽ taea txanima nukube kashãwẽ. Ha enabu huĩti kushibuki. Haskabiakẽ nukũ txakabu nuku buashũtã ana minabu nuku wariwe— aka

Deus hatube yubakaima ana hatu pe washunikiaki, na hãtxarã

¹⁰ hanushũ Senhor Deusũ Moisés ana hãtxa wakĩ yuikĩ: “Natiã ana minabukiri ẽ mia yubai ea nĩkairawe. Haska ẽ kushipawẽ ẽ matu ashuaĩ dami itxapa dasibibũ uĩshãkanikiki, haska nawa betsabũ uiãma ipauniburã. Ẽ hatu e imaiwẽ taeshũ hanira mã bukubainaibu anushũ ẽ kushipa dami itxapa nawa betsa betsapabũ uĩkubaĩshãkanikiki, ẽ pepa matu anushũ ẽ hatu uĩmakubainairã.

¹¹ Natiã haska ẽ matu yunuairã, txibãkĩ akubaĩshãkãwẽ. Eanã, hatũ mae tibi matu mebĩmakĩ matũ berubi ẽ hatu nitxĩkubaĩshanaii, Amorreu nawabu inũ, Canaã nawabu inũ, Heteu nawabu inũ, Ferezeu nawabu inũ, Heveu nawabu inũ, Jebuseu nawaburã.

¹² Hanu hikitã mã hiweshanai anurã, hatube yubakanameyamashãkãwẽ, matũmebi mekeirã. Hamẽ mã hatube yubakairã, hatũ beya matu beyawamatirubuki, txakabuwakinã, birũ merã hikia keskairã.

^13-14 Earã, ẽ Senhor Deuski, ẽ kena betsa ẽ Senhor Deus Yaushinikawẽ taeshũ enabu yaushikĩ ẽ matu mekekubainaiwẽ taeshũ hawa yushĩ betsa kẽwãma haska ẽ matu yunuai keska wakĩ hatũ kẽwãti tibi tekekubaĩshãkãwẽ. Hatũ yushĩ kẽwãti txi tapu tibi yamawakĩ hatũ yushibu shinãmati mishki keyatapa mapuabu inũ hatũ kẽwãti hi meribi mapuabu derakĩ keyukubaĩshãkãwẽ, mae tibi anuarã.

¹⁵ Ha dikabi ha mai pakea anu hiweabube yubakayamashãkãwẽ. Habũ ea danãkĩ hamapai sharabu yushĩ kẽwãkĩ hatũ txi tapu anushũ hatũ yushibu kẽwãti piti pewatã matu pimakatsi kenabu hatubetã pikĩ mã ea hakimatirubuki.

¹⁶ Hatube mã yubakakẽ hanushũ matũ aĩbu bake hatũ huni bakebũ hatu aĩwãtirubuki. Hanushũ ha nawa txipashbu hatu aĩwãbu haska hatũ beya txakabu txibãkĩ yushibu sharabu kẽwãkĩ matũ huni bake parãkĩ hatũ yushibu hatu kẽwãmatirubuki, matũ huni bakebu habũ ea danãmakinã.

¹⁷ Ha dikabi mane payukĩ txakã txakã ashũ ha kẽwãti dami ana akĩ metaskayamashãkãwẽ”, atã

Deus kẽwaĩ ano tibi besikũkaĩtikiaki, na hãtxarã

¹⁸ ana hatu yuikĩ: “Haska ẽ matu yunuima hakimama matũ misi shashama pi besikĩ akubaĩshãkãwẽ. Hatiã ha misi shashama mã piairã, ea shinãkĩ 7 shaba akubaĩshãkãwẽ. Ushe Abibe anu Egito anua ẽ matu tashnimabiranimawẽ taeshũ ano tibi ushe Abibetiã apakekubaĩshãkãwẽ, hanu hawẽ unãmatikirã.

¹⁹ Ha dukũ mã bake wa matũ huni bakebu kaĩ taearã, dasibi ena dukũ ikubaĩshanikiki. Ha dikabi matũ ina awa inũ, matũ txashuwã inũ, matũ cabra benes habu dukũ kaiãbu dasibi enasriki.

²⁰ Hakia jumento bake bene ha dukũ kaiã enabia ibu wakatsis ikĩ ha jumento bake shãtukũ txashuwã bake bene kasmai cabra bake bene maewatã ea inãkubaĩshãkãwẽ. Hamẽ txashuwã bake kasmai cabra bake mã ea inãkatsi ikamarã, jumento bake kaiãs tetush akubaĩshãkãwẽ. Ha dikabi matũ huni bake tue bena ha dukũ kaiã enabiakẽ mã ibuwakatsis ikĩ hawẽ shãtukũ txashuwã bake mã ea inãtiruki. Hamẽ hawẽ inãkuĩ mã ea beshuãma matũ huni bake hanu eki nukuti hiwe anu iweshũ mã ea uĩmatirumaki.

²¹ Semana tibi 6 shaba besti dayakubaĩshãkãwẽ. Hakia sétimo shabatiã ea kẽwaĩ hanu shaba bestitxai anu huĩrukũkubaĩshãkãwẽ. Daya itxapa mã haya mibã banaitiã inũ bimi tsekatitiãbiakẽ hawẽ nuiyama sétimo shabatiã hanu huĩrukũkubaĩshãkãwẽ, ea shinainã.

²² Ha dayakĩ mã yunuima ha dukũ shekiwã kaniai mã tseka taewashanaitianã, semana hirabi besikubaĩshãkãwẽ, hanu besti Besiti Semana wakinã. Ha inũ, matũ yunu dasibi itxawakĩ aru keyutã benimai besiriakubaĩshãkãwẽ. Ano tibi Páscoatiã inũ, Besiti Semanatiã inũ, Yunu Arukĩ Meneaitiã shinaĩ haska tibi wai besikubaĩshãkãwẽ, hakimamarã.

²³ Mã haska tibi akĩ betsa betsapa wai ano tibi dabe inũ bestiki hanu eki nukuti tari hiwe anu berunãbu inũ huni ewabu dasibi ea Senhor Israelĩ enabu mekenika Deus bebũ itxakubaĩshãkãwẽ.

²⁴ Mã haskakubainaibu matu bebũshũ ẽ kushipawẽ nawa shukuabu tibibũ mae matu mebĩmakĩ ẽ matu nitxĩshũkubaĩkĩ matũ mai pakea ana ewapa wakĩ ẽ hatu mesewaiwẽ taea tsuã matũ mae biãtirubuma ishãkanikiki. Haska hakimama ha dabe inũ bestiki ea kẽwaĩ ea beyus shuni itxai ano tibi ikubaĩshãkãwẽ.

²⁵ Ea duawakĩ benimawanũ, iwanã, matũ inabu ea kuashũkinã, hawẽ himi bishũ misi shashayabi hawẽ himi husitã ea inãkuĩyamashãkãwẽ. Páscoatiã Egito anushũ matũ hiwe tibi ẽ detenika nai tsumã dũkebaini shinãkĩ txashuwã hiki keũshũ shuitã pikĩ keyukĩ meshukiri pikatsi teshe mekeyamakubaĩshãkãwẽ.

²⁶ Bari tibi dayakĩ matũ bai anu hawara mibã ha dukũ mã banaima iki taeai kaniai piama mã ea betxipaiai ea unãmakĩ hanu eki nukuti hiwe anu matũ yunu bimi beshũ hau ea bishunũbũ ebe matu hãtxashunikabu inãkuĩkubaĩshãkãwẽ. Cabra bake pishta detetã hawẽ ibuã txutxuki hawẽ nami bawataskayamashãkãwẽ”, itã

Hawẽ yunuti inũ hawẽ nemati hãtxa Moisĩ kenenikiaki, na hãtxarã

²⁷ Senhor Deusũ Moisés yunukĩ yuikĩ: “Ẽ yunuti inũ ẽ nemati hãtxa hakimatima mia inũ minabu Israelĩ enabu dasibibube ẽ mia hatube yubakubaĩshu ea keneshũwẽ”, akĩ mati anushũ Senhor Deusũ Moisés yunua

²⁸ haria Senhor Deusbe Moisés niti ishiã 40 shaba inũ 40 meshu hawa piama hawa ũpash akama hiweyushũ ha hawẽ yuba hãtxa yunuti inũ nemati mishki ture sapa dabe benaki 10 hãtxa Moisĩ kenekĩ keyutã

²⁹ Mati Sinai anua Deusũ yuba hãtxa unãti mishki sapa dabe bakebirani Moisés butui Senhor Deusbe hãtxakũkaĩshinawẽ taea hawẽ besu txasha txasha ibiai hawa unãma hui

³⁰ Moisés hawenabuki kemaya Arão hawenabu Israelbubetã Moisĩ besu txasha txasha ikai uĩ haki datei haki kemabumakẽ

³¹ hanushũ Moisĩ hatu kena Arão inũ hatũ shanẽ ibubu Moiséski kematã habe hãtxai bei haki itxabũ

³² txipu hawenabu dasibi mae hirabi anua bei Moiséski itxai haki dasiriaibũ Mati Sinai anushũ haska Senhor Deusũ hawẽ hãtxa yunushina dasibi hatu shabakabi unãmatã

³³ haska hãtxa hatu yui keyutã hawenabu mesewakatsi ikama hawẽ tari tuashwẽ beyabukukẽ

³⁴ hanua Senhor Deusbe hãtxai kanũ ishũ pekabaini Deuski nukuti tari hiwe anu hikia hanu habe hãtxai keyutã ana tashnitã hawara Senhor Deusũ yunushu inũ nemashu hatu unãmakubainikiaki.

³⁵ Hanua hawẽ besu txasha txasha ikai uĩ haki dateaibuwẽ taea hawẽ tari tuashwẽ beyabukukũkainikiaki, hanu Senhor Deusbe hãtxamatianã, hanu Senhor Deusbe hãtxai kaitiã pekatãtanirã.