Êxodo 33 - Kaxinawá Bíblia (BR)

Hau bunũbũ Senhor Deusũ hatu yununikiaki, na hãtxarã

¹ Habiatiãri Senhor Deusũ Moisés ana yuikĩ: —Minabu iyui nenua kariwe. Ha dukũ Abraão, ha katxu hawẽ bake Isaque, ana ha katxu hawẽ baba Jacó ẽ yubakĩ: “Na mai pakea hirabi minabu ẽ ibu wamashanaii”, akĩ ha dabe inũ besti habiaskasri ẽ hatu yubani anu minabu Egito anua mĩ hatu tashnimabiranima hatu iyuritãwẽ.

² Ẽ nai tsuma kushipa hau hatũ matu merabewakubainũ matube ẽ yunushanaii. Mã hariri kanũ hau hatũ matu bai meshtemabaĩkĩ nawa tibi hatũ mai pakea anu Canaã nawabu inũ, Amorreu nawabu inũ, Heteu nawabu inũ, Ferezeu nawabu inũ, Heveu nawabu inũ, Jebuseu nawabu matu nitxĩmashanikiki.

³ Ha mai pakea anu mã kairã, hanu inapã txutxu inũ buna bata hamẽ itxakayamai anu mã piti pepa hayashanai anu bukãwẽ. Hakia earã, ẽ matube kamaki. Minabu patapabube kakĩ bai namakishũ ẽ hatu yamawakatsi ikamaki.

^4-5 Eska ea hatu yuishũtãwẽ: “Mã nĩkaismawẽ taea matube ẽ kamaki. Txai matube kariama: ‘Matu yamawanũ’, iwanã ẽ shinãtiruki. Haskawẽ dabanã ẽ matu pewakĩ ẽ haska washanai ẽ unãshanũ matũ shinã txakabu hakimatã matũ mane dauti dasibi pekakãwẽ, ana saweamarã”, akĩ habias hãtxa minabu ea banabimashũtãwẽ— aka butushũ hawenabu itxawashũ haska Senhor Deusũ yuishu Moisĩ hatu yuia hawẽ dateti hãtxa nĩkatã huĩti nishmahairakĩ hatũ mane dau yaushihairabiakĩ pekakĩ keyunibukiaki.

⁶ Haska hãtxawẽ taea Mati Horebe hawẽ kena betsa Sinai anushũ hatũ mane dau Israelĩ enabũ peka keyunibukiaki.

Hanu Deuski nukuti tari hiwe taewanibukiaki, na hãtxarã

⁷ Ha mae anua hanira hatu iyuriama tari hiwe wati bishũ hatũ mae dapi benãta Moisĩ hatu pũtemashũ kenakĩ: “Hanu Deuski nukuti tari hiweki”, anikiaki, haskakẽ Senhor Deus anua hawẽ hamapaikiri unãkatsi iki hanu bushũ manatiruburã.

⁸ Hanua hanu Deuski nukuti tari hiwekiri Moisés kaya yurabu benia hatũ tari hiwe hikiti shui anu kaiã nishũ uĩkĩ tanaibũ

⁹ ha tari hiwe merã Moisés hikiaya nai kuĩ butukirã tari hiwe hikiti shui anu nia nai kuĩ merã hunebia Senhor Deus Moisésbe hãtxaya

¹⁰ nai kuĩ haskakirã beputi anu niti ika nikẽ yurabũ uĩ hatũ tari hiwe hikiti shui anushũ Senhor Deus kẽwaĩ dasibi dãti ikabu

¹¹ tsuara hawẽ haibube hãtxamis keskai benitximea Senhor Deus Moisésbe hãtxapaunikiaki. Haskatani Moisés hawẽ hiwe anu txĩtũkiranaya hanua hawẽ merabewanika Numnẽ bake berunanã Josué ha hiwe anua kaĩkĩ henebiranama ipaunikiaki.

Senhor Deusũ besu txasha txasha ikai uĩbiai hawẽ besu Moisĩ uĩtiruma inikiaki, na hãtxarã

¹² Txipu hanu Senhor Deuski nukuti tari hiwe anushũ hãtxanamekĩ Moisĩ Senhor Deus yuikĩ: —Uiã. “Minabu iyushãwẽ”, akĩ mĩ ea yuibiashĩshũ tsuã ea merabewashanai mĩ ea yunuriamaki. Hamẽ betsa ea yuikinã: “Mĩ ea haibuwani mĩ eki txiti imis ẽ unaiĩ. Mĩ ea benimawamiski”, akĩ mĩ ea yuiriashinaki.

¹³ Na haska nũ hãtxamisrã, txanimaki. Haskawẽ taeshũ ẽ mia ea aki ikaii. Haskara mĩ nukukiri shinaĩmẽkaĩ, huneama shabakabi ea unãmawe, nũ parananãma ikũkaĩmis ẽ hatu yuikubaĩshanunã. Ha dikabi Israelĩ enabu minabuki, shinãpakeshãwẽ— aka

¹⁴ Senhor Deusũ yuikĩ: —Peki. Ea kayabis mibe kakĩ merabewakĩ ẽ mia unanuma mekekubaĩshanaii— aka

¹⁵ Moisĩ kemakĩ: —Peki. Mia mĩ nukube kakatsi ikamarã, nenua nuku tashnimakĩ nuku nitxĩyamashãwẽ.

¹⁶ Mĩ nukube kama nukuwẽ mĩ nuiai ẽ unãtirumaki. Hakia mĩ nukube kai nukuwẽ mĩ nuiai ẽ unãtiruki. Nukube mĩ kaya ea inũ minaburã, nawa betsa betsapabu anua mina wakĩ mĩ nuku katunirã, dasibibu mai hirabi anushũ mikiri unãkubaĩshãkanikiki— aka

¹⁷ Moisĩ hãtxa nĩkatã Senhor Deusũ kemakĩ yuikĩ: —Peki. Haska mĩ ea yukai keskarã, mĩ ea benimawaya mĩ kenawẽ ẽ mia unaĩwẽ taeshũ haska nũ hãtxai ẽ mia ashũpakeshanaii— aka

¹⁸ hanushũ Moisĩ ea akĩ: —Haskakenã, mĩ besu txasha txasha ikai ea uĩmawe— aka

¹⁹ —Tsuabura ẽ duawakatsi ikai ẽ hatu duawamiski. Tsuaburawẽ ẽ nuikatsi ikai, hatuwẽ ẽ nuimiski. Eã besti ẽ hatu katumiski. Haskakĩ ẽ kena Senhor Deusrã, mia unãmakĩ mĩ besuuri ẽ pepa dasibi ẽ mia daĩmabaĩshanaii.

²⁰ Mia shabakabi yuinũ ea nĩkawe. Tsuãra ẽ besu uĩtã hiwepaketirumaki. Haskakẽ ẽ besu mĩ uĩtirumaki.

²¹ Mati anu ea dapi mishki ewapa kiniya hanu mĩ nia ẽ besu txasha txasha ikai kemaya mishki ewapa kini merã

²² mia beti atã mia petsĩkitã ẽ mia daĩbainaya

²³ ẽ besu ma binukaĩkẽ ẽ mia henea ẽ petxi mĩ ea uiaiĩ. Hakia ẽ besu mĩ ea uĩtirumahairaki— iwanã,